ގޮވާތަކެތީގެ ސަބަބުން މި ދިޔަ އަހަރު 12،000 ކުޑަކުދިން މަރުވެ ނުވަތަ ޒަހަމްވެފައިވާ ކަމަށާއި މިއީ ރެކޯޑެއް ކަމަށް، މީހުން ސިއްސުވައިލައި ފަދަ އާ ރިޕޯޓަކުން ހާމަވެއްޖެއެވެ.
"ކުޑަކުދިން ކުޅޭ ޕާކުތައް މިހާރު ބަދަލުވަމުންދަނީ މަރުގެ މައިދާންތަކަކަށް،" ކުޑަކުދިންގެ ދުޅަހެޔޮކަން ރައްކާތެރި ކުރަން ދުނިޔޭގައި އުފެއްދި ފުރަތަމަ ޖަމިއްޔާ، ސޭވް ދަ ޗިލްރަން (ކުޑަކުދިން ރައްކާތެރިކުރޭ)އިން ބުންޏެވެ.
މަރުވި ކުދިންގެ ތެރެއިން ގާތްގަނޑަކަށް 70 ޕަސެންޓް މަރުވީ ބޮމާއި މިސައިލާއި އަދި އެހެނިހެން ގޮވާތަކެތިންނެވެ.
ރިޕޯޓުން ހާމަވަނީ އިންސާނުން އުޅޭ ޒަމާނީ މާހައުލު ނުވަތަ އާބަން ތަންތަނުގައި ހިނގާ ހަނގުރާމަތަކުގެ ސަބަބުން މަރުވަމުންދާ ކުޑަކުދިންގެ އަދަދު އިތުރުވަމުންދާ ކަމެވެ. އޭގެ ތެރޭގައި ޣައްޒާ، ޔޫކްރެއިން މިޔަންމާ، ސޫދާން އަދި ސޫރިޔާ ވަކިން ހާއްސަކޮށް ފާހަގަކޮށްފައިވެއެވެ.
"ކުޑަކުދިން ނިދައި، ކުޅެ އުޅޭ އަދި ކިޔަވާ ތަންތަނަށް މިސައިލްތައް ވެއްޓެނީ. ރައްކާތެރިކަން އެންމެ ޔަގީންކަން އޮންނަ ތަންތަން އެ ބަދަލުވަނީ މަރުގެ ކޮށިތަކަކަށް،" ހިލޭސާބަހަށް މަސައްކަތްކުރާ އެ ޖަމިއްޔާގެ އިންސާނީ ކަންތައްތަކާ ބެހޭ އިސް މުސްތަޝާރު ނަރްމިނާ ޝްޓްރިޝެނެޓްސް ބުންޏެވެ.
advertisment
