އައްޑޫ އާއި ފުވައްމުލަކު ސިޓީގައި ފެނަކަ ކޯޕަރޭޝަނުން ފޯރުކޮށްދެމުންދާ ފެނާއި ނަރުދަމާގެ ޚިދުމަތްތައް މާލޭ ވޯޓަރ އެންޑް ސުވަރޭޖް ކޮމްޕެނީ (އެމް.ޑަބްލިޔު.އެސް.ސީ) އަށް ބަދަލުކުރުމާ ގުޅޭ ފްރޭމްވޯކް އެއްބަސްވުމެއްގައި މިއަދު ސޮއިކޮށްފިއެވެ.

މި އެއްބަސްވުމުގައި އެމް.ޑަބްލިޔު.އެސް.ސީގެ ފަރާތުން ސޮއިކުރެއްވީ މެނޭޖިން ޑިރެކްޓަރ ޙުސައިން ފަހުމީއެވެ. ފެނަކަ ކޯޕަރޭޝަންގެ ފަރާތުން، މެނޭޖިން ޑިރެކްޓަރ މުޙައްމަދު އަފީފް ޙުސައިނެވެ.

މި އެއްބަސްވުމަކީ ފެނާއި ނަރުދަމާގެ ޚިދުމަތްތައް މެދުނުކެނޑި، އިތުބާރު ހުރި ގޮތެއްގައި ފޯރުކޮށްދިނުމަށް އިސްކަންދީގެން، ހަރުދަނާ އަދި ދެފުށް ފެންނަ ނިޒާމެއްގެ ދަށުން ޚިދުމަތްތައް ބަދަލުކުރުމަށްޓަކައި އެކުލަވައިލި އެއްބަސްވުމެއް ކަމަށް އެމް.ޑަބްލިޔު.އެސް.ސީން ބުނެއެވެ.

"މި ބަދަލުގެ ދަށުން، ކަމާގުޅޭ އޮޕަރޭޝަންތަކާއި، އިންފްރާސްޓްރަކްޗަރާއި ވަސީލަތްތަކުގެ އިތުރުން، ހިނގަމުންދާ މަޝްރޫޢުތަކާއި، ކަސްޓަމަރުންގެ ރެކޯޑުތަކާއި، އެއްބަސްވުންތަކާއި، އިންވެންޓްރީ އަދި އެހެނިހެން ޒިންމާތައް، ކަނޑައެޅިފައިވާ އުސޫލުތަކުގެ ދަށުން ޔަގީންކުރުމަށްފަހު އެމް.ޑަބްލިޔު.އެސް.ސީއާ ޙަވާލުކުރެވޭނެއެވެ." އެމް.ޑަބްލިޔު.އެސް.ސީގެ ބަޔާނެއްގައިވެއެވެ.

"މި ބަދަލުގެ މަރުޙަލާގައި، އައްޑޫ ސިޓީ އާއި ފުވައްމުލަކު ސިޓީގެ ރައްޔިތުންނަށް ފޯރުކޮށްދޭ ފެނާއި ނަރުދަމާގެ ޚިދުމަތުގެ ފެންވަރު ހިފަހައްޓައި، ލިޔެކިޔުންތަކާއެކު ތަރުތީބުކޮށް ޚިދުމަތްތައް ޙަވާލުކުރުމުގެ މަސައްކަތުގައި އެމް.ޑަބްލިޔު.އެސް.ސީ އާއި ފެނަކަ ގުޅިގެން ގާތުން މަސައްކަތް ކުރަމުންދާނެއެވެ."