އެމެރިކާގެ ރިއަލިޓީ ޓީވީ ތަރި ކިމް ކާޑޭޝީއަންގެ ހަ މިލިއަން ޑޮލަރު (92.7 މިލިއަން ރުފިޔާ)ގެ އަގުހުރި ގަހަނާ ފޭރުމުގެ މައްސަލައިގައި ބަދަލެއްގެ ގޮތުން އޭނާއަށް އެއް ޔޫރޯ (1.14 ޑޮލަރު ނުވަތަ 17.58ރ.) ދީފިއެވެ.

ފްރާންސްގެ ވެރިރަށް ޕެރިސްގެ ކޯޓަކުން މި މަހު 15 ގައި މި އަގުގެ ބަދަލު ކިމް (ފޮޓޯ)އަށް ދިނީ އޭނާ އެދުނީ މި އަދަދު ކަމަށް ވާތީއެވެ.

ހަމަ މި މައްސަލައިގައި އޭނާގެ ފޭޑި ބަލަހައްޓައިދޭ ސީމޯން ހަރޫޝްއަށްވެސް މި އަދަދަށް ބަދަލު ދިނެވެ.

"އަހަރެން ބޭނުންވީ ފައިސާގެ ބަދަލުގައި އެ ކުށްކުރިކަން ބަލައިގަނެ، ކުށްކުރި މީހުން އެ ކަމަށް މަސްއޫލުވެރިކުރުވަން،" ޝަރީއަތުގައި މި ދިޔަ އަހަރު ކޯޓުގައި ހެކިވެސް ދިން ކިމް ބުންޏެވެ.

ޕެރިސްގެ ހޮޓަލެއްގެ ކޮޓަރިއެއްގައި 2016 ގައި ހުއްޓާ ފުލުހުންގެ ހެދުމުގައި ފޭރޭ ދެ މީހުން ވަދެ ކިމް ބަނދެ، ގެންދިޔަ ގަހަނާތަކުން އަނބުރާ ހޯދުނީ ފޭރުނު މީހުންގެ އަތުން މަގުމައްޗަށް ވެއްޓުނު އެންމެ ގަހަނާއެކެވެ. ބެލޭ ގޮތުގައި އެ މީހުން ގަހަނާތައް ބެލްޖިއަމްގައި ވިއްކައިލީއެވެ.

ޝަރީއަތް ފެށުމުގެ ކުރިން ކުށުގައި ބައިވެރިވި އަށް މީހުން ހައްޔަރުގައި ބެހެއްޓިއެވެ. ނަމަވެސް މި ދިޔަ އަހަރު ކުރި ހުކުމްގެ މުއްދަތު އެއަށްވުރެ ކުރުވުމުން އެ މީހުން އަނބުރާ ޖަލަކަށް ނުލައެވެ.

ކިމް ބުނެފައިވަނީ ފޭރުން ރޭވި މީހާއަށް މާފުކުރިކަމަށެވެ. ނަމަވެސް މާފުކުރުމަކުން ކިމަށް ލިބުނު ނަފުސާނީ ވޭން ހަނދާނުންނުފިލާނެކަމަށެވެ.

"އެ ފޭރުމަކީ އަހަރެންގެ ހަޔާތުގައި ކުރެވުނު އެންމެ ބިރުވެރި ތަޖުރިބާ،" ކިމް ބުނެފައިވެއެވެ.