އެއީ 2000 ގެ އަހަރުތަކެވެ. އިނގިރޭސި ވިލާތުގެ ވިޔަފާރިވެރިޔާ ސައިމަން ޕިއާސް އަދި އެމެރިކާގެ ފޮއްޗާ ބެހޭ ތަޖުރިބާކާރު ނިކޮލަސް ގޮޑްލީ، އެފްރިކާ ބައްރުގެ މަޑަގަސްކަރްގައި އާދަޔާ ހިލާފު މަޝްރޫއެއް ފެށިއެވެ.
ދެ މީހުންވެގެން 80 މަސައްކަތްތެރިންގެ ޓީމެއް އެއްތަންކުރިއެވެ. ޖެހިގެން އައި ފަސް އަހަރު ދުވަހުގެ ތެރޭގައި "ގޯލްޑަން އޯބް" ބާވަތުގެ ފައިދިގުމަކުނުގެ 1.2 މިލިއަނަށްވުރެ ގިނަ ފައިދިގުމަކުނުގެ ފަށުއި އެއްކުރިއެވެ.
ގުދުރަތީ ގޮތުން ރަންކުލައިގައި ހުންނަ މި ފަށުއި ނެގީ އަތުންނެވެ. އަދި އެއަށް ފަހު އެ ފައިދިގުމަކުނުތައް އަނބުރާ ވަލަށް ދޫކޮށްލިއެވެ. މި ބުރަ މަސައްކަތުން އެންމެ ފަހުން ލާމަސީލު "ރަން" ފަށުއި ހެދުމެއް ވިޔުނެވެ.
މި ހެދުން ވެގެން ދިޔައީ އިންސާނުންގެ އީޖާދީކަމާއި ކެތްތެރިކަމުގެ ހެތްކަކަށެވެ. އަދި އިނގިރޭސި ވިލާތުގެ ވެރިރަށް ލަންޑަންގެ ވިކްޓޯރިއާ އެންޑް އަލްބަޓް ދާރުލްއާސާރުގައި 2012 ގައި ދައްކައިލަން ބެހެއްޓިއެވެ. އަދި މި ހެދުން ވެގެން ދިޔައީ ދުނިޔޭގެ އެންމެ ނާދިރު ޓެކްސްޓައިލަށެވެ.
"ގޯލްޑަން" ނުވަތަ "ރަން" މި ބަހުން މުހާތަބު ކުރެވުނަސް ގޯލްޑަން އޯބް ފައިދިގުމަކުނަކީ މައުދަނެއްގެ ގޮތުން ރަން ދޫކުރާ މަހުލޫގެއް ނޫނެވެ. ބަޔޮލޮޖީގެ ނަޒަރުން ބަލާއިރު އެ ސޮރުމެންގެ ހަށިގަނޑުގައި ރަން މައުދަނެއްގެ ގޮތުގައި އުފައްދައިދޭ ފަދަ ނިޒާމެއް ނުހުރެއެވެ.
"ރަން" މި ބަސް ބޭނުން ކުރެވެނީ އެ ސޮރުމެން ދޫކުރާ ފަށުއި ވިދާ ރީނދޫ ކުލައެއްގައި ހުންނާތީއެވެ. ގުދުރަތީ ގޮތުން އެ ސޮރުމެންގެ ފަށުއީގައި މި ކުލަ ހުންނާތީ އޭގެން ޓެކްސްޓައިލް ވިޔުމުން އެ ހެދުމުގެ ފެބްރިކަށް ރަން ކުލައިގެ ދަޅައެއް އަޅަނީއެވެ.
މި ގޮތަށް ވިސްނާލާށެވެ: ގޯލްޑަން އޯބް ފައިދިގުމަކުނުގެ ފަށުއި ހުންނަނީ މުއްސަނދި ރީނދޫ ކުލައެއްގައެވެ. މިހެންވެ، ގިނަ އަދަދެއްގެ އޭގެ ފަށުއި އެއްކޮށްގެން ވިޔުމުން، ބަލާބެލުމަށް ފެންނަނީ ރަންކުލައިގައި ވިދާބަބުޅާ ތަނެވެ. ގޯލްޑަން އޯބް ފައިދިގުމަކުނަށް އެ ނަން ދެވި، އެ ސޮރުގެ ފަށުއި އެހާ ލާމަސީލު ވަނީ، އެ ސޮރު މައުދަނެއްގެ ގޮތުގައި ރަން ފަށުއި ދޫކުރާތީއެއް ނޫނެވެ. ނަމަވެސް އެ ފަށުއިގެ ކުލަ އެ ގޮތަށް ހުންނާތީއެވެ.
