ކައުނުގައި އެއްޗެއް ހިނގަން ލެއްވެވި ބުރަށް ފަލަކޭ ކިޔޭ
ދައުރުވާހައި އެއްޗަކަށް ފަލަކެއް މި ކައުނަށް ލެއްވިޔޭ

އުޑު ބުރުޖު ތަކަކުން ޢަދަދު ބާރައިގެ ގޮތުގައި ލެއްވެވީ
ގުޑުމަކުން ކުޑަވެސް ތަފާތެއް ބުރުޖަކަށް ނާރާނެޔޭ

ބުރުޖަކީ ދިވެހީން ކިޔާ ރާއްސޭ އޮޅުން ނެތި ސާފުވާ
ފުރުޞަތެއް އޮޅުމަށް ނުވާހައި ގިނަ ލިޔުން ހެކިދޭނެޔޭ

ބާރަ ބުރުޖުގެ އިމު ތެރޭ ލެއްވީ އަށާވީސް މަންޒިލޭ
ނާރައޭ އޮޅުމެއް އެކަމުގައި ހޯދުމުން ފެންނާނެޔޭ

ޙަމްލު،ސައުރު،އެއީ،އިނގޭތޯ މޭސަ،އިސަބަ، ގެ ޢަރަބިނަން
ރަމްޒުކޮށްފައިވާ ނަމެއް އޭގައި ނުވާކަން ނޯޅެޔޭ

ފަލަކަކީ، އޯބިޓްގެ ނަން އިނގިރޭސި ބަހުގައި އޮތް އިނގޭ
ނަލަވިހައި ގުރަހައިގެތަރިތައް ފަލަކުގައިހިނގަމުން ދެޔޭ

މަންޒިލަށް ފަލަކީ ގޮތުން ދިވެހީން ނަކަތް ކިޔަމުން ދެޔޭ
ދަންނަ މީހުން ނުވަތަ ނިޔަމިން ތަރިތަކުން މަގު ހޯދަޔޭ

ބިމުގެ މިޞްރާބަށް ގަހާ، ފަރުގަދި، ކިޔާ ފަދައިން އުޑުން
އިމުގެ މިޞްރާބުން އިރާ ހަނދު ވީ، ދިމާ ދެނެގަނެވެޔޭ

އެގޮތަކީ ޖައުޒާގެ މިއަހެލި، ނަކަތުގައި ހަނދުވޭ ބުނުން
އެގޮތުގައި ދޯންޏެއް، ގަހާއިން އެބަފެނޭ ބުނެވޭނެޔޭ

ފަލަކަކީ ތިންސައްތަ ހައްޓިން ދަރަޖަ ލިބިފައިވާ ބުރެއް
ފަލަކު ބާރަ ބަޔަށް ބެހީމާ އެއްބަޔަށް ބުރުޖޭ ކިޔޭ

ކަން މިފަދައިން ސާފުކޮށް ހުއްޓާ ނުބައިކޮށް މާނަކޮށް
ނަން ނުބައިކޮށް ތަރުޖަމާ ކުރުމުން އެކަންކަން އޮޅިދެޔޭ