ޖޯޝުއާ އެންޑްރޫ އޮސްޓްރޭލިއާގައި ދަތުރުކުރަމުންދަނިކޮށް އޭނާގެ އާއިލާއިން ގުޅައިފައި ބުނީ ބައްޕަ ޑޭވިޑްގެ ގުރުދާގެ މަސައްކަތްކުރުން ދަށަށްދާން ފަށައިފިކަމަށެވެ.

އެހެންކަމުން ޖޯޝުއާ ނިންމީ އޭނާގެ ގުރުދާއެއް ހަދިޔާކުރުމަށެވެ.

އުމުރުން 57 އަހަރުގެ ޑޭވިޑް ތަހައްމަލު ކުރަމުންދިޔައީ ގުރުދާއިން ލޭ ނުފުރާނާ މައްސަލައެވެ. އެއީ 10 ވަރަކަށް އަހަރު ކުރިން ނޮން-ހޮޖްކިން ލިމްފޯމާއަށް ފަރުވާ ހޯދުމަށް ދިން ކީމޯތެރަޕީގެ ސަބަބުން ކުރިމަތިވި ހާލަތެކެވެ.

އުމުރުން 23 އަހަރުގެ ޖޯޝުއާ މި ދިޔަ އަހަރުގެ ރަބީއު މޫސުމުގެ ފަހުކޮޅު އޮސްޓްރޭލިއާގެ ގޯލްޑް ކޯސްޓް ސިޓީގައި ހުރުމަށްފަހު، އޮޕަރޭޝަންގެ ތައްޔާރީތައް ފެށުމަށްޓަކައި އިނގިރޭސި ވިލާތުގެ ވެރިރަށް ލަންޑަންގެ ސައުތުގޭޓަށް އެނބުރި ދިޔައެވެ.

ޖޯޝުއާ ހަދިޔާކުރި "އެއްޗަކުން" އޭނާގެ ބައްޕަގެ ފުރާނަ ސަލާމަތްވި މިއީ ފުރަތަމަ ފަހަރެއް ނޫނެވެ. މީގެ ކުރިންވެސް ޑޭވިޑްގެ ކެންސަރުގެ ފަރުވާގެ ބައެއްގެ ގޮތުގައި ޖޯޝުއާވަނީ ބޯން މެރޯ ނުވަތަ ކަށީގެ މަދު ހަދިޔާކޮށްފައެވެ.

ދެބަފައިންގެ ދިފާއީ ނިޒާމު އެއްގޮތްވުމާއެކު، ޖޯޝުއާގެ ގުރުދާ ޑޭވިޑްއާ މުޅިން ގުޅެއެވެ.

މި ދިޔަ އަހަރު ކުރީކޮޅު ރޯޔަލް ފްރީ ހޮސްޕިޓަލްގައިކުރި އޮޕަރޭޝަނަށްފަހު، ދެބަފައިން ރަނގަޅުވީ ގޭގައި ހުރެގެންނެވެ.

"އެންމެ މުހިންމު ކަމަކީ، އަހަރެންނަށް އެނގުނު އަހަރެން ބޭނުންވީ އަހަރެންގެ ބައްޕައަށް އެހީވާންކަން. ރޯޔަލް ފްރީ ހޮސްޕިޓަލުގެ ނަރުހުންނާއި ސާޖަރީ ޓީމުންވަނީ ވާންއުޅޭ ކަންކަމުގެ ހުރިހާ ތަފްސީލެއް ކިޔައިދީފައި،" ޖޯޝުއާ ބުންޏެވެ.

"މި ތަނުގެ ޓީމު ވަރަށް ރަނގަޅު. ޖޯޝުއާއާމެދު އަހަރެން ކަންބޮޑުވި. ނަމަވެސް އެ މީހުން އަހަރެމެންގެ ހިތްހަމަޖައްސައިދީ، ހުރިހާ ކަމެއް ވަރަށް ސާފުކޮށް ކިޔައިދިން،" ޑޭވިޑް ބުންޏެވެ.

ޑޭވިޑްގެ ސިއްހީ ހާލަތު ކޮންމެ ގޮތަކަށް ހުއްޓަސް އޮޕަރޭޝަން ކުރިއަށްގެންދިޔައެވެ.

ސައިކަލު އެކްސިޑެންޓެއްގައި 2024 ގެ ކުރީކޮޅު އޭނާގެ ކަރު ބިންދައިގެން ދިޔައެވެ. އޭނާއަށްވަނީ ކުއްލި ސާޖަރީއެއް ހަދައި، ހަށިގަނޑަށް ހަކަތަ އަލުން ގެނައުމަށް އެކި ކަހަލަ ރީހެބިލިޓޭޝަން ފަރުވާތައް ދީފައެވެ.

"އަހަރެންނަށް ޖެހުނު އެ ވަގުތުގެ ހާލަތަށް އާދަވާން. އަހަރެންނަށް އަލުން ހިނގޭ ގޮތްވި. ނަމަވެސް އަދިވެސް ކަނާތު ފައި ނިކަމެތި. އަހަރެންނަކަށް ނުދުވެވޭ، އަދި އެ އެކްސިޑެންޓަށްފަހު ސައިކަލެއްވެސް ނުދުއްވަން. ދެން ދުވަހަކު ދުއްވޭނެކަމެއްވެސް ނޭނގޭ،" ޑޭވިޑް ކިޔައިދިނެވެ.

ޖޯޝުއާ ބުނީ ދަތުރުކުރުމުގެ ތެރޭގައި "އުމުރު ދުވަހަށް ދެމިގެންދާ ކަހަލަ ރަހްމަތްތެރިން" އޭނާއަށް ލިބުނުކަމަށެވެ. އަދި ކައިރި ކުރިމަގެއްގައި އެނބުރި އޮސްޓްރޭލިއާއަށް ދެވޭނެކަމަށް އުއްމީދުކުރާކަމަށެވެ.

ޖޯޝުއާގެ މަންމަ ލުއިސް ބުނީ ފިރިމީހާ ޑޭވިޑް އަދި ދަރިފުޅު ޖޯޝުއާއާމެދުވެސް ފަހުރުވެރިވާކަމަށެވެ.

"އަހަރެން އެ ދެ މީހުންނާމެދުވެސް ވަރަށް ފަހުރުވެރިވަން. އެ ކަން ބަހުން ބުނެދޭން އަސްލު އުނދަގޫ. ޑޭވިޑަށް ދިމާވާ ކޮންމެ ކަމެއްވެސް ޑޭވިޑް ބަލައިގަނެ، އެންމެ ރަނގަޅު ފުރުސަތު ހޯދުމަށްޓަކައި ކުރަންޖެހުނު ކޮންމެ ފަރުވާއެއް ޑޭވިޑް ކުރިއަށްގެންދާތީ. އަދި ޖޯޝުއާ 'އަހަރެންގެ ބައްޕައަށް އަހަރެން އެ ކަން ނުކޮށްދޭންވީ ކީއްވެގެންހޭ؟' ބުނެ، އެ ކަން ކޮށްދިނީތީ،" ލުއިސް ބުންޏެވެ.

ދެބަފައިންގެ ފަރުވާގެ ކަންކަމުގައި އެހީތެރިވި، ގުނަވަން ހަދިޔާކުރުމުގެ ކަންތައްތައް ބަލަހައްޓައި ވިލަރެސްކުރުންތެރިޔާ އެލިސަން ރިޗާޑްސަން ބުނީ "ޖޯޝުއާއަކީ ހައިރާންކުރުވަނިވި ޒުވާނެއް"ކަމަށެވެ.

"އޭނާގެ ބައްޕައަށްޓަކައި އެ ކަން ކޮށްދެވުނީތީ އޭނާ ހުރީ ވަރަށް އުފަލުން. އަދި އޭނާއަށް އެހީތެރިވެދެވުމަކީ އަހަރެންނަށް ލިބުނު އުފަލެއް. އޭނާގެ އުމުރަކީ އެންމެ 23 އަހަރު އަދި އޭނާވަނީ އެއް ފަހަރަކު ނޫން ނަމަވެސް ދެ ފަހަރަށް އޭނާގެ ބައްޕަ ސަލާމަތްކޮށްދީފައި،" ރިޗާޑްސަން ބުންޏެވެ.