ފްލައިދުބާއީގެ ފްލައިޓެއްގެ ކޯޕައިލެޓް، އެ ފްލައިޓުގެ ޕައިލެޓަށް ވަޅިން ހަމަލާދިން ހާދިސާއެއް ތަހުގީގުކުރަން ފަށައިފިއެވެ.

ޔުނައިޓެޑް އަރަބް އެމިރޭޓްސް (ޔޫ.އޭ.އީ)ގެ ދުބާއީން އިސްރާއީލުގެ ތެލް އަވީވަށް އިއްޔެ ދަތުރުކުރި ފްލައިދުބާއީގެ ފްލައިޓް އެފް.ޒެޑް.1073 ގައި އުމާންގެ ކޯޕައިލެޓް ހަމަލާދިނުމުން، އިންޑިއާގެ ކެޕްޓަން ސްމިތް މައްޗާރުވަނީ ދިމާވާން އުޅުނު ބޮޑު ނުރައްކަލަކުން ފްލައިޓް ސަލާމަތްކޮށްދީފައެވެ.

ފްލައިދުބާއީން ބުނީ ކޮކްޕިޓް ތެރޭގައި ހިންގި ހަމަނުޖެހުމުގެ ސަބަބު އަދި ސާފުނުވާކަމަށެވެ.

ހަމަލާދިން އުމާންގެ ކޯޕައިލެޓްގެ މައުލޫމާތު އަދި ހާމަކޮށްފައެއް ނުވެއެވެ.

ބޯޓުވަނީ ސައޫދީ އަރަބިއްޔާގެ ތަބޫކަށް ރައްކާތެރިކަމާއެކު ޖައްސައިފައެވެ. ކެޕްޓަން ފިޔަވައި އޭގައި ތިބި އެހެން އެއްވެސް މީހަކަށް ގެއްލުމެއް ނުލިބެއެވެ.

ބޯއިންގް 737 މަރުކާގެ ބޯޓު 30 ސިކުންތު ތެރޭގައި ގާތްގަނޑަކަށް 14،000 ފޫޓު ތިރިއަށް ވެއްޓެން ދަނިކޮށް، އަނިޔާވި މައްޗާރުވަނީ ކޮކްޕިޓްގެ ދޮރު ހުޅުވައިފައެވެ. އެއާއެކު ފަސިންޖަރުންނާއި ފަޅުވެރިން ކޮކްޕިޓަށް ވަދެ ކޯޕައިލެޓް ކޮންޓްރޯލްކޮށް، ފްލައިދުބާއީގެ އިތުރު ދެ ޕައިލެޓުންގެ އެހީތެރިކަމާއެކު ބޯޓުގެ ކޮންޓްރޯލް އަނބުރާ ހޯދިއެވެ.

މުމްބާއީއަށް ނިސްބަތްވާ މައްޗާރަށް ބޮޑެތި އަނިޔާތަކެއް ލިބިގެން އޮޕަރޭޝަނެއް ކޮށްފައިވާއިރު، ސައޫދީގައި ހުންނަ އިންޑިއާ އެމްބަސީން ބުނީ އޭނާގެ ހާލު މިހާރު ރަނގަޅުވަމުންދާކަމަށެވެ.

"މައްޗާރަކީ އޭނާގެ ހިތްވަރުން ބޮޑު ނުރައްކަލަކުން އެންމެން ސަލާމަތްކޮށްދިން ބަތަލެއް،" އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވިއެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ބުނީ "މައްޗާރުވަނީ 174 މީހުންގެ ފުރާނަ ސަލާމަތްކޮށްދީފައި" ކަމަށެވެ.

ފްލައިޓުން ދަތުރުކުރި ފަސިންޖަރެއްކަމަށްވާ ލީޓަލް ޝެޗަފް ހާދިސާ ސިފަކުރީ "ބިރުވެރި، ނުރައްކާތެރި" ތަޖުރިބާއެއްގެ ގޮތުގައެވެ. އަދި ސަލާމަތްވުމުން އުފާކުރާ ކަމަށް އޭނާ ބުންޏެވެ.

"މިއީ އެއްވެސް އެއްޗެއް ވިސްނާލުމެއް ނެތް ގޮތަށް، އަމިއްލަ ދަރިފުޅާއި އާއިލާގެ ފުރާނަ ސަލާމަތްކުރަން ދުއްވައިގަންނަ ފަދަ ދަނޑިވަޅެއް،" ކޯޕައިލެޓް ހިފަހައްޓަން އެހީތެރިވި ފަސިންޖަރު އަސަފް ރަޖުއާން ބުންޏެވެ.

މި ހާދިސާއާ ގުޅޭގޮތުން މައްޗާރު ނުވަތަ އޭނާގެ އާއިލާއިން އަދި އެއްވެސް އެއްޗެއް ނުބުނެއެވެ.