އެލް ނީނޯގެ ނުރައްކަލާ ގުޅިގެން ބޮލީވިއާގައި ކުއްލި ނުރައްކަލުގެ ހާލަތު އިއުލާންކޮށްފިއެވެ.

ދެކުނު އެމެރިކާ ބައްރުގެ ބޮލީވިއާއިން ވަނީ ހޮނިހިރު ދުވަހު މުޅި ގައުމުގައި ކުއްލި ނުރައްކަލުގެ ހާލަތު އިއުލާނުކޮށްފައެވެ. ސަރުކާރުން ބޭނުންވަނީ އެލް ނީނޯ މޫސުމީ ނިޒާމުގެ އަސަރުތަކާ ދެކޮޅަށް މަސައްކަތްކުރުމަށް އިތުރު ވަސީލަތްތައް ދޫކުރުމަށެވެ.

ރައީސް ރޮޑްރީގޯ ޕާޒް ހޮނިހިރު ދުވަހު ސޮއިކުރެއްވި ގަރާރުގައި، ފެންބޮޑުވުމާއި ހަނަފަސްވުމުގެ އަސަރުކޮށްފައިވާ ސަރަހައްދުތަކަށް އިތުރު ސަލާމަތީ ޓީމުތައް ފޮނުއްވުމަށް ނިންމަވައިފައިވެއެވެ.

"އެލް ނީނޯގެ ސަބަބުން ހަނަފަސްކަމާއި ފެންބޮޑުވުމުގެ ބޮޑެތި އަސަރުތަކެއްކުރާނެ. އަހަރެމެންނަށް ހުރިހާ މުއައްސަސާތަކެއްގެ އެއްބާރުލުން ބޭނުންވޭ،" ޕާޒް ވިދާޅުވިއެވެ.

މި ހަފުތާގައި ނެރުނު ސަރުކާރުގެ ރިޕޯޓަކުން ދައްކާ ގޮތުގައި ބޮލީވިއާގެ ނުވަ ސަރަހައްދުގެ ތެރެއިން ހަ ސަރަހައްދެއްގެ 78،000 އާއިލާއަކަށް މިހާރުވަނީ ހަނަފަސްކަމުގެ އަސަރުކޮށްފައެވެ. އަދި މީގެ ސަބަބުން 75،000 އަށްވުރެ ގިނަ ނާމުސޫފިވަނީ މަރުވެފައެވެ.

ބޮލީވިއާއަށް ފެންބޮޑުވުމުގެ ބޮޑު ނުރައްކަލެއްވެސްވަނީ ކުރިމަތިވެފައެވެ. މި ދިޔަ އަހަރު ޑިސެމްބަރުގައި ސާންތާ ކްރޫޒް ސަރަހައްދުގައި ފެންބޮޑުވެ އެތައް ދޮޅަހެއްގެ ބަޔަކުވަނީ މަރުވެފައެވެ.

ނުރައްކާތެރި މޫސުމީ ބަދަލުތަކުގެ އަސަރު އަވަށްޓެރި ގައުމުތަކަށްވެސްވަނީކޮށްފައެވެ. ޗިލީގެ ވެރިރަށް ސަންތިއާގޯގައި ރެކޯޑު ކުރެވުނީ ތާރީހުގައިވެސް އެންމެ ވާރޭ ގިނަ އޮކްޓޫބަރު މަހެވެ. އަދި އެ މަހު ޕެރޫގައި ވަލުތަކުގައި ރޯވި އަލިފާނުގައި މަދުވެގެން 12 މީހުން މަރުވިއެވެ.

އެލް ނީނޯއަކީ ދުނިޔޭގެ މޫސުމީ ނިޒާމެކެވެ. މިއީ ގާތްގަނޑަކަށް ކޮންމެ ދެ އަހަރަކުން ނުވަތަ ހަތް އަހަރަކުން އެއް ފަހަރު ކުރިމަތިވާ ހާލަތެކެވެ. މިއީ ދުނިޔޭގެ ގުދުރަތީ މޫސުމީ ދައުރުގެ ބައެކެވެ.

އެލް ނީނޯގެ ދުވަސްވަރު ޕެސިފިކް ކަނޑު ހޫނުވެއެވެ. މި ހޫނުވުމުގެ ސަބަބުން ދުނިޔޭގެ ވައިގެ މިސްރާބާއި ވައިގެ ޕްރެޝަރާއި އަދި ވާރޭ ވެހޭ މިންވަރަށް ބަދަލު އާދެއެވެ. މީގެ ސަބަބުން ގިނަ ފަހަރަށް ނުރައްކާތެރި މޫސުމީ ހާލަތްތައް ކުރިމަތިވެއެވެ.

އެލް ނީނޯގެ ބާރުމިން އެކި ދައުރުގައި ތަފާތުވެއެވެ. އަދި މީގެ އަސަރުކުރާ މިންވަރު ބިނާވަނީ އެ ސަރަހައްދެއްގެ މައްޗަށެވެ. އެހެންނަމަވެސް މިހާރު ކުރިމަތިވެފައިވާ އެލް ނީނޯގެ މި ދައުރަކީ ތާރީހުގައިވެސް އެންމެ ބާރުގަދަ ދައުރަށްވުން އެކަށީގެންވެއެވެ.

މި މޫސުމީ ހާލަތް އެންމެ ބާރުގަދަވާނެކަމަށް ބެލެވެނީ މި އަހަރުގެ ނިޔަލަށެވެ. އަދި މީގެ އަސަރުތައް އަންނަ އަހަރާ ހަމައަށް ދެމިގެންދިއުން އެކަށީގެންވެއެވެ.

ސައިންސްވެރިން އިންޒާރު ދޭ ގޮތުގައި އެލް ނީނޯގެ ސަބަބުން ދުނިޔޭގެ އެކި ކަންކޮޅުތަކުން 450،000 އަށްވުރެ ގިނަ މީހުން މަރުވުން އެކަށީގެންވެއެވެ. އަދި މީގެ އެންމެ ބޮޑު ތަކުލީފެއް އުފުލަންޖެހޭނީ ފަގީރު ގައުމުތަކަށެވެ.

މި ދިޔަ ސެޕްޓެމްބަރު ކުރީކޮޅު އދ.ގެ މޫސުމީ އިދާރާ، ވޯލްޑް މީޓިއޮރޮލޮޖިކަލް އޯގަނައިޒޭޝަން (ޑަބްލިޔު.އެމް.އޯ) ރިޕޯޓުކުރި ގޮތުގައި އަންނަ އަހަރުގެ ފެބްރުއަރީގެ ނިޔަލަށް އެލް ނީނޯ ކުރިއަށްދިއުމުގެ ފުރުސަތު ގާތްގަނޑަކަށް 100 ޕަސެންޓް އެބަ އޮތެވެ.