އެމެރިކާއާ ވާހަކަދެކެވޭނެކަމުގެ އިތުބާރެއް މިހާރު ނެތްކަމަށް އީރާނުން މިއަދު ބުނެފިއެވެ.

މީގެ ކުރިން އެމެރިކާއާ ދެއްކި ވާހަކަތަކަށްފަހުވެސް އެމެރިކާއިންވަނީ އީރާނަށް އަސްކަރީ ހަމަލާތައްދީ، އީރާނާ ދެކޮޅަށް ދަތިކުރުމުގެ ފިޔަވަޅުތައް އަޅައިފައިކަމަށް އީރާންގެ ރައީސް މަސްއޫދު ޕަޒަޝްކިޔާން (ފޮޓޯ) ވިދާޅުވިއެވެ.

"އެމެރިކާއަށް އަހަރެމެން އެއްވެސް ވަރަކަށް އިތުބާރެއްނުކުރަން. އެމެރިކާއާ އެއްބަސްވުމަކަށް އާދެވޭނީ ކޮން ގޮތަކުންކަމެއް އަހަރެމެންނަކަށް ނޭނގޭ،" އޭނާ ވިދާޅުވިއެވެ.

ޕަޒަޝްކިޔާން މިހެން ވިދާޅުވީ ހުރުމުޒު ކަނޑުއޮޅި ހުޅުވައިށައި އެ ސަރަހައްދުގައި އަލުން ބޯޓު ދަތުރުކުރުން ހުޅުވައިލައި އަދި އީރާންގެ ނިއުކްލިއަ ޕްރޮގްރާމާމެދު މަޝްވަރާކުރުމަށް އެމެރިކާއަށް ހަތް ދުވަހުގެ ޕްލޭނެއް ހުށަހަޅައިފައި އޮއްވައެވެ.

"އަހަރެމެންގެ ޝަރުތުތައް އެމެރިކާއިން ގަބޫލުކޮށްފިނަމަ ހަތް ދުވަހުގެ ތެރޭގައި ހުރުމުޒު އަލުން ހުޅުވައިލެވިދާނެ،" އީރާންގެ ހާރިޖީ ވަޒީރު އައްބާސް އަރާގްޗީ އިއްޔެ ވިދާޅުވިއެވެ.

އެމެރިކާގެ ރައީސް ޑޮނަލްޑް ޓްރަމްޕް މިއަދުވަނީ އެ ޕްލޭނާ ދެކޮޅުހައްދަވައިފައެވެ.

"އީރާނުން އެއްބަސްވުމެއް ހަދަން ވަރަށް ބޮޑަށް ބޭނުންވެގެން އުޅެނީ އީރާނަށް ބޮޑު ގެއްލުމެއްވަމުންދާތީ. އަހަރެންވެސް ޑީލެއް ހަދަން ބޭނުން، އެކަމަކު އެ ޑީލް އީރާނަށް ކަމަކުނުދާނެ،" އޭނާ ވިދާޅުވިއެވެ.