އޮކްޓޫބަރު 1964 ގެ 22 ގައި  ފްރާންސްގެ ލިޔުންތެރިޔާ އަދި ފަލްސަފާވެރިޔާ ޖޯން-ޕޯލް ސާޓްރާވަނީ އަދަބީ ތާރީހުން ޖާގަ ހޯދައިފައެވެ. އަދަބިއްޔާތުގެ ދާއިރާއިން ނޯބެލް އިނާމު އޭނާއަށް ލިބުނުކަން ނޯބެލް އެކެޑަމީގެ ސްވިޑްންގެ ގޮފިން އިއުލާނުކުރިއެވެ. ނަމަވެސް އެ ޝަރަފު ގަބޫލުކުރުމަށް ސާޓްރާ އިންކާރުކުރިއެވެ.

އެކެޑަމީން އޭނާގެ މަސައްކަތްތަކަށް ތައުރީފުކުރީ އެއީ "ހިޔާލުތަކުން މުއްސަނދި، މިނިވަންކަމުގެ ރޫހާއި ތެދުވެރިކަން ހޯދުމުގެ އަޒުމުން ފުރިގެންވާ" މަސައްކަތްތަކެއްކަމަށް ބުނެއެވެ. ނަމަވެސް ސާޓްރާ ގަބޫލުކުރި ގޮތުގައި ލިޔުންތެރިޔަކު ރަސްމީ ޝަރަފުތަކަށް ބަރޯސާވެގެންނުވާނެއެވެ.

އެ އިނާމު އޭނާއަށް ދިނުން ހުއްޓުވުމަށް ކުރިންވެސް އޭނާވަނީ މަސައްކަތްކޮށްފައެވެ. އޮކްޓޫބަރުގެ ކުރީކޮޅު އޭނާ ނޯބެލް ކޮމިޓީއަށް ސިޓީއެއް ފޮނުވިއެވެ. އޭނާއަށް އެ އިނާމު ނުދިނުމަށް އެދިއެވެ. ނަމަވެސް އެކެޑަމީން އޭރުވަނީ އޭނާއަށް އެ އިނާމު ދޭން ނިންމައިފައެވެ.

ސާޓްރާ އިނާމު ގަބޫލުނުކުރި ސަބަބު އާންމު ބަޔާނެއްގައި ހާމަކުރިއެވެ. އޭނާގެ ސަބަބުތައް އަމިއްލަ ސަބަބުތަކާއި އުސޫލީ ސަބަބުތަކަށް ބަހައިލިއެވެ.

އޭނާ ގަބޫލުކުރި ގޮތުގައި ލިޔުންތެރިން އެ މީހުންގެ ސިޔާސީ އަދި އިޖުތިމާއީ ހިޔާލުތައް ފާޅުކުރަންވާނީ އެ މީހުންގެ މަސައްކަތްތަކުގެ ތެރެއިންނެވެ. މުއައްސަސާތަކުގެ ބަލައިގަތުމަށް އެ މީހުން ބަރޯސާވެގެންނުވާނެއެވެ.

"ސިޔާސީ، އިޖުތިމާއީ، ނުވަތަ އަދަބީ ގޮތުން ވަކި ގޮތެއް ހިޔާރުކުރާ ލިޔުންތެރިޔަކު އަމަލުކުރަންވާނީ ހަމައެކަނި އޭނާގެ އަމިއްލަ ވަސީލަތްތަކާއެކުގައި. އެއީ ލިޔައި ބަސްތަކުން. އޭނާއަށް ލިބޭ ކޮންމެ ޝަރަފަކީ ކިޔުންތެރިން ޕްރެޝަރަށް ހުށަހެޅޭނެ ކަމެއް. އަހަރެން ޖޯން-ޕޯލް ސާޓްރާގެ ނަމުގައި ސޮއިކުރުމާއި ނޯބެލް އިނާމު ލިބިފައިވާ ޖޯން-ޕޯލް ސާޓްރާގެ ނަމުގައި ސޮއިކުރުމަކީ ތަފާތު ދެ ކަމެއް،" ސާޓްރާ ބުނެފައިވެއެވެ.

އޭނާވަނީ އޭގެ ކުރިން ފްރާންސްގެ އެންމެ މަތީ މަދަނީ އަދި އަސްކަރީ ޝަރަފުކަމަށްވާ ނެޝަނަލް އޯޑާ އޮފް ދަ ލީޖަން އޮފް އޮނާވެސް ގަބޫލުކުރުމަށް އިންކާރުކޮށްފައެވެ. އަދި އެހެނިހެން ރަސްމީ ކާމިޔާބީތަކާއި އިނާމުތައްވެސް އޭނާވަނީ ގަބޫލުނުކޮށް ދޫކޮށްލައިފައެވެ.

ފިނި ހަނގުރާމައިގެ ދުވަސްވަރު ނޯބެލް އިނާމުގެ ސިޔާސީ މިސްރާބާމެދުވެސް ސާޓްރާ ސުވާލު އުފެއްދިއެވެ. އޭނާ ގަބޫލުކުރި ގޮތުގައި އެ އިނާމު އިސްކަންދެނީ ހުޅަނގުގެ ލިޔުންތެރިންނަށާއި އިރުމަތީ ޔޫރަޕްގެ ސަރުކާރުތަކާ ދެކޮޅު ލިޔުންތެރިންނަށެވެ.

ރަޝިޔާގެ މިހާއީލް ސޮލޮހޯވްގެ ބަދަލުގައި ރަޝިޔާގެ ބޮރިސް ޕެސްޓާނާކްއަށް އިނާމު ދިނުމަށް އެކެޑަމީން ނިންމި ނިންމުމަށް އޭނާ ފާޑުކިއެވެ.

"ނޯބެލް އިނާމަކީ ހުޅަނގުގެ ލިޔުންތެރިންނަށް އަދި އިރުމަތީގެ ބާގީންނަށް ހާއްސަކޮށްފައިވާ މުއައްސަސާއަކަށްވަނީވެފައި. ސޮލޮހޯވްގެ ބަދަލުގައި ޕެސްޓާނާކަށް އިނާމު ދިނުމަކީ ހިތާމަހުރި ކަމެއް. އަދި މި ގޮތުން ޝަރަފު ދިން ހަމައެކަނި ރަޝިޔާގެ މަސައްކަތަކީ ގައުމުން ބޭރުގައި ޝާއިއުކޮށް، އަމިއްލަ ގައުމުގައި މަނާކޮށްފައިވާ ފޮތަކަށްވުމީވެސް ހިތާމަހުރި ކަމެއް،" ސާޓްރާ ބުނެފައިވެއެވެ.

ސާޓްރާ ބިރުގަތީ އެ ޝަރަފުގެ ސަބަބުން އޭނާއަކީ މުއައްސަސާއަކަށް ވެދާނެތީއެވެ. އޭނާ ބޭނުންވީ އަގުހުރި އިނާމުތަކުގެ ނުފޫޒެއް ނެތި، ކިޔުންތެރިން އޭނާގެ ލިޔުންތަކާމެދު ގޮތް ނިންމުމަށެވެ.

"އެހެންކަމުން، މިހާރުގެ ހާލަތެކޭ އެއްފަދައިން، އެންމެ ޝަރަފުވެރި ހާލަތެއްގައި ކަންތައް ވީނަމަވެސް ލިޔުންތެރިޔާ އަމިއްލައަށް މުއައްސަސާއަކަށް ބަދަލުވުމަށް އިންކާރުކުރަންޖެހޭނެ،" ސާޓްރާ ބުނެފައިވެއެވެ.

ނޯބެލް އިނާމާއެކު 250،000 ސްވިޑްންގެ ކްރޯނާ (25،365.78 ޑޮލަރު ނުވަތަ 391،140.32ރ.) ލިބެއެވެ. ސާޓްރާވަނީ ނޯބެލް އިނާމުގެ އިތުރުން އެ ފައިސާވެސް ގަބޫލުކުރުމަށް އިންކާރުކޮށްފައެވެ.

ސްވިޑިޝް އެކެޑަމީން އޭނާގެ ނަން ރެކޯޑުތަކުން އުންޏެއްނުކުރެއެވެ. އަދިވެސް އޭނާގެ ނަން ނޯޓުކޮށްފައިވަނީ 1964 ގައި ނޯބެލް އިނާމު ލިބުނު، އަދި އިނާމު ގަބޫލުކުރުމަށް އިންކާރުކުރި ފަރާތުގެ ގޮތުގައެވެ.

ސާޓްރާގެ މި ނިންމުމަކީ އަދަބިއްޔާތުގެ ތާރީހުގައި އިންކާރުކުރުމުގެ އެންމެ މަޝްހޫރު އެއް ހާދިސާއެވެ. ސާޓްރާ ހިޔާރުކުރީ މަގުބޫލުކަމަށްވުރެ މިނިވަންކަމެވެ.

ސާޓްރާގެ އިތުރުން ނޯބެލް އިނާމު ގަބޫލުކުރަން އިންކާރުކުރި އަނެއް ފަރާތަކީ ވިއެޓްނާމުގެ ސިޔާސީ މީހެއް އަދި އިންގިލާބީ ލީޑަރެއްކަމަށްވާ ލެ ޑުކް ތޯއެވެ. އެމެރިކާގެ ހާރިޖީ ވަޒީރު ހެންރީ ކިސިންޖާއާއެކު އޭނާއަށް 1973 ގައި އަރުވަން ނިންމި ނޯބެލް ސުލްހައިގެ އިނާމު ގަބޫލުކުރުމަށް އޭނާ އިންކާރުކުރިއެވެ. އެއީ އޭރުވެސް އެމެރިކާ ވިއެޓްނާމާ ދެކޮޅަށްކުރަމުންދިޔަ ހަނގުރާމަ ކުރިއަށްދާތީއާއި ހަގީގީ ސުލްހަ ގާއިމުވެފައި ނުވާތީއެވެ.