ދުނިޔޭގައި ކެންސަރު ޖެހޭ ކޮންމެ އަށް މީހުންގެ ތެރެއިން އެކަކަށް ކެންސަރު ޖެހެނީ ޖަރާސީމީ އިންފެކްޝަންތަކުގެ ސަބަބުންކަމަށް ދުނިޔޭގެ ސިއްހަތު ޖަމިއްޔާ، ވޯލްޑް ހެލްތް އޯގަނައިޒޭޝަން (ޑަބްލިއު.އެޗް.އޯ)އިން ބުނެފިއެވެ.

އދ.ގެ އެ އިދާރާގެ ކެންސަރު ދިރާސާކުރާ ބައިނަލްއަގުވާމީ އެޖެންސީ، އިންޓަނޭޝަނަލް އެޖެންސީ ފޮ ރިސާޗް އޮން ކެންސަރު (އައި.އޭ.އާރު.ސީ)އިން ހެދި އާ ދިރާސާއަކުން ދެއްކި ގޮތުގައި، 2024 ގައި މުޅި ދުނިޔޭގައި އަލަށް ކެންސަރު ޖެހުނު މީހުންގެ ތެރެއިން ކޮންމެ އަށް މީހުންގެ ތެރެއިން އެކަކަށް ނުވަތަ 2.3 މިލިއަން މީހުންނަށް ކެންސަރު ޖެހިފައިވަނީ ތަފާތު ޖަރާސީމީ އިންފެކްޝަންތަކުގެ ސަބަބުންނެވެ.

"ލޭންސެޓް އޮންކޮލޮޖީ" ޖާނަލްގައި ޝާއިއުކޮށްފައިވާ މި ދިރާސާއަކީ އިންފެކްޝަންތަކާ ގުޅިގެން ޖެހޭ ކެންސަރާ ބެހޭ ގޮތުން މިހާތަނަށް އެކުލަވައިލި އެންމެ ފުރިހަމަ ދިރާސާއެވެ.

ދިރާސާގައި ރިސާޗަރުންވަނީ އިންސާނުންނަށް ކެންސަރު ޖެހުމަށް މަގުފަހިކުރާ 12 ޖަރާސީމީ އެޖެންޓެއް (ވައިރަސްތަކާއި، ޕެރަސައިޓްތަކުގެ އިތުރުން ބެކްޓީރިއާއެއް) ދިރާސާކޮށްފައެވެ. މީގެ ތެރެއިން ބަނޑުގައި އަށަގަންނަ ބެކްޓީރިއާއެއްކަމަށްވާ ހެލިކޯބެކްޓާ ޕައިލޯރީގެ ސަބަބުން 2024 ގައި 760,000 މީހުންނަށް ބަނޑުގެ ކެންސަރު (ގެސްޓްރިކް ކެންސަރު) ޖެހުނުކަން ހާމަވިއެވެ.

ދެން އެންމެ ގިނައިން ކެންސަރު ޖެހެން މަގުފަހިވީ އެޗްޕީވީ ވައިރަސްގެ ސަބަބުންނެވެ. އެއީ ރަހިމުގެ ދޮރަށް ޖެހޭ ކެންސަރު ހިމެނޭހެން 750,000 ކޭސްއެވެ.

ދިރާސާއިންވަނީ ސަރަހައްދީ ގޮތުން ބޮޑެތި ފަރަގުތަކެއް ހުރިކަން ފާހަގަކޮށްފައެވެ. އިންފެކްޝަންތަކާ ގުޅިގެން ޖެހޭ ކެންސަރުގެ 42 ޕަސެންޓް ކޭސް ފެނިފައިވަނީ އިރުމަތީ އޭޝިއާއިންނެވެ. އަދި ސަބް-ސަހަރާ އެފްރިކާގައިވެސް މީގެ ނުރައްކާ ބޮޑެވެ.

އާމްދަނީ މަދުންނާއި މެދުމިނެއްގެ އާމްދަނީ ލިބޭ ގައުމުތަކުގައި ސިއްހީ ހިދުމަތްތައް ހަމަހަމަކޮށް ނުލިބުމުގެ ސަބަބުން މުޅި ދުނިޔޭގެ އިންފެކްޝަން ކެންސަރުގެ 75 ޕަސެންޓް ނުވަތަ ހަތަރުބައިކުޅަ ތިންބައި ކޭސް ހިއްސާކުރަނީ އެ ގައުމުތަކުންނެވެ.

"މީގެ ތެރެއިން ގިނަ ވައިރަސްތައް ގުނަވަންތަކުގައި އާލާވުމަށްޓަކައި ސެލްތަކުގެ ރައްކާތެރިކަމުގެ ނިޒާމަށް ބުރޫއަރުވައިލައި. އަދި ހެލިކޯބެކްޓާ ޕައިލޯރީ ފަދަ ބެކްޓީރިއާތަކުން ދިގު މުއްދަތަކަށް އިންފްލެމޭޝަން (ދުޅަވުން) އުފައްދައި ކެންސަރަށް މަގުފަހިކުރޭ،" ދިރާސާގެ އިސް ރިސާޗަރު، ޑޮކްޓަރު ގޭރީ ކްލިފޯޑް ބުންޏެވެ.

ނަމަވެސް އެންމެ އާންމު ފަސް ޖަރާސީމީ އެޖެންޓުގެ ތެރެއިން ހަތަރު އެޖެންޓަކުން ރައްކާތެރިވުމުގެ ވަސީލަތްތައްކަމަށްވާ އެޗްޕީވީ ސްކްރީނިންގްއާއި ވެކްސިން، ހެޕަޓައިޓިސް ބީ ވެކްސިން އަދި ހެޕަޓައިޓިސް ސީއަށް ރައްކާތެރި އިންޖެކްޝަން ބޭނުންކުރެވެން އެބަހުރިކަމަށް އޭނާ ބުންޏެވެ.