ލިޔުންތެރިޔާ: ޑރ. ޢަބްދުﷲ ފާރޫޤް އިބްރާހީމް

ޑރ. ޢަބްދުﷲ ފާރޫޤު އިބްރާހީމް ވަނީ ބެޗްލާރ އޮފް ޝަރީޢާ، އިސްލާމިކް ސްޓަޑީޒުން މާސްޓާސް އަދި ފިޤުހާއި އުޞޫލުލްފިޤުހުން ޕީ.އެޗް.ޑީ ޙާޞިލުކުރައްވައިފައެވެ. ނަވާވީސް އަހަރު ޤާޟީކަން ކުރައްވާފައިވެއެވެ. އިނގިރޭސި، އަރަބި ބަހުން ލިޔުއްވާފައިވާ އިލްމީ ލިޔުންތައް ކޮންފަރެންސްތަކާއި ޖާނަލްތަކުގައި ލިޔުއްވާފައިއެވެ. ދިވެހި ބަހުން ބައެއް ފޮތް ލިޔުއްވައިފައިވެއެވެ. "ރިޔާޟުއްޞާލިޙީން" ނަމަކަށް ކިޔުނު ޙަދީސް ފޮތް ރާއްޖޭގައި ފުރަތަމަ ފަހަރަށް ތަރުޖަމާކުރެއްވީ އޭނާއެވެ. ދިވެހި ރާއްޖެއަށް އިސްލާންދީން އައިގޮތުގެ މައްޗަށް މަޒުމޫނެއް ލިޔަން 1986ގައި މައްކާގެ ވޯލްޑު މުސްލިމު ލީޤުގެ "އައްރާބިޠާ" މައްޖާލާއިން ހުޅުވާލި މުބާރާތުގައި ބައިވެރިވެ އެއްވަނަ ހާސިލުކުރެއްވިއެވެ. ޑުރަގު ކޮންޓްރޯލުގެ މައްޗަށް 2002 ގައި ސައުދިއަރަބިއާގެ ހޯމް މިނިސްޓްރީން ހުޅުވާލި މުބާރާތުގައި ބައިވެރިވެ ފަސްވަނަ ހާސިލުކުރެއްވިއެވެ. 2001 ގެ އެންމެ ރަނގަޅު ކަމަށް ފާހަގަކުރެވުނު މެޖިސްޓުރޭޓެއްގެ ވަނަ ހާސިލުކުރެއްވިއެވެ. ކުރެއްވި އިޖުތިމާޢީ މަސައްކަތުގެ ތެރޭގައި ސ. ހިތަދޫ މޫލެކެޑެ އަވަށު އޮޑައްސަަލު ސަރަހައްދުގައި ޝައިޚު ޙުސަންރަހާގެ ނަންފުޅުން އިސްކޫލެއް ގާއިމު ކުރެއްވިއެވެ.