އެތެރޭގެ އުދުހުމެއްގައި ނޭޕާލުގެ ވެރިރަށް ކަތުމަންޑޫން ބަދްރަޕޫރަށް ޖެއްސި އޭ.ޓީ.އާރް-72-500 މަރުކާގެ ޓާބޯޕްރޮޕް ފަސިންޖަރު މަތިންދާބޯޓެއް ހުކުރު ދުވަހުގެ ރޭ ރަންވޭ މަތިން ކައްސައިލި ހާދިސާއެއް ތަހުގީގުކުރަން ފަށައިފިއެވެ.

"ފްލައިޓް ޔޫ.4-901، ރަޖިސްޓްރީ ނަންބަރު 9.އެން-އޭ.އެމް.އެފްގައި ތިބީ 51 ފަސިންޖަރުންނާއި ހަތަރު ފަޅުވެރިން. އެންމެން ވެސް ސަލާމަތްވި،" ފްލައިޓް އޮޕަރޭޓްކުރާ ނޭޕާލްގެ ބުއްދާ އެއާ އެއާލައިނުން ބުންޏެވެ.

ރަންވޭއިން ގާތްގަނޑަކަށް 300 މީޓަރު ދުރަށް ކަހައިލައިގެން މަތިންދާބޯޓު އުރުނީ ކުޑަ ކޯރެއް ކައިރީގައިވާ ވިނަގަނޑަކާއި ކިސަޑުގަނޑަކަށެވެ.

މަތިންދާބޯޓުގެ ބުރަފައްޗާއި ދަށްފުށަށް ކުދި އަދި ބޮޑެތި ގެއްލުންތައް ލިބުނެވެ.

މީހުންނަށް އެހީވުމަށް ޓީމުތައް ވަނީ ކުއްލި ހާލަތުގައި ފޮނުވައިފައެވެ. އަދި ފަންނީ ޓީމުތައް ފޮނުވީ ކަތުމަންޑޫންނެވެ.

ހަ މީހުންނަށް ވަނީ ކުދި ޒަހަމްތައް ލިބިފައެވެ. އޭގެ އިތުރުން ކޯ-ޕައިލެޓްގެ ބޮލާއި މޫނުމަތި ޒަހަމްވިއެވެ. އެ އެންމެނަށް ފަރުވާ ދީފައި މިހާރު ވަނީ ދޫކޮށްލައިފައެވެ.

ނޭޕާލްގެ މަދަނީ އުދުހުންތަކާ ބެހޭ އިދާރާގެ ވަގުތީ ޑިރެކްޓަރު ޖެނެރަލް ދޭވް ޗަންދްރާ ލާލް ކަރްން މިހާރު ވަނީ ތަހުގީގު ޓީމުގެ އިސް މީހާގެ ގޮތުގައި ބަދްރަޕޫރަށް ގޮސްފައެވެ.

މި ހާދިސާ ހިނގުމުން އެއާޕޯޓްގެ މަސައްކަތްތައް ވަގުތީ ގޮތުން މެދުކަނޑައިލިއެވެ.

ނޭޕާލުގައި މަތިންދާބޯޓު ވެއްޓުމުގެ ހާދިސާތައް ގިނަ އިރު އެ ހާދިސާތަކުގައިވަނީ އެތައް ބަޔަކު މަރުވެފައެވެ.