ދުނިޔޭގެ އިޤްތިޞާދުގެ މައްޗަށް ޑޮލަރު އަތްގަދަކޮށްފައި އޮތްއޮތުން ނިމުމަކަށް  ގެނައުމަށާއި ގިނަ ތަނޑިތައް ހިމެނޭ ޢާލަމީ ނިޒާމެއް ޤާއިމުކުރުމަށް ބްރިކްސްގެ ޒަޢީމުން މިއަދު ގޮވައިލައްވައިފިއެވެ.

ދެކުނު އެފްރިކާގެ ޖޮހެނަސްބަރގްގައި މިހާރު ކުރިއަށްދާ ބްރިކްސް ސަމިޓްގައި ދުނިޔޭގެ އިޤްތިޞާދު ދުޅަހެޔޮ ކުރުމަށް ޓަކައި ބްރިކްސްގެ ދައުރު ހަރުދަނާކުރުމަށާއި ބްރިކްސް ޖަމާޢަތް ފުޅައު ކުރުމަށް ވެސް އެ ބޭފުޅުން ގޮވައިލެއްވިއެވެ.

ބްރިކްސް ސަމިޓްގެ މި ފަހަރުގެ ޝިޢާރަކީ "ބްރިކްސްއާއި އެފްރިކާ: ހެދިބޮޑުވުމަށާއި ދެމެހެއްޓެނިވި ތަރައްޤީއަށާއި ގިނަ ތަނޑިތަކެއްގެ ދުނިޔެއަކަށް ޓަކައި ބައިވެރިވުން" އެވެ.  

ބްރިކްސް ޒަޢީމުންގެ ވާހަކަފުޅުތަކުގެ އުސް އަލިތައް:

• ލޮޖިސްޓިކް މަސްއަލަތަކާ ބެހޭގޮތުން ކޮމެޓީއެއް އެކުލަވައިލުމާއި މި އަންނަ އަހަރު އެ ކޮމެޓީގެ ރިޔާސަތު ރަޝިޔާއިން ބެލެހެއްޓުމަށް ރައީސް ޕޫޓިން ހުށައެޅުއްވިއެވެ. މި ގޮތަށް ރައީސް ޕޫޓިން ހުށައެޅުއްވީ ބްރިކްސްގެ ރިޔާސަތު ދެން ލިބޭނީ ރަޝިޔާއަށް ކަމަށް ވާތީއެވެ. 
• ބައިނަލްއަޤްވާމީ ޤާނޫނާއި އދގެ ޗާޓަރާ އެއްގޮތަށް ބައިނަލްއަޤްވާމީ އިންސާފުވެރި ނިޒާމެއް ދުނިޔޭގައި ޤާއިމުކުރުމަށް ބްރިކްސް އެދޭ ކަމަށް ރައީސް ޕޫޓިން ވިދާޅުވިއެވެ. 
• ވިޔަފާރީގެ މުޢާމަލާތުތަކުގައި ޤައުމީ ފައިސާގެ ދައުރު ވަރުގަދަކުރުމަށާއި ސުމޭކު ފައިސާއަށް ބަދަލުވުމަށް ރައީސް ޕޫޓިން ހުށައެޅުއްވިއެވެ.
• ތަފާތު މަޝްރޫޢުތަކަށާއި ތަފާތު މައިދާންތަކާ ބެހޭ އެއްބަސްވުންތަކަށް އިޖާބަ ދިނުމަށް ރަޝިޔާ އޮތީ ހުޅުވިގެން ކަމަށް ރައީސް ޕޫޓިން ވިދާޅުވިއެވެ.
• ދެކުނު އެފްރިކާގެ ރައީސް ރަމަފޯޒާ ހުށައެޅުއްވި ގޮތަށް  އަންހެނުންގެ ޙައްޤުތަކާ ބެހޭ ކޮމެޓީއެއް އުފެއްދުމަށް ރައީސް ޕޫޓިން ތާއީދު ކުރެއްވިއެވެ.
• ޤައުމުތަކަށް ދަރަނި ދިނުމުގައި ޝަރްޠުތައް ކަނޑައެޅުމުގައި ހުރިހާ ޤައުމުތަކެއް ހަމަހަމަކުރުމަށް ބްރެޒިލްގެ ރައީސް ލޫލާ ޑަ ސިލްވާ ގޮވައިލެއްވިއެވެ.

• ރައީސް ލޫލާ ޑަ ސިލްވާ ވިދާޅުވި ގޮތުގައި ވިޔަފާރީގެ މުޢާމަލާތުތަކުގައި ބްރިކްސްގެ މެންބަރުން އެއް ފައިސާއެއް ގެންގުޅުމަކީ  ބްރިކްސްގެ ބަލިފައި ވަރުގަދަކޮށްދޭނެ ކަމެކެވެ.
•  ހަވާގެ މައިދާނުގައި އެއްބާރުލުން އިތުރުކުރުމަށް އިންޑިޔާގެ ބޮޑުވަޒީރު ނަރިންދްރާ މޯދީ ގޮވައިލެއްވިއެވެ. އޭނާ ބްރިކްސް އަށް ޚާއްޞަ ހެދި ހަނދު ޖަމާޢަތެއް އުފެއްދުމަށް  ގޮވައިލެއްވިއެވެ. އަދި މުޅި އިންސާނިއްޔަތަށް ލާބަ ލިބިދޭ ގޮތަށް ހަވާޔާ ބެހޭ ދިރާސާތައް ކުރާ މަރްކަޒެއް ޤާއިމު ކުރުމަށް ވެސް ބޮޑުވަޒީރު މޯދީ ގޮވައިލެއްވިއެވެ. 
• ޖަމާޢަތް 20ގެ ފުރިހަމަ މެންބަރުކަން އެފްރިކާގެ ޤައުމުތަކަށް ދިނުމަށް ބޮޑުވަޒީރު މޯދީ ހުށައެޅުއްވިއެވެ.
• ޗައިނާގައި އިޞްތިނާޢީ ވިސްނުމާ (އާޓިފިޝަލް އިންޓަލިޖެންސް) ބެހޭ މަރްކަޒެއް ހުރިކަން ރައީސް ޝީ ފާހަގަކުރެއްވިއެވެ. އިޞްތިނާޢި ވިސްނުން މިހާރަށްވުރެ އަމާން ކަމަކަށް ހެދުމަށް ޓަކައި މި މަރްކަޒުގައި ޗައިނާގެ ހުރިހާ ރަޙްމަތްތެރިން ބައިވެރިވުމަށް ރައީސް ޝީ ޖިންޕިންގް ގޮވައިލެއްވިއެވެ. 
• ގިނަ ތަނޑިތަކެއްގެ އުޞޫލުގެ މަތީގައި ބްރިކްސް ޤައުމުތައް ތެދުވުމަށް ރައީސް ޝީ ގޮވައިލެއްވިއެވެ. އދގެ ދައުރު ހަރުދަނާކުރުމަށާއި މިހާރަށްވުރެ އިންސާފުވެރި ދުނިޔެއެއް ޤާއިމުކުރުމަށް ޓަކައި ބްރިކްސްއަށް އިތުރު މެންބަރުން ވެއްދުމަށް ޗައިނާގެ ރައީސް ގޮވައިލެއްވިއެވެ. ރައީސް ޝީ ވިދާޅުވި ގޮތުގައި ފިނިހަނގުރާމައިގެ ބުއްދިން ވިސްނުމަކީ މިއަދުގެ ދުނިޔެއާ ކުރިމަތިވެފައިވާ ކަންބޮޑުވުމެކެވެ. 
• ސުލްޙަވެރި އަމާން ތަރައްޤީއަށާއި އިސްތިރާޖީ ބައިވެރިވުމަށާއި ބްރިކްސްގެ މެންބަރު ޤައުމުތަކުގެ ޤައުމީ އަމްނަށް ކަށަވެތިވުމަށް ރައީސް ޝީ ބްރިކްސްގެ މެންބަރުންނަށް ގޮވައިލެއްވިއެވެ. ހޫނު ސަރަޙައްދުތަކުގައި ހިނގާ މަސްއަލަތަކަށް ސިޔާސީ ޙައްލެއް ގެނައުމަށް ޓަކައި ބްރިކްސްގެ މެންބަރުން މުހިއްމު ދައުރެއް ކުޅުމަށް ވެސް ޝީ ގޮވައިލެއްވިއެވެ.