އެމެރިކާގެ ލިޔުންތެރިޔާ ރޮބަޓް ގްރީންއަކީ އިންސާނީ ގުޅުންތަކާއި ދޭދޭ މީހުންގެ ދެމެދުގައި ބާރާއި ނުފޫޒު މަސައްކަތްކުރާ ގޮތާ ބެހޭ ގޮތުން އެތައް ފޮތެއް ލިޔެފައިވާ މީހެކެވެ. އެ ގޮތުން މި ބަލައިލަނީ ބާރު ހޯދައި އެ ދަމަހައްޓާނެ ގޮތާ ބެހޭ ގޮތުން އޭނާ ލިޔުނު ފޮތް "ދަ 48 ލޯޒް އޮފް ޕަވާ" ގައި ބާރާ ގުޅޭ ގޮތުން އޭނާ އަލިއަޅުވާލާފައިވާ 48 ކަމެއްގެ ހުލާސާއަށެވެ:
- ތިބާގެ ބޮސްއަށްވުރެ ތިބާ މޮޅުކަމަށް ދައްކައިގެން ނޫޅޭށެވެ. ތިބާގެ މައްޗަށް ތިބޭ މީހުން، އެ މީހުން ތިބެނީ ތިބާގެ މަތީގައި ކަމަށް ދައްކާށެވެ. ތިބާގެ ހުނަރުތައް އެހާ ބޮޑަށް ފާޅުނުކުރާށެވެ. އެހެން ނޫނީ ބޮސްއަށް އޭނާގެ ނަފުސާމެދު އޮންނަ ޔަގީންކަން ކުޑަވާނެއެވެ.
- ރަހްމަތްތެރިންނަށް މާބޮޑަށް އިތުބާރުނުކުރާށެވެ. ދުޝްމިނުންގެ ބޭނުންހިފާށެވެ. ތިބާއަށް ބޭވަފާތެރިވާން ރަހްމަތްތެރިންނަށް މާފަސޭހަވާނެއެވެ. ނަމަވެސް ދުޝްމިނެއްގެ ރަހްމަތްތެރިކަން ލިބިއްޖެ ނަމަ އޭނާ މާ ވަފާތެރިވާނެއެވެ.
- ތިބާގެ ނިޔަތް ހާމަނުކުރާށެވެ. އެއީ ތިބާގެ އަމަލުތައް ކުރިއަށް ލަފާކުރަން ނޭނގޭނެ ގޮތް ހެދުމަށެވެ.
- ބުނަންޖެހޭ މިންވަރަށްވުރެ މަދުން ބުނާށެވެ. ހަނުހުރުމަކީ ތިބާއަށް ބާރު ލިބޭ ކަމެކެވެ. މާގިނައިން ވާހަކަދެއްކުމުން ތިބާގެ ރޭވުންތައް ފަޅާއަރާނެއެވެ.
- ކޮންމެ ގޮތެއް ހަދައިފައި ވެސް ތިބާގެ އަގު ހިފަހައްޓާށެވެ. ބާރު ހޯދުމުގެ ބިންގަލަކީ ތިބާގެ އަގެވެ.
- ކޮންމެ ގޮތެއް ހަދައިފައި ވެސް ސަމާލުކަން ހޯދާށެވެ. ތިބާއަކީ އެހެން މީހުންނަށް އެނގޭ މީހަކަށްވުމަށްޓަކައެވެ. ތިބާގެ ބަސްވިކުމަށްޓަކައެވެ.
- އެހެން މީހުން ލައްވާ ތިބާއަށް މަސައްކަތްކުރުވާށެވެ. އަދި އެ ކަން ބަލައިގަންނަކަން އެ މީހުންނަށް ދައްކާށެވެ. އެހެން މީހުންގެ މަސައްކަތާއި ހަކަތަ ތިބާގެ ފައިދާއަށް ބޭނުންކުރާށެވެ.
- ތިބާގެ ގާތަށް އެހެން މީހުން އަންނާނެ ގޮތް ހަދާށެވެ. އެހެން މީހުންގެ ފަހަތުން ތިބާ ނުދުވާށެވެ. އެ މީހުން ލައްވާ އެ މީހުން ތިބާ ހޯދާނެ ގޮތް ހަދާށެވެ.
- ކާމިޔާބު ހޯދާނީ އަމަލުންނެވެ. އަރައިރުންވެގެނެއް ނޫނެވެ. ތިބާގެ ނުކުތާ ސާބިތުކޮށްދޭނީ އަމަލުންނެވެ. ބަހުންނެއް ނޫނެވެ.
- ހަޔާތުން ފޭލިވެފައިވާ އަދި އުފާ ނުލިބިފައިވާ މީހުންނާ ދުރުވާށެވެ. އެހެން މީހުންގެ ބަދުނަސީބަކީ ގައިންގަޔަށް އަރާ ކަހަލަ ބައްޔެކެވެ. ތިބާ ވައްޓާލަން މަސައްކަތްކުރާ މީހުންނާ ދުރުވާށެވެ.
- މީހުން ތިބާއަށް ބަރޯސާވާނެ ގޮތް ހަދާށެވެ. އެހެން ހެދުމުން ބާރާއި ކޮންޓްރޯލް އޮންނާނީ ތިބާގެ އަތުގައެވެ.
- އެހެން މީހުންގެ ބާރު ކަނޑުވާލަން ވާނީ އިހުލާސްތެރިކަމާއެކުއެވެ. އަދި ތިބާ ބޭނުންވާ މިންވަރަށް ހިތްހެޔޮކަން ފާޅުކުރާށެވެ. ޖަޒުބާތު ނައްތައިލުމުން ތިބާއަށް ބާރު ލިބޭނެއެވެ.
- އެހެން މީހެއްގެ އެހީ ހޯދާއިރު އެ މީހުން ބޭނުންވާ ކަންތައްތައް ތިބާއަށް މުހިންމުކަން ހާމަކުރާށެވެ. އެ މީހުންގެ ފަރާތުން ތިބާ ހޯދަން އުޅެނީ އެ މީހުންގެ ޝުކުރުވެރިކަމާއި ލޯބިކަމުގައި ނުދައްކާށެވެ.
- އެހެން މީހަކަށް ތައާރަފު ވާނީ ރަހްމަތްތެރިއެއްގެ ގޮތުގައެވެ. ނަމަވެސް އަމަލުކުރާނީ ޖާސޫސެއްގެ ގޮތުގައެވެ. އޭނާއަށް ނޭނގޭ ގޮތަށް އޭނާގެ ފަރާތުން އަގުހުރި މައުލޫމާތު ހޯދަން ދަސްކުރާށެވެ.
- ދުޝްމިނު މީހާ އެއްކޮށް ބަލިކޮށްލާށެވެ. އޭނާ އަލުން އެނބުރި ނާންނާނެ ވަރަށެވެ. ސަބަބަކީ އޭނާ ދެން އަންނާނީ ބަދަލުހިފާށެވެ.
- މީހެއްގެ ގާތުގައި އަބަދު ނޫޅޭށެވެ. ނެތް ތަން އިހުސާސް ކުރެވުމުން ތިބާއަށްކުރާ އިހުތިރާމު ބޮޑުވާނެއެވެ. ތަދު އެއްޗެއްގެ އަގު ބޮޑުވާ ފަދައިންނެވެ.
- އެހެން މީހުން ވާނުވާގައި ބައިތިއްބާށެވެ. ހީނުކުރާ ގޮތަށް ތިބާ ކަންތައްތައްކުރާށެވެ. އެއިރުން އެހެން މީހުން އޮޅުންބޮޅުންގަނޑެއްގެ ތެރެއަށް ދާނެއެވެ. ނަތީޖާއަކަށް ވާނީ ތިބާއަށް ބާރު ލިބުމެވެ.
- ތިބާ އެކަހެރިވެނުގަންނާށެވެ. އެކަނިވެރިކަމަކީ ނިކަމެތިކަމަށް ތިބާ ހުށަހެޅޭނެ ކަމެކެވެ. މުޖުތަމައުގެ ނުފޫޒު ގަދަ މީހުންގެ ވިއުގައިގައި އުޅޭށެވެ.
- ތިބާ މުއާމަލާތްކުރާ މީހުންގެ ގޮތް ދަންނާށެވެ. ބައިވެރިންނާއި ހަތުރުން ވިސްނުންތެރިކަމާއެކު ދެނެގަންނާށެވެ.
- މީހަކަށް ގޮތްދޫނުކުރާށެވެ. އެހެން މީހުންގެ ކަންތައްތަކަށް ނުވަދެ ހުރުމަށްޓަކައި ތިބާގެ ފަރުދީ މިނިވަންކަން ދަމަހައްޓާށެވެ.
- ތޫނުފިލި މީހުން ދަމައިގަންނަން ތިބާ މޮޔައަކަށް ހެދިގެން އުޅޭށެވެ. ތިބާގެ މައްޗަށް ނުފޫޒު ހިންގޭކަމަށް ހީކުރުވާށެވެ.
- ބަލި ގަބޫލުކުރާކަމަށް ހެދޭށެވެ. ބައެއް ފަހަރު ރަނގަޅު ވަގުތުގައި ބަލި ގަބޫލުކޮށްފި ނަމަ ބާރު ލިބޭނީ ތިބާއަށެވެ.
- ތިބާގެ ހަކަތަ ފޯކަސް ކުރަންވާނީ މައްސަލައަކަށް ވާކަހަލަ މައްސަލަތަކަށެވެ.
- ތިބާގެ ހަގީގީ ސިފަ ނުދައްކާށެވެ. ތާސްބައިގެ ހުރިހާ ގަނޑުތަކެއް ނުދައްކާށެވެ.
- ތިބާގެ ނަފުސު ބައްޓަންކުރަންވާނީ ތިބާއެވެ. ތިބާގެ ކުރިމަގުގެ އާރުކާޓީއަކަށް ވާންވާނީ ތިބާއެވެ.
- ޒިންމާގެ އަތް ސާފުކޮށް ބަހައްޓާށެވެ. މައްސަލަތަކުގެ ޒިންމާ އަޅުވަން ވާނީ އެހެން މީހުންގެ ބޮލުގައެވެ.
- އެހެން މީހުންގެ ވަފާތެރިކަން ހޯދަން އެ މީހުންގެ އެދުންތައް ފުއްދައިދޭށެވެ.
- އަމަލުކުރަން ޖެހިލުންނުވާށެވެ. ފިނޑިވުމަކީ ނުރައްކާތެރި ކަމެކެވެ. އިސްނެގުމުން ބާރު ލިބޭނެއެވެ.
- ކޮންމެ ކަމެއް ވެސް އޭގެ ނިމުމާ ހަމައަށް ރާވާށެވެ. ތަފުސީލީ ރޭވުމެއް އޮތުމުން ހިތް ނޭދޭ ކަންތައްތަކެއް ކުރިމަތި ނުވާނެއެވެ.
- ތިބާގެ ކާމިޔާބީތަކަކީ ފަސޭހައިން ލިބުނު އެއްޗެއްކަން ދައްކާށެވެ. އެއިރުން އެހެން މީހުން ހީކުރާނީ ތިބާއަކީ ގުދުރަތީ ގޮތުން ހުނަރު ހުރި މީހެއްކަމަށެވެ.
- އެހެން މީހުންނަށް ލިބިފައިވާ ފުރުސަތުތަކުގެ މައްޗަށް ބާރުހިންގާށެވެ. އެ މީހުންގެ ނިންމުންތަކަށް ބާރު ފޯރުވަން އެ މީހުންނަށް ދޭ ފުރުސަތުތައް ހަނިކުރާށެވެ.
- އެހެން މީހުންގެ ހުވަފެންތަކާ ކުޅޭށެވެ. އެ މީހުންގެ ޖަޒުބާތުތަކާއި ހުވަފެންތައް ތިބާއަށް ކަމުދާކަން ދެއްކުމުން ތިބާއަށް އެ މީހުންގެ މައްޗަށް ބާރު ލިބޭނެއެވެ.
- އެހެން މީހުންގެ ބަލިފައި ދެނެގަންނާށެވެ. އެހެން މީހުންގެ އެދުންތަކަކީ ކޮބައިތޯ ބަލާށެވެ. އެއިރުން އެ މީހުން އަމަލުކުރާ ގޮތަށް ނުފޫޒު ފޯރުވޭނެއެވެ.
- ބާރު ލިބުން ހުރީ ތިބާގެ ގަދަކަމާއި ހައިބަތުހުރިކަން ދައްކައިގެންނެވެ.
- ކޮންމެ ކަމަކަށް ވެސް ރަނގަޅު ތަންވަޅެއްވެއެވެ. އެއްވެސް ކަމެއް އަވަސްއަރުވާނުލާށެވެ. ކޮންމެ ކަމަކަށް ވެސް އެ ކަމަށް އެންމެ ރަނގަޅު ވަގުތުވެއެވެ.
- ތިބާއަށް ލިބެން ނެތް އެއްޗެއްސާމެދު ރުހޭނެކަމެއް ނެތެވެ. ތިބާގެ އަތް ނުފޯރާފަށުގައިވާ ކަންތައްތަކާމެދު ނުވިސްނާށެވެ.
- މީހުންގެ ސަމާލުކަން ލިބޭ ކަހަލަ "ޑްރާމާތައް" ކުޅެލާށެވެ. ކަންތައްތައް ބޮޑުކޮށްލުމަކީ ސަމާލުކަން ލިބޭނެ ކަމެކެވެ.
- ތިބާ ވިސްނަންވާނީ ތިބާ ހިތް އެދޭ ގޮތަށެވެ. ނަމަވެސް ބޭރުފުށުން އަމަލުކުރަން ވާނީ އެހެން އެންމެންގެ ވެސް ހަރަކާތް ހުންނަ ގޮތަށެވެ. އިޖުތިމާއީ މިންގަނޑުތަކާ ފާޅުކޮށް ދެކޮޅު ނުހަދާށެވެ.
- މަސް ބޭނޭނީ ފެންގަނޑު ހިލުވައިލައިގެންނެވެ. އެހެން މީހުން ކައްކާލާށެވެ. އެއިރުން އެ މީހުންނަށް ގޯސް ހެދޭނެއެވެ.
- ހިލޭ ލިބޭ އެއްޗެއްސާ ދުރުގައި ހުންނާށެވެ. އެ ތަކެތި އާއްމު ގޮތެއްގައި ލިބޭނީ ސިއްރުކުރެވިފައިވާ އަގަކާއެކުއެވެ.
- ގަދަ މީހުންނާ އެއްގޮތްކޮށް ނޫޅޭށެވެ. އެހެން މީހުންގެ ފިޔަވަޅުތަކުން ހިނގުމުގެ ބަދަލުގައި ތިބާ ތިބާގެ އަމިއްލަ މަގެއް ކޮށާށެވެ.
- ބަކަރި ހުއި ހައްޕާ މީހާއަށް "ހަމަލާ" ދޭށެވެ. އެއިރުން ބަކަރިތައް ވިއްސިވިހާލިވެގެންދާނެއެވެ. މާނައީ، ފަހަތުން އުޅޭ މީހުން ބަލިކޮށްލެވޭނީ އެ މީހުންގެ ވެރިން ނިކަމެތިކޮށްލެވިގެންނެވެ.
- މީހުންގެ ހިތްތަކާއި ސިކުނޑިތަކާ ކުޅެލާށެވެ. މީހުން ކޮންޓްރޯލް ކުރެވޭނީ އެ މީހުންގެ ރޫހުގެ މައްޗަށް ބާރު ހިންގިގެންނެވެ.
- ލޯގަނޑެއް ދިއްކޮށްލާށެވެ. އެއިރުން އެ މީހަކަށް އޭނާގެ އަމިއްލަ ރުޅިގަނޑު ހުންނަ ގޮތް ފެނުމުން ބަލި ގަބޫލުކުރާނެއެވެ.
- ބަދަލަކަށް ބޭނުންވާކަމަށް ވިސްނައިދޭށެވެ. ނަމަވެސް އެހާ ބޮޑެތި އިސްލާހުތަކެއް ނުގެންނާށެވެ. މާބޮޑު ބަދަލެއް ގެންނަން އުޅެފި ނަމަ އެ ކަމާ ދެކޮޅުހަދަން ހިތްވަރު ލިބޭނެއެވެ.
- ތިބާއަކީ "ޕާފެކްޓް" ނުވަތަ އެންމެ ފުރިހަމަ އިންސާނާ ކަމަށް ނުދެއްކޭށެވެ. އެ ކަމުގެ ސަބަބުން ތިބާއާމެދު ހަސަދަ އާއި ނަފުރަތު އުފެދޭނެއެވެ.
- ތިބާ ކަނޑައެޅި އަމާޒުފަތްގަނޑަށްވުރެ ދުރަށް ނުދާށެވެ. ބޭނުންވި އަމާޒަށް ވާސިލުވުމުން އެ ތަންވަޅުން ފެށިގެން މަސައްކަތް ހުއްޓާލާށެވެ.
- ވަކި ބައްޓަމަކަށް ތިބާ ނުފެތޭށެވެ. ހާލަތާ އެއްގޮތަށް ބަދަލުވާށެވެ. ހަރުކަށި މިންގަނޑެއްގައި ތާށިނުވާށެވެ.
މި 48 އުސޫލަކީ ބާރު ހޯދަން އަމަލުކުރެވިދާނެ ގޮތްތަކެކެވެ. ނަމަވެސް މި އުސޫލުތަކަށް އަމަލުކުރަން ވާނީ ހާލަތާއި ތިބާގެ ސުލޫކީ މިންގަނޑު ނިޔާކުރާ ގޮތަކަށެވެ.
ނޯޓު: ތަރުޖަމާއެއް
