ޣައްޒާގެ އިރުމަތީ އަވަށެއް ކަމުގައިވާ ތުއްފާޙު އަވަށުގެ ޤަބުރުސްތާނުތައް ކޮނެ މައްޔިތުންގެ ހަށިތައް ވަގަށްނަގަމުންދާ ކަމަށް ޙަމާސުން ތުހްމަތުކޮށްފިއެވެ.

ޙަމާސުން ބުނާގޮތުގައި އިސްރާއީލު ސިފައިން ވަނީ 1,100 މަހާނަކޮނެ 150 ހަށިގަނޑު ވަގަށް ނަގައިފައެވެ. މިއީ ވަރަށް ފަހުން ވަޅުލި މީހުންގެ ހަށިތަކެއް ކަމަށް ވެސް ޙަމާސުން ބުންޏެވެ. އިސްރާއީލު ސިފައިން މި ހަށިތައް ގެންދިޔައީ ކޮންތާކަށް އަދި ކީއްކުރަން ކަމެއް ނޭނގެއެވެ.

މަހާނަތައް ކޮނެ މައްޔިތުންގެ ހަށިގަނޑުތައް ނަގައި އެ ހަށިގަނގުތަކަށް ގެއްލުންދިނުމަކީ ހުރިހާ ޤާނޫނުތަކެއްގައްޔާއި ބައިނަލްއަޤްވާމީ ޢުރުފުގައި މަނާކަމެކެވެ.

މީގެ ކުރިން އިސްރާއީލު ސިފައިން ވަނީ ރަފަޙުގައި ފަލަސްޠީނުގެ 80 މީހެއްގެ ހަށިގަނޑު ފަޅައި އެމީހުންގެ ގުނަވަންތައް ވަގަށް ނަގައިފައެވެ. ރެޑް ކްރޮސް ޖަމްޢިއްޔާއިން ބުނާގޮތުގައި މި މީހުންގެ ހަށިގަނޑުތައް އެ ޖަމްޢިއްޔާއާ ޙަވާލު ކުރީ މި ހަށިގަނޑުތައް ފަޅައި ގުނަވަންތައް ނެގުމަށްފަހުގައެވެ.

މިފަދަ ޖަރީމާތައް ކުށްވެރިކުރުމަށާއި އެ ކަންކަން ހުއްޓުވުމަށް ޓަކައި ފިޔަވަޅުއެޅުމަށް ޙަމާސުން ދުނިޔޭގެ ސަރުކާރުތަކަށާއި އިންސާނީ ޙައްޤުތަކާބެހޭ ޖަމޢަތްތަކަށާއި އދ ގެ ކަމާބެހޭ ޖަމްޢިއްޔާތަކަށް ގޮވައިލިއެވެ.