އެކަކު ފިޔަވާ އެންމެން މަރުވި އެއާ އިންޑިއާ ފްލައިޓް ވެއްޓުނު ހާދިސާގައި އަސަރުކޮށްފައިވާ އާއިލާތަކުން އެއާލައިނާއި މަތިންދާބޯޓު އުފެއްދި ބޮއިންގް ކުންފުންޏާ ދެކޮޅަށް ދުވަހަކު ވެސް ދައުވާނުކުރަން ފައިސާ ހުށަހަޅައިފިއެވެ.

މި ދިޔަ އަހަރުގެ ޖޫން 12 ގައި އިންޑިއާއިން އިނގިރޭސި ވިލާތަށް ނައްޓައިލިތަނާހެން ހޮސްޓެލްއަކަށް ވެއްޓި ފްލައިޓުން މަރުވި 241 މީހުންނާއި ބިންމަތިން މަރުވި 19 މީހުންގެ އާއިލާތަކަށް ހުށަހަޅައިފައިވަނީ 11،042 ޑޮލަރު (170،598ރ.) އާއި 22،077 ޑޮލަރު (341،089ރ.)އާ ދޭތެރޭގެ ފައިސާއެވެ.

އެއާ އިންޑިއާއިން ބުނީ ކުރިން ވެސް ބަދަލުދީފައިވާ ކަމަށާއި މި ފަހަރު މި ހުށަހެޅި އަދަދަށްވުރެ އިތުރަކަށް ނުދޭނެ ކަމަށެވެ.

"މިއީ އިންސާފުވެރި އަދި ގާނޫނާ އެއްގޮތް އަދަދެއް. އަސަރުކޮށްފައިވާ ކޮންމެ އާއިލާއަކަށް އަހަރެމެން އެހީތެރިވާނަން،" އެއާ އިންޑިއާއިން ބުންޏެވެ.

މި ނިންމުމާ ދެކޮޅުހެދި ފަރާތްތަކުން ބުނީ މި ފަދަ ގޮތަކަށް މައްސަލަ ނިންމަން އަދި މާ އަވަސް ކަމަށެވެ.

"މިހެން ހެދުމުން ތަހުގީގު ނުނިމެނީސް އާއިލާތައް ގާތުގައި މި އެދެވެނީ އެ މީހުންނަށް ލިބިފައިވާ ހުރިހާ ގާނޫނީ ހައްގުތަކެއް ދޫކޮށްލަން،" މަރުވި މީހެއްގެ އާއިލާގެ ގާނޫނީ ވަކީލަކު ބުންޏެވެ.

ހަތަރު ގައުމު ކަމަށްވާ އިންޑިއާ، އިނގިރޭސި ވިލާތް، ޕޯޗުގަލް އަދި ކެނެޑާގެ ރައްޔިތުން މި ހާދިސާގައި މަރުވެފައިވާތީ އެއާ އިންޑިއާގެ މި ނިންމުމުގެ ސަބަބުން އެ ގައުމުތަކުގައި ވަނީ އެއާ އިންޑިއާއާ ދެކޮޅަށް އަލުން ދައުވާތައް ހުށަހަޅައިފައެވެ. އަދި އެއާ އިންޑިއާއިން މި ހާދިސާގެ ޒިންމާ ރަނގަޅު ގޮތުގައި ނަންގުވަން ބަހުސް ވަނީ އުފެދިފައެވެ. އެއާ އިންޑިއާ އާއި ބޮއިންގްއާ ދެކޮޅަށްކުރާ ދައުވާތަކުގައި ފްލައިޓްގެ ސަލާމަތީ ކަންތައްތައް ދޯދިޔާކަމަށް ވެސް ވަނީ ތުހުމަތުކުރެވިފައެވެ.

ފްލައިޓުން ސަލާމަތްވި ހަމައެކަނި މީހަކީ އިނގިރޭސި ވިލާތުގެ ރައްޔިތެއް ކަމަށްވާ އިންޑިއާ ދަރިކޮޅުގެ ވިޝްވަޝް ކުމާރު ރަމޭޝްއެވެ. އޭނާ ސަލާމަތްވި ނާދިރު ގޮތަކީ މުއުޖިޒާތެއް ކަމަށް ވައިގެ ދަތުރުފަތުރާ ބެހޭ މާހިރުން ދެކެއެވެ.