އިންޑިއާގެ އޮޑިޝާ ސްޓޭޓްގައި މަރުވި އަންހެނެއްގެ އެކައުންޓުން ފައިސާ ދޫނުކުރުމުން އޭނާގެ ކޮއްކޮ އޭނާގެ ގަބުރު ކޮނެގެން އެ ގަބުރު ބޭންކަށް ގެންގޮސްފިއެވެ.

ކިއޮންޖްހަރު އަވަށުގެ ރަށްފުށުގައި ދިރިއުޅުނު ކަލްރާ މުންދާ އުމުރުން 56 އަހަރުގައި މަރުވީ މި ދިޔަ ޖަނަވަރީ 26 ގައެވެ. ނަމަވެސް މަރުވިކަމުގެ ސެޓްފިކެޓް ނެތުމުން އޭނާގެ ކޮއްކޮ، އުމުރުން 50 އަހަރުގެ ޖީތޫއަށް އޮޑިޝާ ގްރަމީން ބޭންކްގެ ކަލްރާގެ އެކައުންޓްގައި ހުރި 20،000 ރުޕީސް (211 ޑޮލަރު ނުވަތަ 3،253ރ.) ބޭންކުން ދުލެއް ނުކުރިއެވެ.

"ބޭންކުން ތަކުރާރުކޮށް އަހަރެން އަނބުރާ ފޮނުވައިލި. އަހަރެން ބުނިން ދައްތަ މަރުވެއްޖެއޭ. އެކަމަކު ބޭންކުން ތަކުރާރުކޮށް ބުނަމުން ދިޔައީ ބޭންކަށް ދައްތަ ގެންނާށޭ،" ޖީތޫ ބުންޏެވެ.

ނަމަވެސް ބޭންކުން އެ ވާހަކަ ދޮގުކުރިއެވެ. ބޭންކުން ބުނީ ޖީތޫގެ ފަރާތުން އެދުނީ ކަލްރާގެ މަރުގެ ސެޓްފިކެޓް ގެނައުމަށް ކަމަށެވެ.

ޖީތޫ މާޔޫސްވެގެން އެންމެ ފަހުން ކުރިކަމަކީ ކަލްރާގެ ގަބުރު ކޮނެގެން ނެގީއެވެ. އަދި ފޮތިގަނޑަކަށް ލައިގެން ކޮނޑަށް ލައިގެން ތިން ކިލޯމީޓަރު ދުރުގައި ހުރި ބޭންކުގެ މަލިޕޮސި ގޮތްޕަށް ހިނގައިފައި ދިޔައީއެވެ. މި މައްސަލަ ސޯޝަލް މީޑިއާގައި ވައިރަލްވީ އެ މަންޒަރުގެ ވީޑިއޯއެއް މީހަކު އެކްސްގައި ހިއްސާކުރީމައެވެ.

ބޭންކްގެ މުވައްޒަފުންނާއި މަންޒަރު ދުށް މީހުންނަށް ލިބުނީ ސިހުމެކެވެ. އެއީ ކަލްރާ މަރުވެފައިވާކަން ސާބިތުކުރުމަށް އޭނާގެ ގަބުރު ބޭންކް ދޮށުގައި ޖީތޫ ބޭއްވުމުންނެވެ.

ބޭންކުން ވަގުތުން ފުލުހުންނަށް ގުޅިއެވެ. އަދި ފަހުން ވަނީ ރަސްމީ އިދާރާތަކުގެ ބެލުމުގެ ދަށުން ގަބުރު އަލުން ވަޅުލައިފައެވެ.

ބޭންކްގެ އޮފިޝަލުން ބުނީ އެ މީހުން ކުށެއް ނުކުރާ ކަމަށެވެ.
"ގަވައިދުތަކާ އެއްގޮތްވާ ގޮތުގެ މަތިން އަހަރެމެން އެދުނީ ރަނގަޅު ލިޔެކިޔުންތައް ހުށަހެޅުމަށް. ފަހަރުގައި މުއާމަލާތް ކުރެވުނު ގޮތުން އޮޅުން އެރީ ކަންނޭނގެ،" ބޭންކްގެ އޮފިޝަލެއް ބުންޏެވެ.

ވީޑިއޯ ވައިރަލްވުމާއެކު އަވަށުގެ އޮފިޝަލުން ވަނީ މައްސަލަ ހައްލުކޮށްދީފައެވެ. އެ ގޮތުން ދައްތަގެ މަރުގެ ސެޓްފިކެޓާއި ޖީތޫއަކީ ދައްތަގެ ވާރިސްކަން ފަދަ ލިޔެކިޔުންތައް ފުރިހަމަކޮށްދީފައި، ދައްތަގެ އެކައުންޓްގައި ހުރި ފައިސާ ޖީތޫއަށް ލިބިދިނުމަށް މަގުފަހިކޮށްދިނެވެ.

އޮފިޝަލުން ބުނީ މި ހާދިސާ މިހެން ހިނގުމުގައި ތިން ކަމެއް ފާހަގަކުރެވުނު ކަމަށެވެ. އެއް ކަމަކީ ބޭންކްތަކުގެ ހަރުކަށި ގަވައިދުތަކެވެ. އަނެއް ކަމަކީ އޮފިޝަލުން އާއްމުންނާ މުއާމަލާތްކުރާ ގޮތް ރަނގަޅު ނުވުމެވެ. ދެން އަނެއް ކަމަކީ ރަށްފުށުގައި މީހުންގެ ހޭލުންތެރިކަން ދަށްވުމާއި ރަސްމީ ލިޔެކިޔުން ނުލިބުމުގެ މައްސަލައެވެ.

"މި ހާދިސާއިން ހާމަވީ އިންސާނިއްޔަތުކަމާއެކު މި މައްސަލަ ހައްލުކޮށްދިނުމަށް އޮފިޝަލުން ނުކުޅެދުނުކަން،" އޮފިޝަލަކު އިއުތިރާފުވިއެވެ.