މޯލްޑިވިއަން އިން ވެލާނާ އިންޓަނޭޝަނަލް އެއާޕޯޓުގައި އަޕްގްރޭޑް ކުރި ސީޕްލޭން ޓާމިނަލް މިއަދު ހުޅުވައިފިއެވެ.
ޖުމްލަ 15،000 އަކަފޫޓަށް ވުރެ ބޮޑު ސަރަހައްދެއް އިތުރުކޮށް، ދިވެހީންގެ މެހެމާންދާރީ އާއި ރާއްޖޭގެ ރީތިކަން ސިފަކޮށްދޭ ފަރުމާއަކަށް ބިނާކޮށްފައިވާ މި ސީޕްލޭން ޓާމިނަލް ހުޅުއްވައިދެއްވީ ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީނެވެ.
މި ބަދަލުގެ މައިގަނޑު ހިއްސާއަކީ ބޮޑުކޮށް އިތުރުކޮށްފައިވާ ހުވަނދުމާ ލައުންޖެވެ. މި ލައުންޖުގެ ޖާގަ ވަނީ ކުރިއަށް ވުރެ ދެގުނައަށް ބޮޑުކޮށް، ޚިދުމަތްތައް ރަނގަޅުކޮށްފައެވެ. މި ޓާމިނަލްގައި ޕްރިމިއަމް އަދި ސީއައިޕީ ފެސިލިޓީތައް ވެސް ވަނީ ޚާއްޞަކޮށްފައެވެ.
މި ޓާމިނަލްގެ އެންމެ ފާހަގަކޮށްލެވޭ އެއް ބަޔަކީ އައު އައުޓްޑޯ ސަރަހައްދެވެ. ފަސޭހަ ގޮނޑިތަކާއި، މިނީ ގޮލްފް ކުޅޭ ސަރަހައްދެއް ހިމެނޭ މި ބައިގައި ސީޕްލޭން އޮޕަރޭޝަންސްތައް ބަލައިލަން ތިބެވޭނެއެވެ.
ފެތުރުވެރިންނަށް ޚިދުމަތް ދިނުމުގެ އިތުރުން، އާ ސްޓާފް ކެންޓީނެއް ވެސް ވަނީ ގާއިމްކޮށްފައެވެ.
މި ޓާމިނަލް ހުޅުވުމުގެ ރަސްމިއްޔާތުގައި ވާހަކަދައްކަވަމުން މޯލްޑިވިއަންގެ މެނޭޖިން ޑިރެކްޓަރ އިބްރާހިމް އިޔާސް ވިދާޅުވީ، މި އަޕްގްރޭޑަކީ ފަސިންޖަރުންނަށް ދެވޭ ޚިދުމަތް އެންމެ މަތީ ފެންވަރަށް ގެންދިއުމަށް މޯލްޑިވިއަން އިން ކުރާ މަސައްކަތުގެ ރަމްޒެއް ކަމަށެވެ. މިއީ ކުންފުނީގެ ވަސީލަތްތައް، ޚިދުމަތްތައް އަދި ފްލީޓް އަޕްގްރޭޑް ކުރުމުގެ ސްޓްރެޓެޖީގެ ބައެއް ކަމަށްވެސް އޭނާ ވިދާޅުވިއެވެ.
މި މަޝްރޫއުއަކީ ސަރުކާރުން ރާއްޖޭގެ ސީޕްލޭން ޚިދުމަތް ހަރުދަނާ ކުރުމަށް ކުރާ މަސައްކަތުގެ ބައެއް ވެސްމެއެވެ.
advertisment
