ނައިޖީރިއާގެ ބޯޑަރާ ގުޅޭ ޗާޑް ފެންގަނޑު ސަރަހައްދުގައި އެމެރިކާއާއެކު ހިންގި އޮޕަރޭޝަނެއްގައި އިސްލާމިކް ސްޓޭޓް (އައި.އެސް)ގެ 175 ހަނގުރާމަވެރިން މަރައިލައިފިއެވެ.
އޮފިޝަލުން އިއްޔެ ބުނީ ނައިޖީރިއާ އާއި އެމެރިކާއިން އަމާޒުކުރީ، އިސްލާމީ ގިނަ ގައުމުތަކުން ޓެރަރިސްޓް ޖަމާއަތެއް ކަމަށް ކަނޑައަޅައިފައިވާ އައި.އެސްގެ ހަނގުރާމަވެރިންގެ ކޭމްޕްތަކާއި ހަތިޔާރު ގުދަންތަކާއި އަދި ނައިޖީރިއާގެ ޓެރަރިސްޓް ޖަމާއަތް ބޯކޯ ހަރާމުން ވަކިވެ، އައި.އެސްއާ ގުޅުނު ގްރޫޕެއް ކަމަށްވާ އައިސިލް އެފިލިއޭޓް އިން ވެސްޓް އެފްރިކާ (އައި.އެސް.ޑަބްލިޔު.އޭ.ޕީ)އަށް ހަތިޔާރު ސަޕްލައިކޮށްދޭ މަގުތަކަށް ކަމަށެވެ.
ނައިޖީރިއާގެ އަސްކަރިއްޔާގެ ތަރުޖަމާނު މޭޖާ ޖެނެރަލް ސަމައިލާ އޫބާ ބުނީ އެމެރިކާއާ ގުޅިގެން ހިންގި އޮޕަރޭޝަންގެ އަމާޒަކީ ނައިޖީރިއާގެ ހުރިހާ ސަރަހައްދެއްގައި ފިލައިގެން އުޅޭ ޓެރަރިސްޓުން މަރައިލުން ކަމަށެވެ.
"ހަނގުރާމަވެރިންގެ އިސް ދެ ކޮމާންޑަރުން ވެސް މަރައިލިން،" އޭނާ ބުންޏެވެ.
އެފްރިކާގައި ބައިތިއްބާފައިވާ އެމެރިކާ ސިފައިންގެ އިދާރާއިން ބުނީ މި އޮޕަރޭޝަންގައި އެމެރިކާގެ އަދި ނައިޖީރިއާގެ ސިފައިންގެ މީހަކު މަރު ނުވާ ކަމަށެވެ.
"ދުނިޔޭގައި ޓެރަރިޒަމްގެ މައި މަރުކަޒަކީ އެފްރިކާ،" އެ އިދާރާގެ ކޮމާންޑަރު ޖެނެރަލް ޑެގްވިން އެންޑަސަން ބުންޏެވެ.
އޭނާ ބުނީ އެފްރިކާގައި ހަރަކާތްތެރިވާ ހަތިޔާރު އެޅި ގްރޫޕްތަކާ ދެކޮޅަށް ބައިނަލްއަގުވާމީ މުޖުތަމައުން ވަރުގަދައަށް ގުޅިގެން މަސައްކަތްކުރަން ޖެހޭ ކަމަށެވެ.
advertisment
