ކިރުގެ އުފެއްދުންތަކަށް އިންޑިއާގައި މަޝްހޫރު "އަމުލް" ބްރޭންޑްގެ ޕްރޮޑަކްޓްތައް އެސްޓީއޯ އިން ތައާރަފްކޮށްފިއެވެ.

ހުޅުމާލޭ ސިންތެޓިކް ޓްރެކްގައި މިހާރު ކުރިއަށްދާ ހޮޓެލް އޭޝިއާ އެގްޒިބިޝަންގައި ހުރި އެސްޓީއޯގެ ސްޓޯލްގައި "އަމުލް" ބްރޭންޑްގެ ޕްރޮޑަކްޓްތައް އިއްޔެ ތައާރަފު ކޮށްދެއްވީ އެސްޓީއޯގެ އެކްސްކޯ މެންބަރުންނެވެ.

އެސްޓީއޯ އިން ބުނީ އަމުލްގެ އުފެއްދުންތަކުގެ ތެރޭގައި ހިމެނޭ ކިރާ ބަޓަރާއި ޗީޒް އަދި އައިސްކްރީމްގެ އެކި ބާވަތްތައް އެސްޓީއޯ ޕީޕަލްސް ޗޮއިސްއިން ލިބެން ހުންނާނެ ކަމަށެވެ. އަދި އަމުލްގެ ޕްރޮޑަކްޓްތައް ބޭނުންކޮށްގެން ތައްޔާރުކުރެވޭ ފޮނިކާތަކެއްޗާއި އައިސްކްރީމް އެސްޓީއޯ ސްޓޯލުން ލިބެން ހުންނާނެ ކަމަށެވެ.

"އަމުލްއަކީ އިންޑިޔާގެ ކިރުގެ އުފެއްދުންތަކަށް ހާއްސަ ބޮޑު ބްރޭންޑެކެވެ. މި ނަމުގެ އަސްލު މާނައަކީ އާނަންދު މިލްކް ޔޫނިއަން ލިމިޓެޓް އެވެ. އަދި ބްރޭންޑް މުޅި ދުނިޔޭގައިވެސް މަޝްހޫރުވެފައި ވަނީ ދަ ޓޭސްޓް އޮފް އިންޑިޔާގެ ގޮތުގައެވެ." އެސްޓީއޯ އިން ބުނެއެވެ.

އެސްޓީއޯ ސްޓޯލަށް ޒިޔާރަތް ކުރާ މީހުންނަށް ހާއްސަކޮށްގެން ކޮފީ ސްޓޭޓްގެ ހޮވާލެވޭ ބުއިންތަކާއެކު ޕޮރޮމޯޝަނަލް ހަރަކާތްތަކުގެ ގޮތުގައި "ރެޖިސްޓަރ އެންޑް ވިން"ގެ ނަމުގައި ހަރަކާތެއް މި އެގްޒިބިޝަންގައި ކުރިއަށްގެންދެއެވެ. މި ހަރަކާތް ކުރިއަށްދާނީ އެސްޓީއޯ ސްޓޯލްގައި ރަޖިސްޓްރީކުރާ މީހުންގެ މެދުގައެވެ. ކޮންމެ ދުވަހަކުވެސް މި އެންމެންގެ ތެރެއިން ނަސީބުވެރިއަކު ގުރުއަތުން ހޮވައި އިނާމުދޭނެއެވެ.

އަދި "ފޮލޯއެންޑް ވިން" ހަރަކާތުގައި އެސްޓީއޯ ޕީޕަލްސް ޗޮއިސް ޕޭޖް ފޮލޯކޮށްގެން ހޮވާ ނަސީބުވެރިއަކަށް ޑިޝްވޮޝަރ އެއްލިބުމުގެ ފުރުސަތު ފަހިވެގެންދާނެއެވެ.

ހޮޓަލް އޭޝިއާ އެގްޒިބިޝަން ކުރިއަށްދާނީ މާދަމާގެ ނިޔަލަށެވެ.­