މިހާތަނަށް 24 މީހުން މަރުވެފައިވާ ތައިލެންޑްގެ ފެންބޮޑުވުމުގައި، ވެރިރަށް ބެންކޮކްގެ މަގެއްގައި ޖެޓްސްކީން ސޯޝަލް މީޑިއާ ސްޓަންޓެއް ޖެއްސި މީހަކަށް އަދަބު ދީފިއެވެ.

ގާތްގަނޑަކަށް 3.3 މިލިއަނަށްވުރެ ގިނަ މީހުންނަށް އަސަރުކޮށްފައިވާ ފެންބޮޑުވުމުގައި އުމުރުން 28 އަހަރުގެ ސޯން ކީޓްސީރި ޖެޓްސީން ސްޓަންޓެއް ޖެއްސީ މި ދިޔަ އާދީއްތަ ދުވަހުއެވެ. އޭނާގެ ރަހްމަތްތެރިން އޭނާގެ ސްޓަންޓް ވީޑިއޯކޮށްފައި ސޯޝަލް މީޑިއާށް ލުމުން އެ ވީޑިއޯވަނީ ވައިރަލްވެ، އެތައް ބައެއްގެ ނުރުހުން އޭނާއަށް އަމާޒުވެފައެވެ.

ނިއު ޕެޓްބުރީ މަގުގައި ޖެޓްސްކީ ސްޓަންޓް ޖެއްސުމުގެ ސަބަބުން އުފެދުނު ރާޅުތައް މަގުމަތީގައި ތިބި މީހުންނަށާއި ކައިރީގައި ހުރި އިމާރާތްތަކަށް ފޯރިއެވެ.

ދައުލަތުން އޭނާގެ މައްޗަށް ދައުވާކުރީ އާއްމު އުނދަގުލުގެ އަމަލެއްކުރިކަމަށާއި ޓްރެފިކަށް ހުރަސްއެޅުމުގެ ކުށްކުރިކަމަށެވެ.

ކޯޓުން އޭނާއަށްކުރީ 15 ދުވަހުގެ ސަސްޕެންޑެޑްކުރެވިފައިވާ ޖަލު ހުކުމަކާއި، 5،000 ބާތު (148.85 ޑޮލަރު ނުވަތަ 2،295.27ރ.)ގެ ޖޫރިމަނާއަކާއި އެއް އަހަރުގެ ޕްރޮބޭޝަނާއި އިޖުތިމާއީ މަސައްކަތެވެ.

"އަހަރެންގެ މަގުސަދަކަށްވީ މާޔޫސް ދަނޑިވަޅެއްގައި މީހުން ހެއްވައިލުން. ނަމަވެސް އަހަރެންނަށް ކުރެވުނު ކަންތަކާ މިހާރު ހިތާމަކުރަން،" ތަހުގީގުކުރާ މީހުންނަށް ސޯން ބުންޏެވެ.

ރެޕް ލަވަކިޔުންތެރިޔާ ޓަނަޔުޓް ނަ އަ ޔުޓްޓަޔާ ސޯނަށް ފާޑުކިޔެވެ.

"ފެންބޮޑުވުމުގެ ސަބަބުން އާންމުން އުފުލަން ޖެހޭ ހަގީގީ ތަކުލީފުތައް ވައިރަލް ކޮންޓެންޓް ހަދާ މީހުންނަށް ދުވަހަކުވެސް ވަޒަންކުރާކަށް ނޭނގޭނެ،" އޭނާ ބުންޏެވެ.