ޑެންމާކާ އެމެރިކާއިން ގާއިމުކުރި ސަލާމަތީ އެއްބަސްވުން ގްރީންލޭންޑުގެ ގާނޫނު ހަދާ މަޖިލީހުން ފާސްކޮށްފައެވެ.

ގްރީންލޭންޑަކީ ޑެންމާކުގެ ދަށުން އަމިއްލަ ވެރިކަމެއް ކުރަމުންދާ ސަރަހައްދެކެވެ. މި އެއްބަސްވުމުގެ އަމާޒަކީ އާކްޓިކް އަދި އުތުރު އެޓްލާންޓިކް ސަރަހައްދުގެ ސަލާމަތާއި ރައްކާތެރިކަން ވަރުގަދަކުރުމެވެ.

އިއްޔެ މި އެއްބަސްވުން ފާސްވީ 16 ވޯޓުންނެވެ. ހަތް މެންބަރަކު ވޯޓުގައި ބައިވެރިއެއްނުވެއެވެ.

އެމެރިކާގެ ރައީސް ޑޮނަލްޑް ޓްރަމްޕް، ޑެންމާކުގެ ބޮޑުވަޒީރު މެޓެ ފްރެޑެރިކްސެން އަދި ގްރީންލޭންޑުގެ ބޮޑުވަޒީރު ޖެންސް-ފްރެޑެރިކް ނީލްސެންވަނީ މި ދިޔަ ސެޕްޓެމްބަރު މަހު މި އެއްބަސްވުމުގައި ސޮއިކުރައްވައިފައެވެ. ސޮއިކުރެއްވުން އޮތީ އެމެރިކާގެ ނިއު ޔޯކް ސިޓީގައި ބޭއްވި އދ.ގެ އާންމު މަޖިލީހުގެ ހަވާސާގައެވެ.

މި އެއްބަސްވުން އެކުލަވައިލީ އެތައް މަހެއްގެ ސިއްރު މަޝްވަރާތަކަށްފަހުއެވެ. ގްރީންލޭންޑް ހިފާނެކަމަށް ވިދާޅުވެ ޓްރަމްޕް ތަކުރާރުކޮށް ދެއްވި އިންޒާރުތަކާ ގުޅިގެން މަޝްރަހުވަނީ ވަރަށް ބޮޑަށް ގޯސްވެފައެވެ.

ގްރީންލޭންޑުގެ ހާރިޖީ ވަޒީރު މޫތޭ އެގެޑޭވަނީ މި އެއްބަސްވުން ފާސްވުމަށް މަރުހަބާ ވިދާޅުވެފައެވެ. އޭނާ އެ ކަން ސިފަކުރެއްވީ އަމިއްލަ ވެރިކަންކުރާ ގްރީންލޭންޑުން އެޅި އިތުރު މުހިންމު ފިޔަވަޅެއްގެ ގޮތުގައެވެ.

"މި ހިސާބަށް އާދެވުނު މަގަކީ ރައްޔިތުންގެ ގޮތުގައި އަހަރެމެންނަށް އުނދަގޫ މަގެއް. ނަމަވެސް އަހަރެމެން ތިބީ އަސާސީ އުސޫލުތަކުގެ މަތީގައި ސާބިތުވެ. އަހަރެމެން ހިޔާރުކުރީ މަޝްވަރާގެ މަގު. އަދި އަހަރެމެން ވަނީ އަހަރެމެންގެ ގައުމީ މަސްލަހަތުތަކުގެ މަސްއޫލިއްޔަތު ނަގައިފައި،" އޭނާ ވިދާޅުވިއެވެ.

"މިއީ އަހަރެމެން އެންމެންނައި ގުޅިފައިވައި ކަމެއް. އަހަރެމެން ލޯބިވައި ގްރީންލޭންޑައި ގުޅިފައިވައި ކަމެއް. މިއީ އަހަރެމެންގެ ސަލާމަތާއި ރައްކާތެރިކަން. މިއީ އަހަރެމެންގެ އަމިއްލަ ކުރިމަގު ބައްޓަންކުރުމުގެ ހައްގައިވެސް ގުޅިފައިވައި ކަމެއް،" އޭނާ އިތުރަށް ވިދާޅުވިއެވެ.

ގްރީންލޭންޑް އޮންނަނީ ޔޫރަޕާއި އުތުރު އެމެރިކާ ބައްރާ ދޭތެރޭގައެވެ. މިއީ ދުނިޔޭގެ އެންމެ ބޮޑު ޖަޒީރާއެވެ. އެ ތަނުގެ އާބާދީއަކީ ގާތްގަނޑަކަށް 57،000 މީހުންނެވެ. އެ ޖަޒީރާއަކީ ގުދުރަތީ ވަސީލަތްތަކުން މުއްސަނދި ތަނެކެވެ.

މި ދިޔަ އަހަރު ޓްރަމްޕްވަނީ ގްރީންލޭންޑް ނުހިފާނެކަމަށް ނުނިންމަވައިނެކަމަށް ވިދާޅުވެފައެވެ. އޭނާގެ ވާހަކަތަކުގެ ސަބަބުން ގްރީންލޭންޑުގެ ރައްޔިތުންގެ މެދުގައި ބިރުވެރިކަން އުފެދުނެވެ. ހިޔާލު ހޯދުމުގެ ވޯޓުތަކުން ދެއްކި ގޮތުގައި ގްރީންލޭންޑުގެ ގިނަ ރައްޔިތުން އެމެރިކާގެ ނުފޫޒާ ދެކޮޅެވެ.

އެއްބަސްވުމުގެ ދަށުން އެމެރިކާއަށް ގްރީންލޭންޑުގައި އިތުރު އަސްކަރީ މަރުކަޒުތައް ގާއިމުކުރުމުގެ ހުއްދަ ލިބެއެވެ. އަދި ގްރީންލޭންޑުގެ ހުޅަނގުއުތުރުގައި އޮންނަ އެމެރިކާގެ އެކަހެރި އަސްކަރީ މަރުކަޒެއްކަމަށްވާ ޕިޓުފިކް ސްޕޭސް ބޭސް ތަރައްގީކޮށް، އެ ތަނުގެ ހަރަކާތްތައް ފުޅާކުރުމުގެ ހުއްދަވެސް އެމެރިކާއަށް ލިބިގެންދެއެވެ.

މި އެއްބަސްވުމުގެ ދަށުން ގްރީންލޭންޑް އޮންނާނީ ޑެންމާކުގެ ދަށުގައެވެ. ފަހުން ގްރީންލޭންޑަށް މިނިވަންކަން ލިބުނުކަމަށްވިޔަސް މި އެއްބަސްވުމަށް އަމަލުކުރަމުންދާނެއެވެ.

އެއްބަސްވުމަށް އަމަލުކުރަން ފަށާނީ ޑެންމާކާއި ގްރީންލޭންޑުގެ ގާނޫނު ހަދާ މަޖިލީހުން ހުއްދަ ދިނުމުންނެވެ. ޑެންމާކުގެ ގާނޫނު ހަދާ މަޖިލީހުން މި މަހުގެ ފަހުކޮޅު މި އެއްބަސްވުމާމެދު ބަހުސްކުރާނެކަމަށް ބެލެވެއެވެ. އެމެރިކާގެ ގާނޫނު ހަދާ މަޖިލީހުގެ މަތިގެކަމަށްވާ ސެނެޓުން މި އެއްބަސްވުން ފާސްކުރާކަށް ނުޖެހެއެވެ.