ދިރިއުޅުމުގެ ހަރަދުތައް ބޮޑުވުމާއި މުސާރަ ކުޑަވުމުގެ ސަބަބުން އީރާންގައި ކުރަމުންދާ މުޒާހަރާތަކުގައި މިހާތަނަށް 2،000 އެއްހާ މީހުން މަރުވެއްޖެ ކަމަށް އީރާނުން މިއަދު ބުނެފިއެވެ.

މިއީ މިހާ ގިނަ އަދަދެއްގެ މީހުން މަރުވިކަން އީރާނުން ރަސްމީކޮށް ކަށަވަރުކޮށްދިން ފުރަތަމަ ފަހަރެވެ. ނަމަވެސް ފާޑުކިޔާ ފަރާތްތަކުން ބުނީ މުޒާހަރާތައް ހުއްޓުވަން އިންޓަނެޓްގެ ހިދުމަތް ކަނޑައިލައިފައިވުމާއި ރިޕޯޓް ކުރުމަށް މީޑިއާތަކަށް ހުރަސްއަޅައިފައިވާތީ މިނިވަން މުސްތަގިއްލުކޮށް އީރާންގެ މަސްރަހު ދެނެގަނެވެން ނެތުމުން މަރުވި މީހުންގެ އަދަދު މިއަށްވުރެ ގިނަވުން އެކަށީގެންވާ ކަމަށެވެ.

"މަރުވި މީހުންގެ ތެރޭގައި މުޒާހަރާކުރުންތެރިންނާއި ސަލާމަތީ ބާރުތަކުގެ އޮފިސަރުން ހިމެނޭ،" އޮފިޝަލަކު ބުންޏެވެ.

އޭނާ ބުނީ "މިއީ ޓެރަރިޒަމްގެ ނަތީޖާއެއް" ކަމަށެވެ.

އިންސާނީ ހައްގުތަކަށް މަސައްކަތްކުރާ ފަރާތްތަކުން ބުނީ 500 އަށްވުރެ ގިނަ މީހުން މަރުވެފައިވާ ކަމަށެވެ. އޭގެ ތެރޭގައި 490 މުޒާހަރާކުރުންތެރިންނާއި ސަލާމަތީ ބާރުތަކުގެ އެތައް ދޮޅަހެއްގެ އޮފިސަރުން ހިމެނޭ ކަމަށެވެ.

ނޯވޭގައި ގާއިމުކޮށްފައިވާ އީރާން ރައްޔިތުންގެ އިންސާނީ ހައްގުތަކަށް ވަކާލާތުކުރާ ހިލޭސާބަހަށް މަސައްކަތްކުރާ ޖަމިއްޔާ، އީރާން ހިއުމަން ރައިޓްސްއިން ބުނީ މަރުވީ ގާތްގަނޑަކަށް 648 މީހުން ކަމަށެވެ. އަދި އޭގެ ތެރޭގައި ކުޑަކުދިން ވެސް ހިމެނޭ ކަމަށެވެ.

އީރާންގެ މުއައްސަސާތައް ހިފުމަށް އެމެރިކާގެ ރައީސް ޑޮނަލްޑް ޓްރަމްޕް މިއަދު ވަނީ މުޒާހަރާކުރުންތެރިންނަށް ގޮވައިލައްވައިފައެވެ.

"އަދި މުޒާހަރާތައް ކުރިއަށް ގެންދިއުމަށް ވެސް ގޮވައިލަން،" އޭނާ ވިދާޅުވިއެވެ.

އޭނާ މިހާރު ވަނީ އީރާނާއެކު ވިޔަފާރީގެ މުއާމަލާތްކުރާ ގައުމުތަކުގެ މުދަލުން 25 ޕަސެންޓްގެ ޑިއުޓީއެއް އިއުލާންކުރައްވައިފައެވެ.

ޓްރަމްޕް ވިދާޅުވީ އީރާނާ މުއާމަލާތް ކުރަން ޑިޕްލޮމެސީގެ އިތުރުން އަސްކަރީ ފިޔަވަޅު ވެސް އަޅަންޖެހިދާނެ ކަމަށެވެ.