އިނގިރޭސި ވިލާތުގައި އޮތް ނެށުމުގެ ކްލާހަކަށް އުމުރުން 17 އަހަރުގެ ފިރިހެން ކުއްޖަކު ވަޅިން ހަމަލާ ދީ ކުޑަ ތިން އަންހެން ކުދިން މަރައިލުމާ ގުޅިގެން ސައުތުޕޯޓް ޓައުންގައި ހަމަނުޖެހުން ހިނގައިފިއެވެ. މާސީސައިޑް ސަރަހައްދުގެ ފުލުހުން ބުނީ މިސްކިތެއް ކައިރީގައި ފުލުހުންނާ ދެކޮޅަށް ބަޔަކު ހަމަލާ ދިނީ ކުޑަ ތިން ކުދިން މަރައިލީ އަލީ އަލް-ޝަކާތީ ނަމަކަށް ކިޔާ މުސްލިމް ކުއްޖެއް ކަމަށް ބަޔަކު ދޮގު ހަބަރު ފެތުރުމުން ކަމަށެވެ.
ފިރިހެން ކުއްޖާ ދިން ވަޅީގެ ހަމަލާގައި އިތުރު އަށް ކުދިންނާއި ބޮޑެތި ދެ މީހުން ވަނީ ޒަހަމްވެފައެވެ.
އޭނާއާ ބެހޭ ދޮގު މައުލޫމާތު ސޯޝަލް މީޑިއާގައި ފެތުރުމުގެ ސަބަބުން ހިނގި ހަމަނުޖެހުންތަކުގައި 39 ފުލުހުން ޒަހަމްވިއެވެ. އޭގެ ތެރެއިން 27 ފުލުހުންނަށް ހޮސްޕިޓަލުން ފަރުވާ ދޭންޖެހުނެވެ.
ހަމަނުޖެހުންތަކުގެ ވީޑިއޯތަކުން ފެންނަނީ ހައްދުފަހަނަޅާފައިވާ ކަނާތުފިޔައިގެ "ޕެޓްރިއޮޓިކް އޮލްޓަނެޓިވް" ގްރޫޕްގެ މެންބަރުން ފުލުހުންނާ ދިމާއަށް ގާ އުކާ މަންޒަރެވެ. މީގެ އިތުރުން މިސްކިތު ކައިރީގައިވާ ފުލުހުންގެ ވޭނެއްގައި ވެސް ވަނީ އަލިފާން ރޯކޮށްލައިފައެވެ.
ފުލުހުން ބުނީ ތިން ކުދިންގެ މަރުގެ ތުހުމަތުގައި ހައްޔަރު ކުރި ފިރިހެން ކުއްޖަކީ ކާޑިފް ސަރަހައްދަށް އުފަން ކުއްޖެއް ކަމަށެވެ. ނަމަވެސް އޭނާއަކީ މިދިޔަ އަހަރު ކުޑަ ބޯޓެއްގައި އިނގިރޭސި ވިލާތަށް ހިޖުރަ ކުރި ކުއްޖެއް ކަމަށް ސޯޝަލް މީޑިއާގައި ދޮގު ހަބަރު ފަތުރައިފައިވާ ކަމަށެވެ.
"އެތައް މިލިއަން ބަޔަކަށް މި ދޮގު ހަބަރުތައް ވަނީ ސޯޝަލް މީޑިއާއިން ފެނިފައި،" މާސީސައިޑް ފުލުހުން ބުންޏެވެ.
ކުށް ކުރާ ކުޑަކުއްޖެއްގެ ޖިނާއީ އިޖުރާއަތުގެ މަރުހަލާތައް ފުރިހަމަ ކުރުމުގެ ކުރިން އެ ފަދަ ކުދިންނަކީ ކޮން ބައެއްކަން އެނގޭނެ އެއްވެސް މައުލޫމާތެއް ހާމަކުރުމަކީ އިނގިރޭސި ވިލާތުގެ ގާނޫނުގައި ޖިނާއީ ކުށެކެވެ.
"މި ދޮގު މައުލޫމާތު ފެތުރި ބަޔަކު އެކަން ކުރީ ނަސްލީ ތަފާތުކުރުންތައް ބޭނުންކޮށްގެން ހަމަނުޖެހުން ހިންގަން،" ނޫސްވެރިއެއް ކަމަށްވާ ކެތަރިން ޑެންކިންސަން ބުންޏެވެ.
advertisment
