އެމެރިކާގެ އަންހެން ޑޮކްޓަރެއްކަމަށްވާ ޑރ. ކްރިސްޓާ އެޑަލްމަންއަށް މި ދިޔަ މަހު 20 ގައި ހޭލެވުނީ ވާލެއް އޭނާގެ އަނގަ ތެރެއަށް ވަންނަނިކޮށެވެ.
ވަޖިނީއާ ސްޓޭޓްގެ ޑޮކްޓަރު ބުނީ އެއީ ފަތިހު ހައެއް ޖަހާކަންހާއިރުކަމަށާއި ބިރުން ގޮސް ހަޅޭއްލަވަން ފެށުމުން އޭނާގެ ފިރިމީހާ އައިސް އެ ވާ ހިފިކަމަށެވެ.
"އަހަރެން ފުރަތަމަ ހީކުރީ އަހަރެންނަށް ފެންނަމުންދިޔައީ ހުވަފެނެއްކަމަށް. އަހަރެންގެ އަނގައަށް ވަންނަމުންދިޔައީ 'މައުސް' (ކުދި މީދާ)އެއްކަމަށް. ނަމަވެސް އޭގައި އަތްލުމުން އަހަރެންނަށް އެނގިއްޖެ އެއީ ހުވަފެނެއް ނޫންކަން،" އެޑަލްމަން ބުންޏެވެ.
އޭނާގެ އަނގައަށް ވަންނަން މަސައްކަތްކުރީ ކޮން ކަހަލަ ވާލެއްކަމެއް ހާމަކޮށްފައެއްނުވެއެވެ. ނަމަވެސް އޮފިޝަލުން ބުނީ އިމާރާތްތަކަށް އާއްމުކޮށް ވަދެއުޅެނީ "ބިގް ބްރައުން" ބާވަތުގެ ވާ ކަމަށެވެ.
އެ ވާ ވަނީ އެ ސޮރުގައި ރޭބީޒް ބަލި ހުރިތޯ ޓެސްޓްކޮށްފައެވެ. ނަމަވެސް އެ ބަލި ނެތްކަމަށް ދެއްކިއެވެ.
ރޭބީޒްއަކީ އަލާމާތްތައް ފެނުމުގެ ފަހުން ރަނގަޅު ނުކުރެވޭ، މީހާ މަރުވާ ބައްޔެކެވެ. އެހެންކަމުން އެޑަލްމަންވަނީ ވަގުތުން ހޮސްޕިޓަލަށް ގޮސް ރޭބީޒްގެ ފަރުވާ ހޯދައިފައެވެ. ނަމަވެސް އެ ވާލުގައި ރޭބީޒް ނެތްކަން އެނގުމުން ކުރިމަގުގައި ޖަހަން ޖެހޭ ވެކްސިންތައް ނުޖަހަން ނިންމިއެވެ.
"ވާލުގެ ދަތްތައް ވަރަށް ކުދިވާނެ. ތިބާގެ ގައިގަތް ދަތްއެޅިކަމެއް ނުވަތަ ނޫންކަމެއް ނޭނގޭނެ،" ސެއިންޓް މޭރީސް ހޮސްޕިޓަލްގެ އެސިސްޓަންޓް މެޑިކަލް ޑިރެކްޓަރު އެޑަމް ލޭންޑްސީ ބުންޏެވެ.
ހޭލާއިރު ވާލެއް ގާތުގައި އޮތްނަމަ ރަސްމީ އިދާރާތަކާ ގުޅައިގެން ރޭބީޒް ޖެހުނުތޯ ޓެސްޓްކުރަން ޖެހޭނެކަމަށް ވަޖިނީއާގެ ސަރުކާރުގެ އާއްމު ސިއްހަތާ ބެހޭ އިދާރާގައި ހައިވާނުންނަށް ފަރުވާކުރާ ވެޓް ޖޫލިއާ މާފީ ބުންޏެވެ.
"ވާލެއް ޓެސްޓްކުރަން ޖެހިއްޖެނަމަ އާއްމު ގޮތެއްގައި ޓެސްޓްގެ ނަތީޖާތައް ގާތްގަނޑަކަށް 48 ގަޑިއިރުގެ ތެރޭގައި ލިބޭނެ،" އޭނާ ބުންޏެވެ.
advertisment
