ޕާކިސްތާނުން އަފްޣާނިސްތާނަށް ދަތުރުކުރި ލޮރީއެއް ފުރޮޅައިލައި 10 ކުޑަކުދިންނާއި ފަސް އަންހެނުން ހިމެނޭ ގޮތަށް އަފްޣާނިސްތާންގެ 22 ރެފިއުޖީން މަރުވެއްޖެއެވެ.

އަފްޣާނިސްތާންގެ ލަގްމަން ޕްރޮވިންސްގައި ހިނގި މި ހާދިސާގައި ވެރިރަށް ކާބުލް އާއި ނަންގަރްހަރް ޕްރޮވިންސާ ގުޅޭ ހަލިމަގަކުން ޑިޗްއަކަށް ނުވަތަ ފެން ހިންދާ ކޯރަކަށް ހޮނިހިރު ދުވަހު ލޮރީ ވެއްޓުމުން 36 މީހުން ޒަހަމް ވެސް ވި ކަމަށް އޮފިޝަލުން ބުންޏެވެ.

ޕްރޮވިންސްގެ ގަވަރުނަރުގެ ތަރުޖަމާނު އަބްދުލް މާލިކު ނިޔާޒީ ބުނީ ލޮރީގައި ތިބި ހުރިހާ ފަސިންޖަރުންނަކީ ޕާކިސްތާންގައި ދިރިއުޅޭ ލިޔެކިޔުން ނެތް އަފްޣާނިސްތާން ރައްޔިތުންނާ ދެކޮޅަށް ޕާކިސްތާނުން ފިޔަވަޅު އަޅަން ފެށުމުން އަފްޣާނިސްތާނަށް އެނބުރި އައި ރެފިއުޖީން ކަމަށެވެ.

"ޒަހަމް ވި މީހުން ގެންދިޔައީ ނަންގަރްހަރް ޕްރޮވިންސްގައި ހުރި ހޮސްޕިޓަލްތަކަށް،" އޭނާ ބުންޏެވެ.

ޕްރޮވިންސްގެ އާއްމު ސިއްހަތާ ބެހޭ ޑިރެކްޓަރު އަމީނުﷲ ޝަރީފު ބުނީ ލޮރީ ޑިޗަށް ވެއްޓުނީ ޑްރައިވަރަށް ނިދިޖެހުމުން ކަމަށް ރިޕޯޓްކޮށްފައިވާ ކަމަށެވެ.

މި ހާދިސާ މި ހިނގީ އެތައް ލައްކަ އަފްޣާނިސްތާން ރެފިއުޖީން ޑިޕޯޓްކުރުމުގެ ކެމްޕޭނެއް ޕާކިސްތާނުން 2023 ގައި ހިންގަން ފެށި ފަހުންނެވެ. އަދި ޕާކިސްތާންގެ ތޯލިބާން ޖަމާއަތް އަފްޣާނިސްތާންގައި ތިބެގެން ޕާކިސްތާނަށް ހަމަލާދެމުންދާތީ ދެ ގައުމުގެ ގުޅުން ގޯސްވެ، ހަމަލާ ބަދަލުކުރަމުންދާ ދަނޑިވަޅެއްގައެވެ.