މިޔަންމާގައި އަހުލީ ހަނގުރާމަ ހިނގަމުންދާތީ މެލޭޝިއާއަށް ހިޖުރަކޮށްފައިވާ ރެފިއުޖީން، އދ.ގެ އެދުމާ ހިލާފަށް މެލޭޝިއާއިން މިޔަންމާއަށް ފޮނުވައިލަން ފަށައިފިއެވެ.

މުޅިއަކު 5،000 ރެފިއުޖީން ފޮނުވައިލަން ނިންމައިފައިވާއިރު ފިޔަވަހިތަކެއްގެ ދަށުން މިއަދު ފޮނުވައިލީ 1،476 މީހުންނެވެ. އޭގެ ތެރޭގައި ހިމެނެނީ 1،370 ފިރިހެނުން، 79 އަންހެނުން، 20 ފިރިހެންކުދިން އަދި ހަތް އަންހެންކުދިންނެވެ.

މެލޭޝިއާއިން ބުނީ އެ މީހުން ފޮނުވައިލަނީ އެ މީހުން އަމިއްލައަށް އެދިގެންކަމަށެވެ. އަދި މިއީ ލިޔެކިޔުން ނެތި ހިޖުރަކުރުމުގެ މައްސަލަ ހައްލުކުރަންކުރާ ކަމެއްކަމަށެވެ.

މެލޭޝިއާގެ ބޮޑުވަޒީރު އަންވަރު އިބްރާހީމް ވިދާޅުވީ މިޔަންމާގެ ރެފިއުޖީން ބަލައިގަނެވޭނީ ވަގުތީ ގޮތުންކަމަށާއި ދާއިމީކޮށް މެލޭޝިއާގައި އެ މީހުން ނުބޭތިއްބޭނެކަމަށެވެ.

"މިޔަންމާއަށް ޖެހޭނެ އެ ގައުމުގެ ރެފިއުޖީންގެ ޒިންމާ ނަގަން. އަދި އެ ރެފިއުޖީން އަނބުރާ ބަލައިގަންނަން،" އޭނާ ވިދާޅުވިއެވެ.

އދ.ގެ ރެފިއުޖީންނާ ބެހޭ އިދާރާއިން ބުނީ މިޔަންމާ ރެފިއުޖީން އަނބުރާ ފޮނުވައިލުމުގައި އދ.ގެ ދައުރެއް ނެތްކަމަށެވެ.

މިޔަންޔާގައި ހިނގަމުންދާ އަހުލީ ހަނގުރާމައިގެ ސަބަބުން ރެފިއުޖީންނަށް ސަލާމަތާއެކު އަނބުރާ ގައުމަށް ދިއުމުގެ ހާލަތްތަކެއް ނެތްކަމަށް އދ.އިން އިންޒާރުދިނެވެ.

"ކޮންމެ ރެފިއުޖީއަކުވެސް އަނބުރާ ދިއުން ވާންޖެހޭނީ އަމިއްލަ އިހްތިޔާރުގައި ނިންމާ ނިންމުމަކަށް. ހުރިހާ މައުލޫމާތެއް ލިބިފައިވާ ހާލަތުގައި ނިންމާ ނިންމުމަކަށް. އަދި އަނބުރާ ފޮނުވައިލަންވާނީ އޭނާގެ ކަރާމާތާއި ރައްކާތެރިކަން ކަށަވަރުކުރެވިފައިވާ ހާލަތެއްގައި،" އދ.އިން ބުންޏެވެ.

ހައްގުތަކަށް މަސައްކަތްކުރާ ޖަމާއަތްތަކުންވެސް ގޮވައިލީ މެލޭޝިއާއިން މިޔަންމާއަށް ރެފިއުޖީން އަނބުރާ ފޮނުވައިނުލުމަށެވެ.

މެލޭޝިއާއިން އަނބުރާ ފޮނުވައިލައި ރެފިއުޖީންގެ ނަސްލުތައް މެލޭޝިއާއިން ހާމަކޮށްފައިނުވިޔަސް ބައެއް ޖަމާއަތްތަކުން ބުނީ އޭގެ ތެރޭގައި މެލޭޝިއާގައި އެތައް ދަހަރެއްވަންދެން ދިރިއުޅެމުންދާ ރޮހިންގްޔާ މުސްލިމުން ހިމެނޭކަމަށެވެ. ރޮހިންގްޔާ މުސްލިމުންނަކީ މިޔަންމާ ސަރުކާރާއި އަދި އެ މީހުން އުޅޭ ރަކީން ސްޓޭޓްގެ ހަނގުރާމަވެރިންވެސް ބަލައިނުގަންނަ ދަރިކޮޅެކެވެ. މިހެންވެ ރޮހިންގްޔާގެ މިލިއަނެއްހާ މީހުން ބަނގްލަދޭޝްއަށްވެސް ހިޖުރަކޮށް، އެ ގައުމުގައި ރެފިއުޖީންގެ ގޮތުގައި ދިރިއުޅޭތާ ދަހަރެއްވަނީއެވެ.