ރަޝިޔާއިން ދިން ވަރުގަދަ ހަމަލާތަކެއްގައި ޔޫކްރެއިންގައި މަދުވެގެން 21 މީހުން މަރުވެއްޖެއެވެ. އޭގެ ތެރޭގައި ދެ ކުޑަކުދިންނާއި ތިން އަންހެނުން ހިމެނެއެވެ.

މިއީ ވޭތުވެދިޔަ މަސްތަކުގައި ރަޝިޔާއިން ޔޫކްރެއިނަށް ވައިގެ މަގުން ދިން އެންމެ ވަރުގަދަ އެއް ހަމަލާއެވެ.

ވެރިރަށް ކީއިވްގެ އިތުރުން ހަތަރު ސިޓީއަކަށް ރޭގައި ދިން ހަމަލާތަކުގައި 100 އަށްވުރެ ގިނަ މީހުން ޒަހަމް ވެސް ވިއެވެ.

ޔޫކްރެއިން އެއްކޮށް ހިފަން ރަޝިޔާއިން މީގެ ހަތަރު އަހަރު ކުރިން ފެށި ހަނގުރައިމައިގައި ރޭ ހަމަލާތައް ދިނީ މިސައިލާއި ޑްރޯނުންނެވެ. ހަމަލާތަކުގައި ގެދޮރާއި އާއްމު އިންފްރާސްޓްރަކްޗަރާއި ހަކަތަ ފޯރުކޮށްދޭ މަރުކަޒުތައް ސުންނާފަތިކޮށްލައިފައިވެއެވެ.

"ރަޝިޔާއިން ދިން ހަމަލާތަކުގައި 656 ޑްރޯނާއި 73 މިސައިލް ބޭނުންކޮށްފައިވޭ. އާއްމުން ދިރިއުޅޭ ސަރަހައްދުތަކަށް ހަމަލާދިން،" ޔޫކްރެއިންގެ ރައީސް ވޮލޮޑޮމިއަ ޒެލެންސްކީ ވިދާޅުވިއެވެ.

ރަޝިޔާގެ ހާރިޖީ ވުޒާރާއިން ބުނީ މިއީ ޔޫކްރެއިނުން ރަޝިޔާއަށް ކުރިން ދިން ހަމަލާތަކެއްގެ ރައްދެއްގެ ގޮތުން ޔޫކްރެއިނަށް ދިން ހަމަލާތަކެއް ކަމަށެވެ.

"އަހަރެމެން އަމާޒުކުރި ހުރިހާ ތަނަކަށް ހަމަލާއެރި،" އެ ވުޒާރާއިން ބުންޏެވެ.