ތައިވާނުގެ ނައިބު ރައީސް ވިލިޔަމް ލާއި މަގު ހުރަސްކުރުމުގެ ދަތުރުފުޅެއްގައި އެމެރިކާއަށް ޒިޔާރަތް ކުރެއްވުމުން ޗައިނާއިން އެ ކަން ކުށްވެރިކޮށްފިއެވެ. ތައިވާނުގެ ނައިބު ރައީސް ދަތުރުކުރެއްވި މަތިންދާބޯޓު ނިވްޔޯކަށް ޖެއްސީ ހޮނިހިރު ދުވަހުގެ ދަންވަރުގައެވެ. 

ޗައިނާއިން ސިފަކުރި ގޮތުގައި އެއީ "މަސްއަލަތައް އުފައްދާނެ" ކަމެކެވެ. އޭނާ ނިވްޔޯކްގައި މަޑުކޮށްލެއްވީ ޕެރަގުއޭއަށް ކުރައްވާ ދަތުރުފުޅެއްގައެވެ. ޕެރަގުއޭއަށް ވަޑައިގަންނަވަނީ އެ ޤައުމުގެ ރައީސްކަމަށް ބޭފުޅަކު އިސްކުރުމުގެ ރަސްމިއްޔާތުގައި ބައިވެރިވެ ވަޑައިގަތުމަށް ޓަކައެވެ. އޭނާ މި ރަސްމިއްޔާތުން ނިމިވަޑައިގެން ތައިވާނަށް އެނބުރި ވަޑައިގަންނަވާއިރު އެމެރިކާގެ ސޭންފްރޭންސިސްކޯގައި މަޑުކޮށްލައްވާނެއެވެ. އޭނާ ސޭން ފްރެންސިސްކޯއަށް ވަޑައިގަންނަވާނީ މި އަންނަ ހުކުރު ދުވަހުއެވެ. 

ލާއިއަކީ މިއަންނަ ޖަނަވަރީގައި ތައިވާނުގައި ބޭއްވޭ ރިޔާސީ އިންތިޚާބުގެ އެންމެ ބޮޑު ވާދަވެރިޔާއެވެ.

ތައިވާނުގެ ނައިބު ރައީސްގެ ދަތުރުފުޅާ ބެހޭގޮތުން ތައިބޭއިން ވެސް ވޮޝިންގްޓަނުން ވެސް އެއްވެސް ތަފްސީލެއް  ހާމައެއް ނުކުރެއެވެ. ޗައިނާގެ ޚާރިޖިއްޔާއިން ސިފަކުރިގޮތުގައި ލާއި އަކީ "ވަކިވެގަތްފައިވާ" ބޭފުޅެކެވެ. އަދި އޭނާއަކީ "އަބަދުވެސް މަސްއަލަތައް ކައްކުވަން އުޅުއްވާ" ބޭފުޅެކެވެ. ޗައިނާގެ ޚާރިޖިއްޔާއިން ބުނިގޮތުގައި ބޭޖިންގުން މި ދަނީ މި ކަން ވަރަށް ގާތުން ބަލަމުންނެވެ. ޗައިނާ ސަރުކާރު ބުނިގޮތުގައި މިއީ އެމެރިކާއިން ތައިވާނަށް ވާގިވެރިވަމުންދާކަމުގެ ޢަލާމަތެކެވެ. ޗައިނާ ބުނިގޮތުގައި ތައިވާނަކީ ޗައިނާއިން ވަކިކޮށް ނުލެވޭނެ ޗައިނާގެ ރަށެކެވެ.