ތައިލެންޑްގައި ފެންބޮޑުވުމުގެ ސަބަބުން ވެރިރަށް ބެންކޮކާއި އިތުރު ތިން ޕްރޮވިންސަކުން ފެން ހިންދަން މިއަދާއި މާދަމާއަކީ ހާއްސަ ދެ ބަންދު ދުވަސްކަމުގައި ހަމަޖައްސައިފިއެވެ.

ދެ ދުވަހުގެ ހާއްސަ ބަންދެއް ދީފައިވާ އިތުރު ތިން ޕްރޮވިންސަކީ ނޮންޓަބޫރީ، ޕަޓޫމް ޓާނީ އަދި ސަމޫޓު ޕްރާކާނެވެ.

މިހާތަނަށް އަށް މީހުން މަރުވި ފެންބޮޑުވުމުގައި ވޭތުވެދިޔަ 48 ގަޑިއިރުގެ ތެރޭގައި 470 މިލިމީޓަރުގެ ވާރޭ ވެހުނު ބެންކޮކްގެ 50 ނުވަތަ ހުރިހާ އަވަށަކީވެސް ކާރިސާ ސަރަހައްދުތައްކަމަށް ސަރުކާރުންވަނީ ކަނޑައަޅައިފައެވެ.

"ފެންބޮޑުވެފައިވާ މަގުތަކާއި ކޮމިއުނިޓީތަކުން ފެން ހިންދަން ކެނަލްތަކުގައި ފެން ހުރިވަރު މަދުކުރަން ޖެހޭ،" ބެންކޮކްގެ ގަވަރުނަރު ޗާޓްޗާޓް ސިޓްޓީރަން ބުންޏެވެ.

ބެންކޮކުންވަނީ 4،900 މީހުން ރައްކާތެރި ހިސާބުތަކަށް ގެންގޮސްފައެވެ. ވޭތުވެދިޔަ ދުވަސްތަކުގައި ބޯކޮށް ވާރޭ ވެހި ފެންބުޑުވުމުގެ ސަބަބުން 329،000 ގެބިސީ އާއި 700،000 މީހުންނަށް އަސަރުކޮށްފައިވާކަމަށް އޮފިޝަލުން ބުންޏެވެ.

މޫސުމާ ބެހޭ އިދާރާއިން ބުނީ ލޯ ޕްރެޝަރު ސިސްޓަމް ދާތީ މިހާރު ވާރޭ ވެހުން މަދުވާން ފަށައިފައިވާކަމަށެވެ. ނަމަވެސް ގުގުރުމާއެކު ވާރޭ ވެހުމާއި ކެރީގެ އަސަރު މިއަދު ފޯރުން އެކަށީގެންވާކަމަށް ލަފާކުރިއެވެ.

"މި ވަގުތު އަހަރެންގެ ގޭގައި އޮތް ފެންގަނޑު އުނަގަނޑާ ހަމައަށް އަރާ. އަހަރެންގެ ގޭގައި ހުރި ހުރިހާ އެއްޗެއް ހުރީ ހަލާކުވެފައި،" ބެންކޮކްގެ ރަށްވެއްސެއްކަމަށްވާ އުމުރުން 33 އަހަރުގެ އާރީޓާ ސަންޕޯކާ ބުންޏެވެ.

އޭނާ ބުނީ އާއްމު ދިރިއުޅުމަށް މިހާރު ދަތިތައް ކުރިމަތިވެފައިވަނީ ކަރަންޓުގެ ހިދުމަތް މެދުކެނޑިފައިވުމާއި ފެން ބޮޑުވަމުން އަދިވެސް ދާތީ ފާހާނާ ބޭނުންނުކުރެވޭތީކަމަށެވެ.

"އުމުރުން 80 ގެ އަހަރުތަކުގައި އުޅޭ އަހަރެންގެ ދެ އަވަށްޓެރިން ތިބީ ގޭގައި ތާށިވެފައި. އެއީ ސިޑިން ފޭބެން ނެތިގެން،" އާރީޓާ ބުންޏެވެ.

ބެންކޮކްގެ ފެންބޮޑުވެފައިވާ ކްލޯންގް ޗާން ފްލެޓްތަކަށް ބޮޑުވަޒީރު އަނޫޓިން ޗަންވީރަގޫން އިއްޔެ ޒިޔާރަތްކުރެއްވުމުން އެއްވެފައި ތިބި މީހުންވަނީ އޭނާއާމެދު ނުރުހުން ފާޅުކޮށްފައެވެ. ބޯޓެއްގައި ރިލީފް އެހީ ބައްސަވަމުން ވަޑައިގަތްއިރު އެ މީހުންވަނީ އޭނާގެ ކެމްޕޭންގެ ވައުދުތަކުގެ ހަނދާން އާކޮށްދީފައެވެ. ނަމަވެސް އޭނާ ވިދާޅުވީ މި ވަގުތަށް އެންމެ މުހިންމީ ކަރަންޓުގެ ހިދުމަތް އަލުން ދިނުމާއި ބޯފެން ފޯރުކޮށްދިނުންކަމަށެވެ.