ލިޔުންތެރިޔާ: މުހައްމަދު ސަލީމު

މުހައްމަދު ސަލީމަކީ ދިވެހި ނޫސްވެރިކަމުގެ އެންމެ ތަޖުރިބާކާރު އެއް ގަލަމެވެ. އޭނާ ނޫސްވެރިކަން ފެއްޓެވީ 1987 ގައި "އާފަތިސް" ނޫހުންނެވެ. އޭގެ ފަހުން "ހަވީރު" ނޫހާއި "މިއަދު" ނޫހުގެ އެޑިޓަރުކަން ކުރެއްވިއެވެ. އިޖުތިމާއީ ތަފާތު މައުލޫތަކަށް ޚަބަރާއި ރިޕޯޓާއި ކޮލަމް ލިއުއްވިއެވެ. މަޝްހޫރު ޅެންވެރިޔާ މަރުހޫމް ހޯރަފުށީ އާދަމް ސަލީމުގެ ދޮށީ ދަރިކަލުން ސަލީމަކީ ޅެންވެރިކަމުގެ ރޮނގުގައިވެސް އަރައިހުންނެވި ލިއުންތެރިއެކެވެ. ދޫހެލޭ ބަސްމޮށުންތެރިއެކެވެ. ވާހަކަ ދެއްކުމާއި ބަހުސްކުރުމުގެ ސްޓޭޖްތަކުން ރަންވަނަތައް ހޯއްދަވައިފައިވެއެވެ. ދިވެހި އަދަބިއްޔާތާ ބެހޭ ގޮތުން ސްކޫލްތަކުގައި ކިޔަވައިދެއްވައެވެ. ޓީވީގެ އެކިއެކި ޕްރޮގްރާމްތަކަށް ވެސް ގިނަ އަދަދަކަށް ރިޕޯޓް ލިއުއްވައެވެ. ގިނަ އަދަދެއްގެ ވާހަކަ ލިއުއްވައި ޝާއިއުކުރައްވައިފައިވެއެވެ. "ހަވީރު"ގެ ރަން ގަލަމުގެ އިތުރުން ދިވެހި ނޫސްވެރިކަމުގެ ރަން ގަލަމާއި އަލިމަސް ގަލަން ލިބިވަޑައިގެންފައިވާ ސަލީމަށް، ނޫސްވެރިކަމުގެ ރޮނގުން ޢާންމު ޚިދުމަތުގެ ހިތްވަރުދިނުމުގެ އިނާމުވެސް ވަނީ ލިބިވަޑައިގެންފައެވެ. އަދި ލިއުންތެރިކަމުގެ ރޮނގުން، ދިވެހިބަހުގެ އެކަޑަމީން ދެއްވާ "ހުސެއިން ޞަލާހުއްދީން އެވޯޑް" ވެސް ލިބިވަޑައިގެންފައިވެއެވެ.