އެމެރިކާއިން ބޭނުންވާ ގޮތަށް ހުށަހަޅައިފައިވާ ޑީލަށް އެއްބަސްނުވެއްޖެނަމަ އީރާނާ ދެކޮޅަށް ފެބްރުއަރީ 28 ގައި އެމެރިކާ-އިސްރާއީލު އިއްތިހާދުން ފެށި ހަނގުރާމަ، ވަކި މުއްދަތެއް ނެތް ގޮތަށް މިހާރު މެދުކަނޑައިލައިފައި އޮތަސް، އަލުން ފަށައި، ހަމަލާތައް ކުރިއަށްވުރެ ވަރުގަދަކުރާނެކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

"އަހަރެމެން ހުށަހެޅި ޑީލަށް އީރާނުން އެއްބަސްވެއްޖެނަމަ ހަނގުރާމަ ހުއްޓައިލާނަން. އެކަމަކު އީރާނުން އަހަރެމެންގެ ޑީލަށް އެއްބަސްނުވެއްޖެނަމަ މާ ވަރުގަދަކޮށް އީރާނަށް ބޮންއަޅަން ފަށައިނަން،" ޓްރަމްޕް (ފޮޓޯ) ވިދާޅުވިއެވެ.

އޭނާ އިތުރަށް ވިދާޅުވީ އީރާނުން މި ކަމާ ވިސްނަން ފުރުސަތު ދިނުމުގެ ގޮތުން، ދުނިޔޭގެ ފަސްބައިކުޅަ އެއްބައި ތެޔޮ ދަތުރުކުރާ، އީރާންގެ ބާރުގެ ދަށުގައި އޮންނަ ހުރުމުޒު ކަނޑުއޮޅިން އުޅަނދުފަހަރު އެމެރިކާގެ ހިމާޔަތުގައި ދަތުރުކުރުމަށް ފެށި އޮޕަރޭޝަން މި ވަގުތަށް މެދުކަނޑައިލައިފި ކަމަށެވެ.

އީރާންގެ އިސްލާމީ އިންގިލާބީ ލަޝްކަރުން ބުނީ އެމެރިކާއިން ހުށަހަޅައިފައިވަނީ އެމެރިކާއިން ބޭނުންވާ ހުވަފެނީ އެދުންތަކެއް ކަމަށާއި އެއީ ހަގީގަތަށް ހެދިދާނެ ކަންތައްތަކެއް ނޫން ކަމަށެވެ.

"ހުރުމުޒުން އުޅަނދުފަހަރަށް ދަތުރުކުރަން އަހަރެމެން ހުއްދަ ދޭނީ އެމެރިކާއިން އަހަރެމެންނަށް ބިރުދެއްކުން ހުއްޓައިލުމުން،" އެ ލަޝްކަރުގެ އޮފިޝަލަކު ބުންޏެވެ.

ހުރުމުޒުގެ ކުރިމަތިލުންތަކަށް ޓްރަމްޕް މިހާރު ނިންމުމެއް ގެންނަވައިފައިވާތީ ދުނިޔޭގެ ބާޒާރުގައި ތެޔޮ ފީފާއެއްގެ އަގު މިއަދު ހުރީ 103 ޑޮލަރު (1،588ރ.)އަށް ދަށްވެފައެވެ. އެއީ އިއްޔެ 114 ޑޮލަރު (1،757ރ.)ގައި ހުރެފައެވެ.

ބައެއް ދިރާސާވެރިން ބުނީ ހުރުމުޒު އީރާނުން ބަންދުކޮށްފައި އޮތްއޮތުމުގެ މައްސަލައަށް ފުރިހަމަ ހައްލެއް ނުލިބިއްޖެނަމަ މި އަހަރުގެ ބާކީ ބައިގައި ދުނިޔޭގެ ބާޒާރުގައި ތެޔޮ ފީފާއެއްގެ 100 ޑޮލަރު (1،542ރ.)އަށްވުރެ ދަށަށް ނުދިއުމަކީ އެކަށީގެންވާ ކަމެއް ކަމަށެވެ.

މީގެ އިތުރުން، ދުނިޔޭގެ ސަޕްލައި ޗެއިންތަކަށް ބުރޫއަރައިފައިވާތީ އީރާނާއެކު އެމެރިކާއިން ސުލްހަ ވިޔަސް މުޅި މި އަހަރު ވެސް ދުނިޔޭގެ ބާޒާރުގައި ތެޔޮ ފީފާއެއްގެ އަގު 80 ޑޮލަރު (1،233ރ.)އަށްވުރެ ދަށް ނުވާނެ ކަމަށް ބެލެވޭ ކަމަށް އިންވެސްޓްކުރާ ބައެއް ކުންފުނިތަކުން ބުނެފައިވެއެވެ.

އެމެރިކާ-އިސްރާއީލު އިއްތިހާދުން އީރާނާ ދެކޮޅަށް ފެބްރުއަރީ 28 ގައި ހަނގުރާމަ ފެށުމުގެ ކުރިން ދުނިޔޭގެ ބާޒާރުގައި ތެޔޮ ފީފާއެއްގެ އަގު ހުރީ 71 ޑޮލަރު (1،094ރ.)ގައެވެ.