ޗީފް އޮފް ޑިފެންސް ފޯސްގެ މަގާމުގައި ހުންނެވި މޭޖަރ ޖެނެރަލް ޢަބްދުﷲ ޝަމާލްގެ ރޭންކު ލެފްޓިނެންޓް ޖެނެރަލްގެ ރޭންކަށް އުފުއްލައްވައި، ވައިސް ޗީފް އޮފް ޑިފެންސް ފޯސްގެ މަގާމުގައި ހުންނެވި ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަތީފު، މޭޖަރ ޖެނެރަލްގެ ރޭންކަށް މިއަދު މަތިކުރައްވައިފިއެވެ.

މި ދެ ބަދަލުގެ އިތުރުން، ސިފައިންގެ އެންމެ މަތީ ވެރިޔާ އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ވަނީ ބްރިގޭޑިއަރ ޖެނެރަލްގެ ރޭންކުގައި މިހާތަނަށް ތިއްބެވި އެމްއެންޑީއެފް މެރިން ކޯގެ ކޮމަޑާންޓް، ވައިޘް ވަޙީދާއި ސަރވިސް ކޯގެ ކޮމަޑާންޓް ޙާމިދު ޝަފީޤު، މޭޖަރ ޖެނެރަލްގެ ރޭންކަށް މަތިކުރައްވައިފައެވެ.

ބަންޑާރަކޮށީގައި ބޭއްވި ޚާއްޞަ ރަސްމިއްޔާތެއްގައި އެމްއެންޑީއެފްގެ އެންމެ އިސް ހަތަރު އޮފިސަރުންނަށް މަޤާމުގެ ރޭންކް ހަވާލުކޮށްދެއްވީ ރައީސުލްޖުމްހޫރިއްޔާ އެވެ. މަޤާމުގެ ލިޔުން ޙަވާލުކޮށްދެއްވީ ދިފާޢީ ވަޒީރު މާރިޔާ އަޙްމަދު ދީދީއެވެ.

މިއަދު ދެއްވި މަގާމުގެ ކުރިއެރުމާއެކު، އުމުރުން 54 އަހަރުގެ ޝަމާލް ވެގެންދިޔައީ ދިވެހި އަސްކަރީ ތާރީޚުގައި، ލެފްޓިނެންޓް ޖެނެރަލްގެ ރޭންކު ލިބިވަޑައިގެންނެވި ދެވަނަ އޮފިސަރަށެވެ. މީގެ ކުރިން އެ ރޭންކު ލިބިވަޑައިގެންފައި ވަނީ ރައީސް މައުމޫންގެ ޑިފެންސް މިނިސްޓަރުގެ ނައިބު އަންބަރީ އަބްދުއްސައްތާރަށެވެ.

މިހާރު 130 އަހަރު ވެފައިވާ ދިވެހި އަސްކަރިއްޔާގެ އެންމެ މަތީ ރޭންކަކީ ޖެނެރަލް އެވެ. އެ މަގާމު މިހާތަނަށް އަދާކުރައްވައިފައި ވަނީ ކުރީގެ ރައީސުލްޖުމްހޫރިއްޔާ ޖެނެރަލް މައުމޫން އަބްދުލްގައްޔޫމެވެ.

• ވިދާޅުވުމަށް

130 އަހަރަށްފަހު ދިވެހި ސިފައިންގެ ހުރިހައި ރޭންކަކަށް ބޭފުޅުން