ހުޅަނގު އައްސޭރީގައި ހަނގުރާމަކުރަން އިސްރާއީލުގެ ހައްދުފަހަނަޅައިފައިވާ މާލީ ވަޒީރު ބެޒަލެލް ސްމޮޓްރިޗް މިއަދު ގޮވައިލައިފިއެވެ.

"ގައްޒާއަށް ހަދައިލި ގޮތް ހަދައިލަން އަހަރެމެން ޖޫޑީއާ އަދި ސަމާރީއާ (އިރުމަތީ ގުދުސް ނުލައި ހުޅަނގު އައްސޭރި)ގައި ހަނގުރާމަކުރުން ބޭނުންތެރިކަމަށް އަހަރެންނަށް ފެނޭ،" އޭނާ ބުންޏެވެ.

އިސްރާއީލުން ގައްޒާގައި ހިންގި ދެ އަހަރުވީ ހަނގުރާމަ ފަދަ ސިފައިންގެ ހަމަލާތަކެއް ހިންގަން އޭނާ ގޮވައިލިއެވެ. އެއީ ހުޅަނގު އައްސޭރި ހިންގާ ޕަލަސްތީނިއަން އޮތޯރިޓީ (ޕީ.އޭ) ރޫޅައިލުމަށެވެ.

"ޕީ.އޭއަކީ ޓެރަރިސްޓް އިދާރާއެއް،" ސްމޮޓްރިޗް ބުންޏެވެ.

ފަލަސްތީންގެ ހާރިޖީ ވުޒާރާއިން އޭނާގެ ބުނުންތައް ކުށްވެރިކުރިއެވެ. އެ ވުޒާރާއިން ބުނީ ސްމޮޓްރިޗްގެ ކޮމެންޓްތަކަކީ ހުޅަނގު އައްސޭރި އިސްރާއީލުގެ ބަޔަކަށް ހަދައިލުމަށާއި އެ ބިމުން ފަލަސްތީން ރައްޔިތުން ބޭރުކޮށްލުމަށާއި އަދި ހުޅަނގު އައްސޭރީގައި މިހާރުވެސް ކުރަމުންދާ ހަނގުރާމަ ފުޅާކޮށްލަން ގޮވައިލި ގޮވައިލުމެއްކަމަށެވެ.

އދ.އިން ބުނީ މި ދިޔަ ޖެނުއަރީ އާއި ޖުލައިއާ ދޭތެރޭ، ހުޅަނގު އައްސޭރީގައި ވަޒަންވެރިކުރުވައިފައިވާ ޔަހޫދީން ފަލަސްތީން ރައްޔިތުންނަށް ދިން ހަމަލާތައް 1،330 އަށްވުރެ ގިނަކަމަށެވެ.

އިސްރާއީލުން މި ވަގުތުވަނީ ހުޅަނގު އައްސޭރި އެއް ހަފުތާއަށް ބަންދުކޮށްލައިފައެވެ. އެއީ ތާރީހުގައި ޔަހޫދީން 40 އަހަރުވަންދެން ހަނަފަސް ސަހަރާތަކުގައި ޓެންޓު ޖަހައިގެން ދިރިއުޅުނުކަމުގެ ހަނދާން އާކުރާ އެއް ހަފުތާގެ ޗުއްޓީއެކެވެ. މި ޗުއްޓީއަށްފަހު ފަލަސްތީން ރައްޔިތުން ހުޅަނގު އައްސޭރީގައި ހަރަކާތްތެރިވާން ހުއްދަ ދީފައިވަނީ އަންނަ ހޮނިހިރު ދުވަހުން ފެށިގެންނެވެ.