މެލޭޝިޔާގައި ކިޔަވަމުންދާ ދަރިވަރެއްގެ ފޯނު ގެއްލުމަށްފަހު ފެނުނުއިރު އޭގައި ހުރި ރާމާމަކުނެއްގެ ސެލްފީތަކެކެވެ. ބާތޫ ޕަހަތް އަށް ނިސްބަތްވާ އުމުރުން 20 އަހަރުގެ ޒެކްރީޒް ރޮޑްޒީ ހުކުރު ދުވަހުގެ ރޭ ނިދަން އޮށޯތީ ފޯނު ކައިރީގައި ބާއްވައިފައެވެ. ނަމަވެސް ހޮނިހިރު ދުވަހު ހޭލިއިރު ފޯނު ފެންނާކަށް ނެތެވެ.
"ވައްކަމެއްގެ ނިޝާނެއް ނެތް ހޭލެވުނު އިރަކު. އަހަރެންނަށް ފުރަތަމަ ވެސް ވިސްނުނީ މީ ކޮންމެވެސް ކަހަލަ ސިހުރެކޭ،" ކޮމްޕިއުޓަރ ސައިންސް ކިޔަވަމުންދާ ޒެކްރީޒް ބުންޏެވެ.
ފޯނު ޓްރެކް ކޮށްގެން ބެލިއިރު ފޯނު އޮތް ކަމަށް ދެއްކީ އޭނާ ދިރިއުޅޭ ގޭގެ ފަހަތުގައި އޮންނަ ޖަންގައްޔެއްގައެވެ. އޭނާ ބުނިގޮތުން އޭނާގެ ބައްޕަ އެ ފޯނަށް ގުޅަމުން ދަނިކޮށް ރިންގްވާ އަޑު އިވިގެން ބެލިއިރު އޮތީ ޖަންގަލީގެ ތެރޭގައި ހުރި ރުކެއްގެ ބުޑުގައެވެ.
ފޯނު ނެގި މީހާގެ ފޮޓޯ ފޯނުގައި ހުރެދާނޭ ކަމަށް ޒެކްރީޒްގެ ބޮޑު ބޭބެ މަޖަލަކަށް ބުނުމުން ފޯނުގެ ގެލެރީ ބެލިއިރު، އޭގައި ހުރީ ރާމާމަކުނުތަކެއްގެ ސެލްފީތަކަކާއި ވީޑިއޯތަކެކެވެ. އެއް ވީޑިއޯގައި ރާމާމަކުނު ފޯނު ކާލަން މަސައްކަތް ކުރާ ތަންވެސް ފެނެއެވެ.
A Malaysian man went bananas after discovering that his lost phone contained selfies and footage shot by a monkey! 🐒 Zackrydz Rodzi found the phone behind his home, covered in dirt and water. pic.twitter.com/ckkHPF8pfB
— Breakfast Television Toronto (@BTtoronto) September 16, 2020
އޭނާގެ އާއިލާއާއި ރައްޓެހިންނަށް މި ފޮޓޯތައް ދެއްކުމަށްފަހު ޓްވިޓަރގައިވެސް އޭނާ އެ ފޮޓޯތައް ޕޯސްޓްކުރިއެވެ. ޖުމްލަ 2.5 ލައްކައަށް ވުރެ ގިނަ މީހުންގެ ސަމާލުކަން އެ ޕޯސްޓަށް ލިބުނެވެ.
ހީވާ ގޮތުގައި ކުޑަދޮރު ހުޅުވާފައި ހުރި ގަޑިއެއްގައި ރާމާމަކުނު ގެއަށް ވަދެ، ފޯނު ހިފައިން ގޮސް އުޅެނިކޮށް ޖަންގަލި ތެރެއަށް ވެއްޓުނީ ކަމަށް ޒެކްރީޒް ބުނެއެވެ.