ލުބްނާނާއި އިސްރާއީލާ ދެމެދު މި ދިޔަ އަހަރު ގާއިމުކުރި ހަނގުރާމަ ހުއްޓައިލުމުގެ މުއާހަދާ ދެމެހެއްޓުމަށްޓަކައި މަދަނީ ފެންވަރުގައި މަޝްވަރާތައް ބާއްވަން މިއަދު ނިންމައިފިއެވެ. މިއީ އެތައް ދަހަރެއް ފަހުން ދެ ގައުމުން މަދަނީ ފެންވަރުގައި ބާއްވާ ފުރަތަމަ މަޝްވަރާތަކެވެ.

ލުބްނާންގެ މަންދޫބަކީ އެ ގައުމުން ކުރިން އެމެރިކާއަށް ކަނޑައަޅައިފައި ހުރި އެމްބެސެޑަރު ސައިމަން ކަރަމްއެވެ. އިސްރާއީލުގެ މަންދޫބަކީ އެ ގައުމުގެ ގައުމީ ސަލާމަތާ ބެހޭ ކައުންސިލްގެ މެންބަރު ޔޫރީ ރެސްނިކްއެވެ. ދެ މީހުން ވަނީ ދެ ގައުމުގެ ބޯޑަރުގައި ބައްދަލުކޮށް، މަޝްވަރާތައް ކުރިއަށް ގެންދާނެ ގޮތަކާ ބެހޭ ގޮތުން ވާހަކަ ދައްކައިފައެވެ.

"މިއީ އިސްރާއީލާއި ލުބްނާނާ ދެމެދު ގުޅުން ގާއިމުކޮށް އިގުތިސާދީ ގޮތުން އެއްބާރުލުމަށް ފުރަތަމައިން ބާއްވާ އަސާސީ ވާހަކަތަކެއް،" އިސްރާއީލުގެ ހާރިޖިއްޔާއިން ބުންޏެވެ.

ދެ ގައުމުގެ މި ނިންމުން ވެގެންދާނީ ލުބްނާން ރައްޔިތުން ހިތްހަމަނުޖެހޭނެ ކަމަކަށް ކަމަށް ލުބްނާންގެ ސިޔާސީ ތަޖުރިބާކާރުން ބުންޏެވެ.

"ސަބަބަކީ ލުބްނާންގެ ގިނަ ބަޔަކު އަދިވެސް ދެކެނީ އިސްރާއީލަކީ ދުޝްމިނެއް ކަމަށް،" ލުބްނާންގެ ސިޔާސީ ތަޖުރިބާކާރެއް ބުންޏެވެ.

ނަމަވެސް މި ވާހަކަތައް ކުރިއަށް ގެންދިއުމަށް ތާއީދުކުރާ ފަރާތްތަކުން ބުނީ މި މަޝްވަރާތަކުގެ ސަބަބުން ލުބްނާނާއި އިސްރާއީލާ ދެމެދު ޑިޕްލޮމެޓިކް ގުޅުންތައް ފުޅާވުމާއި ބޯޑަރުގައި ސުލްހަ ގާއިމު ކުރުމުގެ ފުރުސަތު އިތުރުވެގެންދާނެ ކަމަށެވެ.