އިސްރާއީލުގެ ސިޔާސަތުތައް ރާވައިފައިވަނީ ފަލަސްތީން ރައްޔިތުން އެ މީހުންގެ ބިމުން ބޭރުކޮށްލަންކަމަށް ހުޅަނގު އައްސޭރި ހިންގާ ފަލަސްތީން އޮތޯރިޓީ (ޕީ.އޭ)ގެ ރައީސް މަހްމޫދު އައްބާސް ވިދާޅުވެއްޖެއެވެ.

އޭނާ މިހެން ވިދާޅުވީ އދ.ގެ އާއްމު މަޖިލީހަށް ފޮނުއްވި ރެކޯޑްކޮށްފައިވާ ވީޑިއޯ ތަގުރީރެއްގައި އިއްޔެއެވެ. އެމެރިކާގެ ނިއު ޔޯކް ސިޓީގައި ހުންނަ އދ.ގެ މައި މަރުކަޒަށް އައްބާސްއަށް ވަޑައިނުގެންނެވުނީ އެމެރިކާއިން އޭނާއަށް ވިސާ ދިނުމަށް ދެކޮޅުހެދީމައެވެ.

"އިސްރާއީލުން ހިފައިފައިވާ ހުޅަނގު އައްސޭރީގައި ޔަހޫދީން ވަޒަންވެރިކުރުވުމާއި އިސްރާއީލުގެ އެހެނިހެން ސިޔާސަތުތަކުގެ ސަބަބުން ފަލަސްތީން ރައްޔިތުން އެ މީހުންގެ ބިންތަކުގައި ތިބުން މިހާރުވަނީ ނުރައްކަލަށް ހުށަހެޅިފައި،" އައްބާސް ވިދާޅުވިއެވެ.

ފަލަސްތީންގެ ބިންތައް ރައްކާތެރިކޮށް، މެދުއިރުމަތީގައި ފަލަސްތީނާއި އިސްރާއީލުގެ މިނިވަން ދެ ދައުލަތް ގާއިމުކުރުމަށް އެހީވުމަށް ބައިނަލްއަގުވާމީ މުޖުތަމައަށް އައްބާސް ގޮވައިލެއްވިއެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އދ.ގެ އާއްމު މަޖިލީހުގައި އިއްޔެ ވާހަކަދައްކަން ފެށުމުން މި ފަހަރުވެސް ގިނަ އަދަދެއްގެ ގައުމުތަކުގެ މަންދޫބުން އެ ބައްދަލުވުން ދޫކޮށް ދިޔައެވެ.

ނަތަންޔާހޫ އިއްޔެ އދ.ގެ އާއްމު ބައްދަލުވުމުގައި ބުނީ ނަސްލު ނައްތައިލުމުގެ ހަރަކާތެއް ނުވަތަ ޖެނޮސައިޑެއް އިސްރާއީލުން ނުހިންގާކަމަށެވެ.

"އިސްރާއީލުން ޖެނޮސައިޑެއް ނުހިންގާ. އިސްރާއީލުން ޖެނޮސައިޑެއް ހިނގިޔަނުދިނީ،" އޭނާ ބުންޏެވެ.

އދ.އިން އިއްޔެ ނެރުނު ރިޕޯޓެއްގައި ބުނީ ހުޅަނގު އައްސޭރީގައި އިސްރާއީލުން ޔަހޫދީން ވަޒަންވެރިކުރުވުމާއި ހުޅަނގު އައްސޭރީގައި ވަޒަންވެރިކުރުވާ ޔަހޫދީން ފަލަސްތީން ރައްޔިތުންނާ ދެކޮޅަށް ހިންގާ އަނިޔާވެރިކަމާއި ފަލަސްތީން ރައްޔިތުން ގެދޮރުން ބޭރުކޮށްލުމުގެ ސަބަބުން ފަލަސްތީންގެ ދައުލަތެއް ގާއިމުކުރުމުގެ މަޝްރޫއަށްވަނީ ހުރަސްއެޅިފައިކަމަށެވެ.