ފުޅާވަމުންދާ ލަގްޒަރީ ފަތުރުވެރިކަމާއި ކޯޕަރޭޓް ދަތުރުފަތުރުގެ ބާޒާރަށް ހިދުމަތް ދޭން ރާއްޖޭގެ ގައުމީ އެއާލައިން މޯލްޑިވިއަނުން ކިންގް އެއާ 360 މަރުކާގެ މަތިންދާބޯޓެއް ގެނެސްފިއެވެ. މިހެންވެ މޯލްޑިވިއަން ވެގެން މި ދިޔައީ މި މަރުކާގެ މަތިންދާބޯޓެއް ރާއްޖެއަށް ތައާރަފުކުރި އެއާލައިނަށެވެ.

މި ފިޔަވަޅަކީ އެއާލައިން ފުޅާކުރަން އެޅި މުހިންމު ފިޔަވަޅެކެވެ. އަދި މިކަމުގެ ސަބަބުން އެއާލައިންގެ އޮޕަރޭޝަނަލް ގާބިލުކަން އިތުރަށް ވަރުގަދަވެގެންދެއެވެ.

އަށް ފަސިންޖަރުންގެ ޖާގަ ހިމެނޭ މި ބޯޓަކީ ފުޅާވަމުންދާ ލަގްޒަރީ ފަތުރުވެރިކަމާއި ކޯޕަރޭޓް ދަތުރުފަތުރުގެ ބާޒާރަށް ހިދުމަތް ދޭ އުޅަނދެކެވެ. މޯލްޑިވިއަނުން މި ބޯޓު ބޭނުންކުރާނީ ނިލާ ކޯރަލް އައިލެންޑް ރިސޯޓަށް ހާއްސަ ވައިގެ ދަތުރުފަތުރުގެ ހިދުމަތް ފޯރުކޮށްދިނުމަށެވެ. އަދި ރާއްޖޭގެ އެތެރޭގައި އަމިއްލަ ޗާޓަރު ހިދުމަތްތަކަށްވެސް މޯލްޑިވިއަނުން މި ބޯޓު ދޫކުރާނެއެވެ. މީގެ އިތުރުން ކިންގް އެއާ 360 އިން ރާއްޖޭގެ އެކި ކަންކޮޅުތަކަށްވެސް އަމިއްލަ އަދި ސީދާ ދަތުރުތައް ފޯރުކޮށްދޭނެއެވެ.

މި މަތިންދާބޯޓުގެ އޮޕަރޭޝަނާއެކު ކަނެކްޓިން ޓްރާންސްފާތަކަށް އިންތިޒާރުނުކޮށް، ފަސިންޖަރުން ބޭނުންވާ ވަގުތެއްގައި ދަތުރުކުރެވޭނެއެވެ.

މިއީ ދެ އިންޖީނުލީ ޓާބޯޕްރޮޕް މަތިންދާބޯޓެކެވެ. އިތުބާރުކުރެވޭ، އަދި ދުވެލި ހަލުވިކަމަށް މަޝްހޫރު ބޯޓެކެވެ. އަދި މި ބޯޓުގައި ފެންވަރު ރަނގަޅު ކެބިނެއް ހިމެނެއެވެ. މޯލްޑިވިއަނުން ބުނާ ގޮތުގައި ފަސިންޖަރުންނަށް ރައްކާތެރި އަދި އަރާމު ދަތުރުތަކެއް މި ބޯޓުން ލިބިގެންދާނެއެވެ. އަދި އެއާލައިނުން މިހާރުވެސް ފޯރުކޮށްދޭ ފެންވަރުގެ ހިދުމަތުގެ މިންގަނޑުތައް ދަމަހައްޓައިނެއެވެ.

"ކިންގް އެއާ 360 މަތިންދާބޯޓު އައުމަކީ މޯލްޑިވިއަނަށް ލިބުނު ފަހުރުވެރި ވަގުތެއް. ރާއްޖޭގައި މި ބޯޓު އޮޕަރޭޓްކުރާ ފުރަތަމަ ފަރާތުގެ ގޮތުން، އަޅުގަނޑުމެން މި ތައާރަފުކުރަނީ އަޅުގަނޑުމެންގެ މެހުމާނުންނަށް ހާއްސަ ވައިގެ ދަތުރުފަތުރުގެ އާ މިންގަނޑެއް،" މޯލްޑިވިއަންގެ މެނޭޖިންގ ޑިރެކްޓަރ އިބްރާހިމް އިޔާސް އިއްޔެ ވިދާޅުވިއެވެ.

އޭނާ ވިދާޅުވި ގޮތުގައި މި ފިޔަވަޅުން ރަމްޒުކޮށްދެނީ މަތީ ފެންވަރުގެ ދަތުރުފަތުރުގެ ތަޖުރިބާ ފޯރުކޮށްދިނުމަށް އެއާލައިނުން ދޭ އަހައްމިއްޔަތުކަމެވެ. މޯލްޑިވިއަނުން ބޭނުންވަނީ ދަތުރުވެރިންނަށް މިއަށްވުރެ އަމިއްލަ އަދި ލުއިފަސޭހަ ހިދުމަތްތަކެއް ފޯރުކޮށްދިނުމަށްކަމަށް އޭނާ ވިދާޅުވިއެވެ. އަދި ޒިޔާރަތްކުރާ ފަރާތްތަކަށް މި ބޯޓުގެ ސަބަބުން ލިބޭނެ ލުއިފަސޭހަކަމާމެދު އޭނާ ޔަގީންކަން ފާޅުކުރެއްވިއެވެ.

ކިންގް އެއާ 360 މަރުކާގެ މަތިންދާބޯޓު ތައާރަފުކުރުމަކީ އެތެރޭގެ އުދުހުންތަކުގެ ގުޅުން ރަނގަޅުކުރަން މޯލްޑިވިއަނުންކުރަމުންދާ މަސައްކަތްތަކަށް ލިބޭ އެހީތެރިކަމެކެވެ. އަދި މިއީ ދުނިޔޭގެ އެންމެ ކުރިއަރައިފައިވައި އެއް ލަގްޒަރީ ފަތުރުވެރިކަމުގެ މަންޒިލުގެ ގޮތުގައި ރާއްޖެ އޮތް މަގާމަށްވެސް ލިބޭ އެހީތެރިކަމެކެވެ.

އައިލެންޑް އޭވިއޭޝަން ސާވިސަސް ލިމިޓެޑުން ހިންގައި މޯލްޑިވިއަނަކީ ރާއްޖޭގެ ގައުމީ އެއާލައިނެވެ. އެއާލައިނުން އެތެރޭގެ އުދުހުންތަކާއި ސީޕްލޭން އަދި ބައިނަލްއަގްވާމީ ދަތުރުތައްކުރެއެވެ. މޯލްޑިވިއަނުން ރާއްޖޭގެ އެކި ރަށްތައް ގުޅުވައިދެއެވެ. އަދި ރާއްޖެއިން ބޭރުގެ މަންޒިލްތަކަށްވެސް ދަތުރުކުރެއެވެ. އެއާލައިންގެ ހިދުމަތްތަކުން ފަތުރުވެރިކަމާއި ވިޔަފާރިއާއި އަދި އާންމު ދަތުރުފަތުރަށް އެހީތެރިކަން ލިބިގެންދެއެވެ.