އިންޑިއާގެ ވެރިރަށް ނިއު ދިއްލީގެ ޕާކެއްގައި 17 އަހަރުގެ އަންހެން ކުއްޖަކު ގޭންގް ރޭޕްކޮށްލުމުން އާއްމުންނަށް ހުޅުވައިލައިފައި ހުންނަ ޕާކްތަކަށް އިރުއޮއްސުމަށްފަހު ވަނުން މަނާކޮށްފިއެވެ.
އާސްތާ ކޫންޖް ޕާކްގައި މި ދިޔަ ހޯމަ ދުވަހު އެ ކުއްޖާ ރޭޕްކޮށްލީ އެ ކުއްޖާގެ ލޯބިވެރިޔާއާއެކު ހުއްޓައި، ފުލުހުންކަމަށް ހެދިގެން އައި ތިން މީހުން ލޯބިވެރިޔާ ހިފަހައްޓައިފައި، ކުއްޖާ އެކަހެރި ސަރަހައްދަކަށް ގެންގޮސްފައެވެ.
ރޭޕްކުރުމުގައި ބައިވެރިވި ތިން މީހުން މިހާރުވަނީ ކޯޓު އަމުރެއްގެ ދަށުން ހައްޔަރުކޮށްފައެވެ.
ފުލުހުންވަނީ 12 ހެކިވެރިންގެ ހެކި ބަސް ނަގައިފައެވެ.
"ޕާކްތަކުގައި ހުންނަ އަނދިރި ތަންތަނާއި ރަނގަޅަށް ނުދިއްލާ ހުންނަ ތަންތަން ފާހަގަކޮށް، އަލިކުރަން ޖެހޭ ތަންތަނުގައި ފްލަޑްލައިޓް ހަރުކުރާނަން،" އޮފިޝަލަކު ބުންޏެވެ. ފްލަޑްލައިޓަކީ ފުޅާކޮށް ފެތުރޭ ވަރުގަދަ އައްޔެއް ހުންނަ ކަރަންޓުން ދިއްލޭ ބައްތިއެވެ.
މީގެ އިތުރުން ރަސްމީ އިދާރާތަކުން މިހާރު ކުރަން ނިންމައިފައިވާ ކަންތައްތަކުގެ ތެރޭގައި ފޯރިމަރާ މީހުން އެ މީހުންގެ މަސައްކަތް ރަނގަޅަށް ކުރޭތޯ ބެލުންވެސް ހިމެނެއެވެ.
މި ފިޔަވަޅުތައް އަޅަން ނިންމިޔަސް އާސްތާ ކޫންޖް ޕާކް ކައިރީގައި ހުންނަ ލޭޑީ ޝްރީ ރާމް ކޮލެޖްގެ ދަރިވަރުން ސުވާލު އުފެއްދީ އަންހެނުންގެ ހަރަކާތްތެރިކަން ހަނިކުރުމުން މި ފަދަ މައްސަލަތައް ހައްލުކުރެވޭނެތޯއެވެ.
"އަންހެނުންގެ ހަރަކާތްތެރިކަން ހަނިކުރުމަކުން އެ މީހުން ރައްކާތެރިއެއް ނުކުރެވޭނެ،" އެ ކޮލެޖްގެ ދަރިވަރަކު ބުންޏެވެ.
advertisment
