މޮރޮކޯއަށް ފުރަތަމަ ފަހަރަށް އަންހެން ބޮޑުވަޒީރަކު އައްޔަންކޮށްފިއެވެ.

ރަސްގެފާނު މުހައްމަދު ހައެއް އިއްޔެވަނީ ފާތިމާ އައްޒަހްރާ އަލްމަންސޫރީ އެ މަގާމަށް އައްޔަންކުރައްވައި، އާ ސަރުކާރެއް އެކުލަވައިލެއްވުމުގެ މަސްއޫލިއްޔަތު ހަވާލުކުރައްވައިފައެވެ.

"އަހަރެމެންގެ ގައުމުގެ ތާރީހުގައި ސަރުކާރު ހިންގުމުގެ ޒިންމާއާ ފުރަތަމަ ފަހަރަށް އަންހެނަކު މި ހަވާލުވަނީ. މިއީ ހަމައެކަނި އަހަރެންނަށް ލިބުނު ފަހުރެއް ނޫން. މިއީ މޮރޮކޯގެ އެންމެހައި އަންހެނުންނަށްވެސް ލިބުނު ފަހުރެއް. ވަރަށް ތާރީހީ ކަމެއް،" ފާތިމާ (ފޮޓޯ) ވިދާޅުވިއެވެ.

އުމުރުން 50 އަހަރުގެ ފާތިމާއަކީ މަރާކެޝް ސިޓީގެ މޭޔަރުގެ އިތުރުން މަގާމުން ވަކިވެވަޑައިގަންނަވާ އާބަން ޕްލޭނިން ވަޒީރެވެ.

މި މަހު 23 ގައި ބޭއްވި އާއްމު އިންތިހާބުގައި އޭނާގެ އޮތެންޓިސިޓީ އެންޑް މޮޑަނިޓީ ޕާޓީ (ޕީއޭއެމް)އިންވަނީ ގާނޫނު ހަދާ މަޖިލީހުގެ ދަށުގޭގެ 395 ގޮނޑީގެ ތެރެއިން 97 ގޮނޑި ކާމިޔާބުކޮށްފައެވެ. ނަމަވެސް މިއީ އަގުލަބިއްޔަތަށް ބޭނުންވާ 198 ގޮނޑިއަށްވުރެ މަދު އަދަދެއްކަމަށްވުމުން އޭނާއަށް ޖެހިވަޑައިގަންނަވާނީ ކޯލިޝަނެއް ހެއްދެވުމަށެވެ.

އޭނާގެ ސަރުކާރުން ބަލަހައްޓާނެ ކަންތައްތަކުގެ ތެރޭގައި 2030 ވަނަ އަހަރުގެ ފީފާ ވޯލްޑް ކަޕާ ގުޅޭ ބޮޑެތި އިންވެސްޓްމަންޓްތައް ހިމެނެއެވެ. އެ މުބާރާތް މޮރޮކޯއިން ބާއްވަނީ ސްޕެއިން އަދި ޕޯޗުގަލްއާ ގުޅިގެންނެވެ.

މީގެ އިތުރުން ފާތިމާއަކީ ޓިއުނީޝިއާގެ ނަޖްލާ ބޫދަން އަދި އެ ގައުމުގެ މިހާރުގެ ބޮޑުވަޒީރު ސާރާ ޒައުފަރާނީއަށްފަހު އަރަބި ސަރުކާރެއްގެ އިސްވެރިޔަކަށް ހަމަޖެއްސި ތިންވަނަ އަންހެން ބޭފުޅެވެ.