ރައީސް މުޙައްމަދު ނަޝީދު އެވަނީ އަނެއްކާވެސް އެ މަނިކުފާނުގެ ސިޔާސީ ނުފޫޒު ސާބިތުކޮށްދެއްވައިފައެވެ. މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އިދާރީ ހިންގުމުގެ އެންމެ އިސް މަގާމު (ޗެއާ ޕާސަން) ގެ އިންތިޚާބު ކާމިޔާބު ކުރައްވައި ނަޝީދު މިވަނީ ދިވެހި ސިޔާސީ ތާރީޚުގައި ފެނުނު އެންމެ ފާހަގަކޮށްލެވޭ "އެނބުރިއައުން" ފުރިހަމަކުރައްވައިފައެވެ. ޕާޓީން ވަކިވެވަޑައިގެން، އެ ޕާޓީއަށް އިންތިޚާބީ ބޮޑު ނާކާމިޔާބީއަކާ ކުރިމަތިލާންޖެހުނު ބައިބައިވުން އުފެއްދެވުމުގައި އިސްކޮށް ހުންނެވުމަށްފަހު، އަދި ޕާޓީގެ އިސް ސަފާ އަހަރުތަކެއް ވަންދެން ޚިޔާލުތަފާތުވެ ހުންނެވުމަށްފަހު، ނަޝީދު މިވަނީ އެނބުރި ވަޑައިގެން ޕާޓީގެ އެންމެ ބާރުގަދަ އެއް މަގާމު އިއްޔެ ކަށަވަރު ކުރައްވައިފައެވެ.

މިއީ އެމްޑީޕީގެ އާންމު މެންބަރުންގެ ޝައުގުވެރިކަން ދަމައިގަތުމަށް ނަޝީދުގެ ކިބައިގައި ހުރި ތަފާތު ހުނަރުގެ ދިރިހުރި ހެއްކެކެވެ. އެމްޑީޕީ ބައިބައިކޮށްލީ ނަޝީދު ކަމަށް ބުނެ ހާމަކަން ބޮޑު ގޮތެއްގައި ފާޑުކިޔަމުންދިޔަ ޕާޓީގެ ނުފޫޒުގަދަ ފެކްޝަނާ ކުރިމަތިލައްވައި، އަދި ރައްޔިތުންގެ މަޖިލީހުގެ މެންބަރު މީކާއިލް އަޙުމަދު ނަސީމް އިސްވެ ހުންނަވައި، ރައީސް އިބްރާހިމް މުހައްމަދު ސޯލިހުގެ ފުރިހަމަ މަދަދުވެރިކަމާއެކު ހިންގެވި ނިޒާމީ ކެމްޕޭނަށް ގޮންޖައްސަވައި، ނަޝީދު އިޚްތިޔާރުކުރެއްވީ ސަލާމަތްތެރި ހަނި މަގަކުން ވަޑައިގަތުމެއް ނޫނެވެ؛ ނުވަތަ ދޫދެއްވުމެއްވެސް ނޫނެވެ. އޭގެ ބަދަލުގައި، ނަޝީދު އިތުރަށް ވަރުގަދަކުރެއްވީ އެ މަނިކުފާނުގެ ސިޔާސީ ހަޔާތް ސިފަކޮށްދޭ އަސާސްތަކެވެ. އެއީ އަމިއްލަ ގަބޫލުކުރުންތަކާއި، ސީދާ ކުރިމަތިލުންތަކާއި، އަދި ސިޔާސީ މަސްރަހުގައި ކުޅުއްވާ ފާޅުކަން ބޮޑު ޑްރާމާ އާއި އުކުޅުތަކެވެ.

ނަޝީދުގެ ސިޔާސީ ޑްރާމާ އަށް ހައްޤުވާ "އޮސްކާ-އެވޯޑް"، ޕާޓީ މެބަރުން ނަޝީދަށް އިއްޔެގެ ވޯޓުން އަރުވައިފިއެވެ. ޕާޓީގެ އެތެރޭގެ ހަނގުރާމަ ނަޝީދު މިވަގުތަށް ކާމިޔާބު ކުރެއްވި ނަމަވެސް، އެމްޑީޕީގެ ބޯމަތީގައި މިހާރު އޮތީ މާ ނުތަނަވަސް ސުވާލެކެވެ: ޗެއާ ޕާސަން އަކަށް ނަޝީދު ހޮވުން ވެގެންދާނީ، ކުރިއަށް އޮތް ރިޔާސީ އިންތިހާބާއި މަޖުލިސް އިންތިޚާބު ކާމިޔާބުކުރަން އެމްޑީޕީ އަށް އޮތް ހުރަހަކަށް ބާވައެވެ؟

އިސްތިރާތީޖީގެ މައްޗަށް ޖަޒުބާތު ހޯދި ކާމިޔާބީއެއް:

މި އިންތިޚާބަކީ ހަމައެކަނި ނަޝީދާއި މީކާއިލާ ދެމެދު ކުރެވުނު ވާދައެއް ނޫނެވެ. މިއީ 2023 އަދި 2024ގެ ދެ އިންތިހާބުން ލިބުނު ބޮޑެތި ނާކާމިޔާބީތަކުން އެމްޑީޕީން ދަސްކުރީ ކޮން ފިލާވަޅެއްތޯ ބެލުމަށް ނެގުނު އާންމު ވޯޓެއް ވެސް މެއެވެ. މިއީ ޕާޓީގެ މުއައްސަސާތައް އަލުން ބިނާކުރުމާއި، އެތެރޭގެ ބައިބައިވުންތައް މަރާމާތުކުރުމާއި، އަދި އާންމު ވަފާތެރި މެންބަރުންގެ އިމުން ބޭރަށް ޕާޓީގެ ތާއީދު ފުޅާކުރުމުގެ އުނދަގޫ މަސައްކަތް ޕާޓީން ބަލައިގަންނާނީތޯ، ނުވަތަ އަނެއްކާވެސް ޝަޚްޞިއްޔަތެއްގެ ސިޔާސީ މަސްތުގެ ތެރެއަށް ޕާޓީން ފީނައިގަންނާނީތޯ ކުރެވުނު ސުވާލެކެވެ.

ޕާޓީގެ މެންބަރުން ވަނީ އޭގެ ޖަވާބުދީފައެވެ. އަދި އެ ޖަވާބަކީ މާ އުންމީދީ ޖަވާބެއް ނޫނެވެ.

ނަޝީދުގެ ކާމިޔާބީން ރަމްޒުކޮށްދެނީ ހަމައެކަނި ކެންޑިޑޭޓަކު ހޯއްދެވި ކުރިއެރުމެއް ނޫނެވެ. މިއީ އެމްޑީޕީގައި ހިމެނޭ ޒަމާނީ ފިކުރުގެ ޒުވާނުންނަށް ޤައުމުގެ މުސްތަގްބަލާއި، ދީނީ ހަމަޖެހުމަށް ވުރެ ބިރަކާނުލާ މަޖާކުރުމުގެ ފަލްސަފާ މުހިއްމުވީ ކަމުގެ ރަމްޒެކެވެ. ދުރު ރާސްތާގެ ސްޓެރެޓެޖީ އާއި ރޭވުންތެރިކަމަށްވުރެ ޖަޒުބާތާއި ޝަހުސިއްޔަތު މުހިއްމުވީކަމުގެ ރަމްޒެކެވެ. ދުރު ރާސްތާގެ ސިޔާސީ ހަގީގަތްތަކުގެ މައްޗަށް ވަގުތީ އުފާވެރިކަން ހޯދި ކުރިއެރުމެކެވެ. އެމްޑީޕީ އަށް 2023ގެ ވެރިކަން ގެއްލުނީ މުޒާހަރާތަކާއި ޝިއާރުތައް ނެތިގެންނެއް ނޫނެވެ. ވެރިކަން ގެއްލުނީ އަހަރުތަކެއް ވަންދެން ހިނގި އެތެރޭގެ ފެކްޝަން ހަނގުރާމައިގެ ސަބަބުން، ޕާޓީއަށްވުރެ ނުވަތަ ގައުމު ހިންގުމަށްވުރެ، އެތެރޭގެ ތަޅާފޮޅުންތަކަށް ޕާޓީން އިސްކަންދޭކަން އާންމު ރައްޔިތުންނަށް ގަބޫލުކުރެވުމުންނެވެ.

އެ ބައިބައިވުމުގެ ޒިންމާގެ ބޮޑުބައި ނަޝީދު އުފުއްލަވަން ޖެހެއެވެ. އެމްޑީޕީ "ރޫޅާލާނަން" ކަމަށް ވިދާޅުވެ ޕޯޑިއަމް ތަކުގައި ފާޅުގައި އިންޒާރު ދެއްވި ނަޝީދަކީ ޕާސަނާލިޓީ ކަލްޓެއް ގޮތަށް އެމްޑީޕީ ބައްޓަން ކުރައްވަން ވަރަށް ހުނަރުވެރި ބޭފުޅެކެވެ. އިއްޔެ ނަޝީދު އެ ސާބިތުކޮށްދެއްވީ އެކަމެވެ. ހައިރާންވާންޖެހޭ ކަމަކީ، އެމްޑީޕީގެ ތާރީޚުގައި ފެނުނު އެންމެ ބޮޑު އިންތިޚާބީ ނާކާމިޔާބީތަކަށް މަގުފަހިވި ގޯސްތަކަށް ނަޝީދު ޒިންމާދާރުކުރުވުމުގެ ބަދަލުގައި، އެމްޑީޕީގެ މެންބަރުން މިވަނީ އެ ދުވަސްވަރުގެ ބައިބައިވުމާ އެންމެ ބޮޑަށް ގުޅިފައިވާ ސިޔާސީ ޝަޚްޞިއްޔަތުގެ ސިޔާސީ ސްޓަންޓް ތަކަށް "އޮސްކާ-އެވޯޑެއް" ދީފައެވެ. ބޮޑު ބަދަލަށް ބޮޑު ހަދިޔާއެއް ދީފައެވެ. މީގެން، އެމްޑީޕީ އަކީ ކޮން ކަހަލަ ޕާޓީއެއްތޯ އާއި އެމްޑީޕީ މެމްބަރުންނަކީ ކޮން ކަހަލަ ވިސްނުމެއްގެ ބައެއްތޯ ވަރަށް ރަނގަޅަށް ހާމަކޮށްދެއެވެ.

އިއްޔެގެ އިންތިޚާބުން ދޭހަކޮށްދެނީ، އެމްޑީޕީގެ ގިނަ މެންބަރުން އަދިވެސް އިސްކަންދެނީ އިންތިޚާބުތައް ކާމިޔާބުކުރުމުގެ އުނދަގޫ ސުވާލުތަކަށް ވިސްނުމުގެ ބަދަލުގައި، ވަގުތީ ފޯރިއެއްގައި ތިބުމަށް ކަމެވެ. އިއްޔެ ފެނުނީ ޕާޓީ އަލުން އިންތިޒާމުކުރުމުގެ "ފޫހި" މަސައްކަތަށްވުރެ ސިޔާސީ ކުރިމަތިލުންތަކުގެ ހަލަބޮލިކަމާއި ފޯރިއަށް ޕާޓީގެ މެމްބަރުން އިސްކަންދިންތަނެވެ. އެމްޑީޕީގެ މެމްބަރުން އިޚްތިޔާރުކުރީ ޕާޓީގެ އެތެރޭގެ ނިޒާމުތައް ވަރުގަދަކުރުމަށް ވާހަކަ ދެއްކި ކެންޑިޑޭޓު (މީކާއިލް)ގެ ބަދަލުގައި، ސަރުކާރާ ވަގުތުން ކުރިމަތިލައްވައި، މުލީއާގެ ދޮށަށް އެއްވެ، މިނިސްޓްރީތަކާއި ކުންފުނިތައް ހިސޯރުކޮށް، ޤައުމު ހަލަބޮލިކޮށް، އިގްތިސޯދަށް ވާނެގޮތެއް ނުބަލާ، ސަރުކާރު ވައްޓާލަން ހިއްޕަވާނެ ކަމަށް ވައުދުވި ކެންޑިޑޭޓެވެ. މިވަގުތު އިދިކޮޅުގައި އޮވެ، 2028ގައި އަލުން ވެރިކަމަށް އައުމަށް ތައްޔާރުވަމުންދާ ޕާޓީއަކަށް ބަލާއިރު، މިއީ ވަރަށް ކަންބޮޑުވާންޖެހޭ ނިޝާނެކެވެ.

އިންތިޚާބުތައް ކާމިޔާބު ކުރުމުގެ ގާބިލުކަމުގެ ސުވާލު

ޕާޓީ ތެރޭގައި ނަޝީދުގެ މަގުބޫލުކަން އިއްޔެ އަލުން ފެނިގެން ދިއުމަކީ ހައިރާންވާންޖެހޭ ކަމެއް ނޫނެވެ. ނަޝީދަކީ އަދިވެސް ޕާޓީގެ އެންމެ މުހިންމު ކެމްޕޭން ހިންގުންތެރިޔާއެވެ. މަދު ސިޔާސީ ބޭފުޅަކަށް ނޫނީ އާންމުންގެ މެދުގައި އެފަދަ ގޮތަކަށް ފޯރި އުފައްދަން ނޭނގޭނެއެވެ. ވިއްސާރައިގައި މާރިއޯ ގޭމް ކެރެކްޓާރ ހެން ދުވެވަޑައިގެން، ތުއްތު ކުދީންނަށް ބަކުން ކާން ދެއްވަމުން، ބަދިގެތެރޭގައި ރޮށި ދަންމަވައިދެއްވަމުން، ނުކުޅެދޭ އަންހެނުން ކޮނޑުއަޅުއްވައިގެން ހިންގެވުން ފަދަ އެތައް ކަމެކެވެ. ނަމަވެސް ނަޝީދާއި އެމްޑީޕީގެ މެމްބަރުންނަށް އެނގެން ޖެހޭ ހަޤީގަތަކީ، އިންތިޚާބުތައް ކާމިޔާބު ކުރެވެނީ ހަމައެކަނި ނަޝީދަށް ތާއީދު ކުރުމުގައި ވަޖިދުވެފައިވާ، އަދި، ނަޝީދު "މަރުވިއްޔާ ޝަރަފުގައި މަރުވާން" ތައްޔާރަށް ތިބި އެމްޑީޕީގެ ދިހަ ވަރަކަށް ހާސް މެބަރުން ފޯރިގެންނުވައިގެންނެއް ނޫންކަމެވެ. އިންތިޚާބުތައް ކާމިޔާބު ކުރެވޭނީ ތިމާއާ ޚިޔާލުތަފާތުވާ މީހުންގެ ވިސްނުން ބަދަލުކޮށްގެންނެވެ. އާންމު ދިވެހި ރައްޔިތުން ބޭނުންވަނީ ދާއިމީ ސިޔާސީ ކުރިމަތިލުންތަކެއް ނޫނެވެ. އެ މީހުން ބޭނުންވަނީ ބޭރުގެ ނުފޫޒުތަކުން ޤައުމު ސަލާމަތްކޮށްދެވޭނެ ގާބިލުކަމާއި، ޤައުމީ ހަމަޖެހުމާއި، އިގްތިސޯދީ ތަނަވަސްކަން ގެނެސްދެވޭނެ ހަމަޖެހޭ ލީޑަރެކެވެ. އިރުއިރުކޮޅާ ހިޔާލް ބަދަލުވާ އެކްޓިވިސްޓެއް ނޫނެވެ. ވަކި ފަރާތަކަށް ނުޖެހޭ މެދުތެރޭގެ (ސްވިންގް) ވޯޓަރުންގެ ތާއީދު ހޯދުމަކީ ސްޓަންޓް ޖައްސައިގެން އެކަނި ކުރެވޭނެ ކަމެއް ނޫނެވެ.

ތަކެތީގެ އަގުބޮޑުވުމާއި، ޤައުމީ ދަރަންޏާއި، ބޯހިޔާވަހިކަމާއި، ސިއްހީ ނިޒާމާއި، އަދި އިގްތިސާދީ ސަލާމަތްތެރިކަމާ މެދު ކަންބޮޑުވާ އެމްޑީޕީގެ މެންބަރުންނަށް ވުރެ އެ ޕާޓީގައި ގިނަ ކަމަށް މި ފެނުނީ ސިޔާސީ ފޯރީގައި މަސްތުވާން ބޭނުންވާ މެމްބަރުންނެވެ. ޕާޓީގެ އެތެރޭގައި މަގުބޫލުކަން ހޯދުނަކަސް ގައުމީ ފެންވަރުގެ އިންތިޚާބެއް ކާމިޔާބުކުރުމުގެ ގާބިލުކަން ނަޝީދުގެ ކިބައިގައި ހުރިކަން، އިއްޔެގެ ނަތީޖާއަކުން ކޮންމެހެން ހާމައެއް ނުވެއެވެ.

ނިމުމެއް ނެތް އެތެރޭގެ ހަނގުރާމަ

ޕާޓީގެ އިދާރީ އެންމެ އިސް މަގާމު ނަޝީދު ކޮންޓްރޯލް ކުރެއްވި ނަމަވެސް، ޕާޓީގެ މުއައްސަސާގެ ބޮޑު ބައެއް އަދިވެސް އޮތީ ރައީސް ސޯލިޙް އަދި އެމްޑީޕީގެ ރައީސް ޢަބްދުﷲ ޝާހިދުގެ ފިކުރާ އެކުގައެވެ. ޕާޓީގެ މަޖިލިސް މެންބަރުންގެ (ޕާލިމެންޓަރީ) ގްރޫޕާއި، ގައުމީ މަޖިލީހާއި، އަދި ޕާޓީގެ އިންތިޒާމީ އޮނިގަނޑުގައި އެ ބޭފުޅުންގެ ނުފޫޒު އަދިވެސް ވަރަށް ބޮޑެވެ. ބައިބައިވުން އުފެއްދި ފާރުގަނޑުތަކަކީ ހަމައެކަނި އެތެރޭގެ އިންތިޚާބަކުން ފަސޭހަވާނެ އެއްޗެއް ނޫނެވެ. އަދި ކިއެއްތަ، މި ކާމިޔާބީގެ ސަބަބުން އެ ބައިބައިވުންތައް އިތުރަށް ފުންވެގެންދިއުމުގެ ނުރައްކާ އެބައޮތެވެ. އެމްޑީޕީގެ މައްސަލައަކީ ހަމައެކަނި ލީޑަޝިޕް މަގާމުތަކުގެ މައްސަލައެއް ނޫނެވެ. އެއީ ވަކިވަކި ފެކްޝަންތަކަށް ބެހުމުގެ މައްސަލައެކެވެ. އެއީ އިސް ބޭފުޅުންގެ އަމާޒުތައް ޕާޓީގެ ކުރިއެރުމަށްވުރެ އިސްކުރުމުގެ ނަތީޖާއެވެ. މި އިންތިޚާބުން އެ މައްސަލަތައް ހައްލުވިކަމުގެ އެއްވެސް ނިޝާނެއް ފެންނާކަށް ނެތެވެ.

ހަނި މެންޑޭޓަކާއި ބޮޑު އެކަހެރިވުމެއް (25 އިންސައްތައިގެ ހަގީގަތް)

ސިޔާސީ ގޮތުން އެންމެ ސިހުން ގެނުވި އަދަދަކީ، އިންތިޚާބުގައި ވޯޓުލުމުގެ ޙައްޤު ލިބިގެންވީ މެންބަރުންގެ ތެރެއިން ވޯޓުގައި ބައިވެރިވީ އެންމެ 25 ނުވަތަ 26 އިންސައްތަ މީހުން ކަމެވެ. މިއީ ޕާޓީގެ ތާރީޚުގައި ވެސް މިހާ މަދު ނިސްބަތެއް ވޯޓުލާން ނިކުތް ފަހަރެވެ. މީގެން ދޭހަކޮށްދެނީ، އެމްޑީޕީގެ ރަޖިސްޓްރީގައި ތިބި ބޮޑު އަޣުލަބިއްޔަތު (75 އިންސައްތައަށްވުރެ ގިނަ މެންބަރުން) ތިބީ ޕާޓީގެ އެތެރޭގައި ހިނގަމުންދާ ފެކްޝަން ކުޅިގަނޑާއި، ޒާތީ ސިޔާސީ ހަނގުރާމަތަކަށް ފޫހިވެ، މާޔޫސްވެފައި ކަމެވެ. އެ މެމްބަރުން ތިބީ ރައީސް ނަޝީދުގެ ފެކްޝަނަށާއި، އަދި އިސްލާހީ ފިކުރުގެ މައި ފެކްޝަނަށް ވެސް ފުރަގަސްދީގެންނެވެ. މިފަދަ ހަނި ތާއީދެއްގެ މައްޗަށް ބިނާކޮށް ގައުމީ ފެންވަރުގެ ރިޔާސީ އިންތިޚާބެއް ކާމިޔާބު ކުރެވިދާނެތޯ މިއީ އުފެދޭ ބޮޑު ސުވާލެކެވެ.

އިޤްތިޞާދީ ނާޒުކުކަމާއި "މަގުމަތީ ހަރަކާތްތަކުގެ" ނުރައްކާ

އިއްޔެގެ ކާމިޔާބީ ފާހަގަކުރުމަށް އާޓިފިޝަލް ބީޗުގައި ރޭ ބޭއްވި ޖަލްސާގައި ރައީސް ނަޝީދު ސަރުކާރަށް ދެއްވި އިންޒާރަކީ މުޅި ގައުމު ސިއްސުވާލި އިންޒާރެކެވެ: "އަޅުގަނޑުމެން މާލޭގައި ހުރި ސަރުކާރު ކުންފުނިތަކުގެ މައި އޮފީސްތައް ހިސާރު ކުރާނަން،" މިއީ އެ މަނިކުފާނު ސީދާ ހަރަކާތަށް ގޮވާލައްވަމުން ވިދާޅުވި ބަސްފުޅެވެ. މުލީއާގެ ދޮށަށް އެއްވާނެ ކަމަށާއި، ސަރުކާރު ވައްޓާލަން އެންމެން އަތުގުލާލަން ނަޝީދު ގޮވާލެއްވުމަކީ މާދަމާއިން ފެށިގެން ޤައުމު ހަލަބޮލިކޮށްލަން ރޭވިފައިވާ ބޮޑު ރޭވުމެއްގެ ސުރުހީއެވެ. ސަރުކާރު ޖަވާބުދާރީ ކުރުވުމަކީ އިދިކޮޅު ޕާޓީއެއްގެ ގާނޫނީ ޒިންމާއެއް ނަމަވެސް، ދައުލަތުގެ މުއައްސަސާތައް ހިސާރުކުރުމަށް ގޮވައިލާ ގޮވާލުންތަކަކީ ޑިމޮކްރެޓިކް ހަމަތަކާ ޚިލާފު، އަދި ގައުމުގެ އިގްތިސާދީ މައިބަދަ ބިންދާލާނެ ފަދަ ނުރައްކާތެރި އަމަލުތަކެކެވެ.

ދިވެހިރާއްޖޭގެ މިއަދުގެ އިގްތިސާދީ ހާލަތަކީ ބޭރުގެ ދަރަންޏާއި، މާލީ ރޭޓިންތަކުގެ ސަބަބުން ނާޒުކު ފައްތަރެއްގެ މަތީގައި އޮތް އެއްޗެކެވެ. މިފަދަ ދަނޑިވަޅެއްގައި ވެރިރަށް މާލޭގެ މަގުތައް ހަލަބޮލިކޮށް، މަގުމަތީގެ ބޮޑެތި ހަމަނުޖެހުންތަކާއި މަދަނީ ބަސްނޭހުމުގެ ހަރަކާތްތައް ހިންގަން އުޅުމަކީ ބޭރުގެ އިންވެސްޓަރުންގެ އިތުބާރު ގެއްލި، މުޅި ގައުމު ބަނގުރޫޓުވުމަށް މެދުވެރިވާނެ ކަމެކެވެ. ރައީސް ނަޝީދަކީ ހަމައެކަނި މަގުމަތީގެ ހަލަބޮލިކަމުގެ ބަހުރުވަ ދެނެވަޑައިގަންނަވާ ބޭފުޅެއްގެ ގޮތުގައި ފެނުމަކީ މިއަދުގެ ދިވެހި ޒުވާނުންނާއި ވިޔަފާރިވެރިން އެދޭ ގޮތެއް ނޫނެވެ.

2028 ގެ ފޯމިއުލާ: ނިޒާމީ ހަލަބޮލިކަމެއް؟

މި އިންތިޚާބުގެ ފަހަތުގައި އޮތް އަނެއް ބޮޑު ސިއްރަކީ ރައީސް ނަޝީދާއި ކުރީގެ އިކޮނޮމިކް މިނިސްޓަރު ފައްޔާޒް އިސްމާއިލް ގުޅިގެން ނެރުއްވި "ބޮޑު ބަދަލު"ގެ ހުށަހެޅުމެވެ. އެ ބޭފުޅުންގެ އަމާޒަކީ 2028 ގައި ފައްޔާޒް ރިޔާސީ ކެންޑިޑޭޓަކަށް ނެރެ، ވެރިކަމުގެ ނިޒާމު ދެ ބަޔަށް ކަފާލުމެވެ. "ދައުލަތުގެ އެންމެމަތީ ވެރިޔާ"ގެ މަގާމަށް ރައީސް ނަޝީދު ވަޑައިގެން، "ސަރުކާރު ހިންގާ ވެރިޔާ"ގެ މަގާމު ފައްޔާޒަށް ދިނުމެވެ. އެ ވިދާޅުވާ ބޮޑު ބަދަލަކީ އެއީ އެވެ. އެ ހިސާބުން ބޮޑު ބަދަލު ނިމުނީ އެވެ. ދެން އޮންނާނީ ބޮޑު ކޭކު ފެޅުމެވެ. އެއަށް ފަހު ޑީ.ޖޭ އާ އެކު ބިރަކާ ނުލާ މަޖާކުރުމެވެ. ރައީސް ނަޝީދުގެ ފޯމިއުލާ އަކީ އެއީ އެވެ. ޤައުމަކާ ޤައުމެކެވެ!

މިއީ ގާނޫނު އަސާސީއާ ކުޅެ، އަމިއްލަ ސިޔާސީ އެދުންތަކެއް ފުއްދުމަށްޓަކައި ގައުމުގެ ހިންގުމުގެ ނިޒާމު އޮޅުންބޮޅުންގަނޑެއްގެ ތެރެއަށް ވައްޓާލުމެވެ. މިފަދަ ނިޒާމީ ބަދަލުތަކުގެ ވާހަކަތަކުން ދޭހަވަނީ އެމްޑީޕީގެ އާ ލީޑަޝިޕުން ގައުމުގެ ހަމަޖެހުމަށްވުރެ އަމިއްލަ ބާރުތައް ބެހުމަށް އިސްކަންދޭ ކަމެވެ.

ރައީސް މުއިއްޒުގެ ވިސްނުން އަދި ރައީސް ޔާމީންގެ ފުރުސަތު

އިއްޔެގެ ނަތީޖާ އަށް ބެއްލެވުމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ފެނިވަޑައިގަންނަވާނެ ހަޤީގަތަކީ، އިދިކޮޅު އެމްޑީޕީ އަދިވެސް އޮތީ ޝަޚްޞިއްޔަތެއްގެ ސިޔާސީ ކުޅިގަނޑެއްގެ ތެރޭގައި ކަމެވެ. ނަމަވެސް ސިއްރިއްޔާތުގައި، ރައީސް މުޢިއްޒުގެ ރޭވުންތެރިންނަށް މިއީ ސިޔާސީ ފުރުސަތެކެވެ. އިގްތިސާދާއި، ބޯހިޔާވަހިކަމާއި، އާންމު ޚިދުމަތްތަކަށް ސަމާލުކަން ދިނުމުގެ ބަދަލުގައި، އަނެއްކާވެސް އެތެރޭގެ ޒާތީ ކަންކަމަށް އެމްޑީޕީން ވަގުތު ހޭދަކުރުމަކީ ސަރުކާރަށް ރައްޔިތުންގެ ކަންކަން ރަނގަޅު ކުރަން ލިބޭނެ ފުރުސަތެކެވެ. ނަމަވެސް އެކަން ކުރެވޭނީ ޤައުމު ހަލަބޮލި ކުރަން ނަޝީދު ރާއްވަވާ ރޭވުންތައް ސިޔާސީ ގޮތުން ކޮންޓްރޯލް ކުރެވިގެންނެވެ. އެފަދަ ކޮންޓްރޯލެއް ސަރުކާރުން ހޯދުމުގައި ކުރީގެ ރައީސް ޢަބްދުﷲ ޔާމީނުގެ އެހީ ސަރުކާރަށް ލިބުމަކީ މުހިއްމު ކަމަކަށް ވެދާނެއެވެ!

މި ނަތީޖާއިން އެންމެ ބޮޑު ފައިދާއެއް ކުރާނެ އެއް ބޭފުޅަކީ ރައީސް ޔާމީނެވެ. އެމްޑީޕީގެ ތެރޭގައި އޮތް ބައިބައިވުމާއި، ހަމައެކަނި ޕާޓީގެ "މައި ބޭސް" އަށް އަމާޒުކޮށްގެން ހިންގާ ހަރަކާތްތަކުގެ ސަބަބުން ރައްޔިތުންގެ "އަން ޑިސައިޑެޑް" މީހުންގެ މެދުގައި ވަނީ އެމްޑީޕީ އަކީ ޤައުމަށް އޮތް ހައްލެއް ކަމާ މެދު ޝައްކު އުފެދިފައެވެ. އެފަދަ ހާލަތެއްގައި، އިދިކޮޅު ބާރެއްގެ ގޮތުގައި، ސިޔާސީ މައިދާނުގައި ޔާމީންގެ ފިކުރަށް އާ ދިރުމެއް ލިބުމުގެ ފުރުސަތު އެބައޮތެވެ.

ގައުމީ މަސްލަހަތު ހިމާޔަތްކުރުން: ޒާތީ ޚިލާފުތަކަށްވުރެ ގައުމު އިސްކުރުން

މި ދަނޑިވަޅަކީ ގައުމުގެ ސިޔާސީ އަދި އިގްތިސާދީ މިސްރާބު ރަނގަޅު މަގަކަށް އެޅުވުމަށްޓަކައި، ޒާތީ އަދި ފެކްޝަން ޚިލާފުތަކުގެ މައްޗަށް ގައުމީ މަސްލަހަތު އިސްކުރަންޖެހިފައިވާ ވަގުތެކެވެ. އިދިކޮޅުން އުފައްދަން އުޅޭ މަގުމަތީގެ ހަލަބޮލިކަމާއި، މަދަނީ ބަސްނޭހުމުގެ ނުރައްކަލުން ގައުމު ސަލާމަތްކުރެވޭނީ، މިއަދުގެ ސަރުކާރު ހިންގާ ޕީއެންސީގެ ލީޑަޝިޕާއި، ސިޔާސީ މައިދާނުގައި ނުފޫޒުގަދަ އެހެން ހަރަކާތްތަކުން ވެސް ގައުމީ ސުލްހައަށް ޖާގަދީގެންނެވެ. ގައުމުގެ މިސްރާބު ހަމަ މަގަށް އެޅުވުމަށްޓަކައި، ރައީސް މުޢިއްޒާއި، ރައީސް ޔާމީންގެ ފިކުރާ ދެމެދު އޮތް ހީނަރުކަން ކުޑަކޮށް، ގައުމީ ބޮޑެތި މައްސަލަތަކުގައި އެއްބަސްވުންތަކެއް ގާއިމުކުރުމަކީ މިއަދު ގައުމު ބޭނުންވާ އެންމެ ބޮޑު ސަލާމަތެވެ. މިއީ ދެ ބޭފުޅުން އެއް ޕާޓީއެއްގެ ގޮތުގައި މަސައްކަތް ކުރުމުގެ ވާހަކައެއް ނޫނެވެ. ނަމަވެސް، މިއީ ގައުމުގެ އިގްތިސާދު ހިމާޔަތްކުރުމުގައްޔާއި، މަގުމަތީގެ ހަމަނުޖެހުންތަކުން ދިވެހި ދައުލަތް ސަލާމަތްކުރުމުގައި، ދައުލަތުގެ ހިންގުންތެރި ބާރާއި އިދިކޮޅު އެހެން ބާރުތަކުން ގައުމީ ސުލްހައިގެ ބިންގަލެއް އެޅުމެވެ.

އެހެން ނޫންނަމަ، އެމްޑީޕީގެ އާ ލީޑަޝިޕުން އުފައްދާ ހަލަބޮލިކަމުގެ ތެރެއިން މުޅި ގައުމު ބަނގުރޫޓުވެ، ސިޔާސީ ހަނގުރާމައިގެ ހޫނުގައި ދިވެހި ރައްޔިތުން އަނދާ އަޅިއަށް ވެގެން ހިނގައިދާނެއެވެ. އެމްޑީޕީން މިވަނީ އެތެރޭގެ ކުޑަ ހަނގުރާމަ ކާމިޔާބު ކޮށްފައެވެ. ނަމަވެސް، ނަޝީދާއި ފައްޔާޒްގެ ބެއްލެވުމުގެ ދަށުން "ބޮޑު" ރިޔާސީ އިންތިޚާބު ކާމިޔާބު ކުރުމަކީ ކުރިއަށްވުރެ ވެސް އުނދަގޫ ކަމަކަށް ވާނެއެވެ.