އީރާނަށް މި ދަނޑިވަޅު އިތުރު ހަމަލާތަކެއް ދީފައިނެކަމުގެ އިޝާރާތެއް އެމެރިކާގެ ރައީސް ޑޮނަލްޑް ޓްރަމްޕް ދެއްވައިފިއެވެ.

މިއީ، އޭނާގެ ރިޔާސީ ދައުރުގެ މެދުތެރޭގައި އަންނަ މަހު ތިނެއްގައި ބާއްވައި އާއްމު އިންތިހާބުގެ ކުރިން އީރާނަށް ހަމަލާނުދޭނެކަމަށް މި މަހު އަށެއްގައި ވިދާޅުވި ނަމަވެސްމެއެވެ.

އީރާނަށް އިތުރު ހަމަލާތަކެއް މި ދަނޑިވަޅުގައި ދީފައިނެކަމަށް ޓްރަމްޕް (ފޮޓޯ) އިއްޔެ އިޝާރާތްކުރެއްވީ، އިސްރާއީލާ ގުޅިގެން އެމެރިކާއިން އީރާނާ ދެކޮޅަށް ކުރަމުންދާ ހަނގުރާމައަށް ފުޅާ ދާއިރާގައި ރައްދު ދޭނެކަމަށް އީރާނުން ބުނަމުންދާ ދަނޑިވަޅެއްގައެވެ.

އީރާނާއި އެމެރިކާއާ ދެމެދު އޮތް ހަތުރުވެރިކަމަށް ޑިޕްލޮމެޓިކް ހައްލެއް ގެންނަން މަސައްކަތްތައް ކުރިއަށްދިޔަ ނަމަވެސް، އީރާނާ ދެކޮޅަށް އަވަސް މުސްތަގުބަލެއްގައި އިތުރު އަސްކަރީ ފިޔަވަޅުތަކެއް އަޅައިފައިނެކަމަށް ޓްރަމްޕް އިޝާރާތްކުރެއްވުމާއެކު އަލުން ހަމަލާތައް ފެށިދާނެކަމުގެ ބިރުވެރިކަން މިހާރުވަނީ ބޮޑުވެފައެވެ.

"އަހަރެމެންވާނީ އެ މީހުންނަށް ވަރުގަދަ އެތިފަހަރެއް ދީފައި. އަދި އިތުރަށްވެސް އެ ފަދައިން އަހަރެމެން ކަންތައް ކޮށްފައިނަން،" އީރާނާ ދެކޮޅަށް އެމެރިކާއިން ހިންގި އަސްކަރީ އޮޕަރޭޝަންތަކަށް އިޝާރާތްކުރައްވައި އިއްޔެ ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވިއެވެ.

ބުދަ ދުވަހު އޭނާ ވިދާޅުވެފައިވަނީ "ނަތީޖާއެއް ވަރަށް އަވަހަށް ފެނިގެންދާނެ"ކަމަށެވެ.

އީރާނުން ބުނީ އެމެރިކާއިން ދޭ އިތުރު ހަމަލާއެއްގެ ސަބަބުން ގަލްފުގެ އެކި ކަންކޮޅުތަކުގައި ހުރި އެމެރިކާގެ އަސްކަރީ މަރުކަޒުތަކަށާއި އުސްތުރާތީޖީ އިންފްރާސްޓްރަކްޗަރަށް އަމާޒުކޮށް ބަދަލުހިފުމުގެ ފުޅާ ހަރަކާތްތަކެއް އީރާނުން ފަށައިފައިނެކަމަށެވެ.

"އަނެއްކާވެސް ނަސީބު ޓެސްޓުކޮށްލަން ބޭނުންވޭތަ؟ މަރުހަބާ. އެކަމަކު ސަމާލުވާތި؛ އަހަރެމެން އަދި ނުދީ ހުރި ރައްދުތައް އެބަހުރި،" އީރާނުގެ ހާރިޖީ ވަޒީރު އައްބާސް އަރާގްޗީ ވިދާޅުވިއެވެ.

މި ނުތަނަވަސްކަން އުފެދިފައި މި ވަނީ ދުނިޔޭގެ ތެލުގެ ހިދުމަތްތަކަށް މުހިންމު މަގެއްކަމަށްވާ ހުރުމުޒު ކަނޑުއޮޅީގައި ހިނގަމުންދާ ހަމަނުޖެހުންތަކާވެސް ގުޅިގެންނެވެ.

ޑިޕްލޮމެޓިކް މުއާމަލާތްތައް އީރާނާއި އެމެރިކާގެ ދެމެދުގައި ކުރިއަށްދިޔަ ނަމަވެސް ދަތިކުރުމުގެ ފިޔަވަޅުތަކާއި ކަނޑުގެ ދަތުރުފަތުރާއި އަދި އީރާނުގެ ނިއުކްލިއަ ޕްރޮގްރާމާ ގުޅޭ ގޮތުން ދެ ގައުމުގެ ދެމެދުގައިވަނީ ބޮޑެތި ހިޔާލުތަފާތުވުންތައް އުފެދިފައެވެ.

ބައިނަލްއަގްވާމީ ތެޔޮ އުފުލުމުގެ މުހިންމު މަގެއްކަމަށްވާ ހުރުމުޒު ކަނޑުއޮޅީގެ ކޮންޓްރޯލާމެދުވެސް އެމެރިކާއާއި އީރާނާ ދެމެދުވަނީ ކުރިމަތިލުންތަކެއް ހިނގައިފައެވެ. އީރާނުގެ އިސްލާމީ އިންގިލާބީ ލަޝްކަރުން އިއްޔެ ބުނީ ފާރިސީ ކަނޑު ސަރަހައްދުގައި ހިނގި ހާދިސާތަކެއްގައި ހަތް އުޅަނދަކަށް ހަމަލާ ދީ ނުވަތަ އެ އުޅަނދުފަހަރަށް ގެއްލުންތަކެއް ލިބިފައިވައިކަމަށެވެ. އަދި އީރާން އިތުރަށް ރުޅިއެރުވުމުގެ އަމަލުތައް ނުހިންގުމަށް އެމެރިކާއަށް އިންޒާރުދިނެވެ.