ތައިލެންޑުގައި އޮންނަ ކުޑަކުދީންގެ ފުޓުބޯޅަ މުބާރާތެއްގައި ވާދަކުރަން "އެޑްވެންޗަރ ފުޓްބޯލް އެކަޑަމީ"ގެ ތިން ޓީމެއް މިރޭ ތައިލެންޑަށް ފުރާނެއެވެ.
މި މަހުގެ 3-4 އަށް އޮންނަ "ތައިލެންޑު އިންޓަނޭޝަނަލް ޔޫތު ކަޕު"ގައި އެޑްވެންޗަރ ފުޓްބޯލް އެކަޑަމީން ބައިވެރިވަނީ 10 އަހަރުން ދަށާއި 12 އަހަރުން ދަށާއި 13 އަހަރުން ދަށުގެ އުމުރުފުރާގައެވެ. މި ތިން ޓީމުގައި ޖުމްލަ 32 ކުޅުންތެރިން ހިމެނެއެވެ.
މި ކުޅުންތެރިންނާއި ކޯޗުންނާއި ބެލެނިވެރިންނާއެކު ޖުމްލަ 64 މެމްބަރުންގެ ޓީމެއް މި ދަތުރުގައި ބައިވެރިވެއެވެ.
ހުޅުމާލޭގައި ހިންގާ "އެޑްވެންޗަރ ފުޓްބޯލް އެކަޑަމީ" އަކީ ކުރީގެ މަޝްހޫރު ޑިފެންޑަރު މުހައްމަދު ޖަމީލް (ޖަމްބޭ)ގެ އެކަޑަމީއެކެވެ.
މިރޭ ތައިލެންޑަށް ފުރުމުގެ ކުރިން އެއާޕޯޓުގައި ހުރެ ވާހަކަ ދައްކަމުން ޖަމްބޭ ބުނީ ތައިލެންޑުގެ ޓީމުތަކާއި ބޭރުގެ އިތުރު ޓީމުތައް ވެސް ދެ ދުވަހުގެ މި މުބާރާތުގައި ވާދަކުރާ ކަމަށާއި މިއީ ކުޅުންތެރިންނަށް މުހިންމު ތަޖުރިބާއަކަށް ވާނެ ކަމަށެވެ.
މި ދަތުރުގެ ހުރިހާ ކަމެއް ވެސް ހަމަޖައްސަނީ ބެލެނިވެރިން އަމިއްލައަށް ކަމަށް ވެސް ޖަމްބޭ ބުންޏެވެ.
"ހަތަރު ކުއްޖެއްގެ ބެލެނިވެރިންނަށް ޗުއްޓީ ނުލިބިގެން ނުދެވޭ. އެހެން ހުރިހާ ކުދިންގެ ބެލެނިވެރިން މި ދަތުރުގައި ބައިވެރިވޭ،" ޖަމްބޭ ބުންޏެވެ.