ސޯޝަލް މީޑިއާގެ މި ޒަމާނުގައި "ކުރުކޮށް ފޮނިކޮށް" މައުލޫމާތު ލިބުނަސް މައުލޫމާތުގެ އެންމެ އަޑިއަށް ފީނޭނެ ގޮތަކީ ތަފުސީލު މައުލޫމާތުކަމަށްވާތީ ސިންގަޕޫރުން އާ އުކުޅެއް ތައާރަފުކޮށްފިއެވެ. މިހާރު ނެތެމުންދާ ފޮތް ކިޔުމުގެ އާދަ އަލުން އަށަގަންނުވަން މީހުން ފޮތް ކިޔަން ހިތްވަރެއްގެ ގޮތުގައި ފައިސާ ދެނީއެވެ.

ސިންގަޕޫރުގެ ފޮތް ކިޔުމުގެ ސަގާފަތް ވަރުގަދަކުރުމަށާއި ސިކުނޑި ކަންނެތްވުން ހުއްޓުވުމަށްޓަކައި ދުވާލަކު 15 މިނެޓު ފޮތެއް ކިޔުމަށް އެ ގައުމުގެ ރައްޔިތުންނަށް ބާރުއެޅުމުގެ ގޮތުން ފަސް އަހަރުގެ އާ ގައުމީ ޕްރޮގްރާމެއްވަނީ މި ދިޔަ މަހު ފަށައިފައެވެ.

ސަރުކާރުން ބުނީ މި ދިޔަ މަހުގެ ކުރީކޮޅު ގައުމީ ކުތުބުހާނާގެ ބޯޑުން "ރީޑް.އެސް.ޖީ"ގެ ނަމުގައި ފެށި ކެމްޕޭނުގެ ދަށުން އާންމުން އެ މީހުން ދުވަހުން ދުވަހަށް ފޮތް ކިޔާ ވަގުތު ރެކޯޑުކޮށް، ވާޗުއަލް އިނާމުތައް ހޯދޭނެކަމަށެވެ.

ޕްރޮގްރާމްގައި ބައިވެރިވާން ޝައުގުވެރިވާ ރައްޔިތުންނަށް ޕްރޮގްރާމްގެ ވެބްސައިޓަށް ނުވަތަ މޮބައިލް އެޕްލިކޭޝަނަށް ވަދެ އެ މީހުންގެ ފޮތް ކިޔުމުގެ ކުރިއެރުންތައް ރެކޯޑުކުރެވޭނެއެވެ.

"ފޮތް ކިޔުމުގެ އާދައެއް އަށަގަންނުވަން ބޭނުންވަނީ ދުވާލަކު އެންމެ 15 މިނެޓެވެ. އެއީ އެމް.އާރް.ޓީ ރޭލަކުން ތިން ސްޓޭޝަންގެ ދޭތެރޭގައި ހޭދަވާ ވަގުތު، ބަސް އަންނަންދެން އިންތިޒާރުކުރާ ވަގުތު، ނުވަތަ ހެނދުނުގެ ސައި ބޯލަން ހޭދަވާ ވަގުތެވެ. ކުދިކުދި ވަގުތުކޮޅުތަކުން ހަޔާތަށް ބޮޑެތި ބަދަލުތައް އާދެއެވެ. ދުވާލަކު 15 މިނެޓު ފޮތް ކިޔުމުން ވާސިލުވެވޭނެ ހިސާބެއް ހޯދައިބަލައިށެވެ!" ކެމްޕޭންގެ ވެބްސައިޓުގައި ބުނެފައިވެއެވެ.

ބޯޑުގެ ވެރިޔާ މެލިސާ ތާމް ބުނީ ކެމްޕޭނަކީ ދިގުކޮށް ލިޔެފައި ހުންނަ ލިޔުން ކިޔުމުން ލިބޭ ހުނަރުތަކާއެކު ދުނިޔޭގައި ކުރިއަރައިދިއުމަށް ކިޔުންތެރިންނަށް އެހީތެރިވުމުގެ ގޮތުންކުރާ މަސައްކަތެއްކަމަށެވެ.

"ކުރުކޮށް ހުންނަ މައުލޫމާތުތަކުން އަހަރެމެންނަށް މައުލޫމާތު އެނގުނަސް ދިގުކޮށް ހުންނަ ލިޔުން ކިޔުމުން ސަމާލުކަން ދިނުމާއި ފާޑުވެރިކަމާއެކު ވިސްނުމާއި އަދި ހިޔާލާތު ވަރުގަދަވޭ. އަހަރެމެން އަސްލު ބޭނުންވަނީ އޮޅުންފިލުވަން ބޭނުންވާ، ފުންކޮށް ވިސްނައި، ރަނގަޅާއި ނުބައި ވަކިކުރަން އެނގޭ، އަދި އިތުރަށް އޮޅުންބޮޅުންވަމުންދާ ދުނިޔެއެއްގައި ކުރިއަރައިދާން އެނގޭ ކިޔުންތެރިންގެ އުންމަތެއް ދެކެން،" އޭނާ ބުންޏެވެ.

ޕްރޮގްރާމްގައި ބައިވެރިވާން ބޭނުންވާ މީހުންނަށް ކެމްޕޭން ތައާރަފުކޮށްދިނުމަށް ފޮތްކިޔުމުގެ ތަފާތު "ރަހަތައް" ހުށަހަޅައިދެއެވެ. ފަށަލަ ފަށަލަ އެކުލެވޭ ގޮތަށް، ގަސްދެއް އޮވެގެން، އެހެން މީހުންނަށް ސަމާލުކަން ނުދެވޭ ކަންތައްތައް ފާހަގަކުރުމެވެ. ރަހަފޮނި، އުއްމީދީ އަދި އޮޅުންބޮޅުމުގެ ތެރެއަށް ވެއްޓިދާނެ ހާލަތްތަކަށް ހުށަހެޅުމެވެ. ކަމަކަށް އެދި މޮޅިވެފައި، ހިޔާލު ތަނަވަސް، ދަތުރުކުރާހިތްވާ، ނަމަވެސް ހަނދާނުން ނުފިލާނެ ކަންތައްތަކެއްގެ ތެރެއަށް ވަނުމެވެ. ނުވަތަ އާދައިގެ، މީހުން ބަލައިގަންނަ، އަދި އެ މީހަކު ބޭނުންވާ ގޮތެއް ނޫނީ ބޭނުންނުވާ ގޮތްވެސް އިހްތިޔާރުކުރުމުގެ މަގެވެ.

މަދުވެގެން 15 މިނެޓުގެ ފޮތް ކިޔުމުގެ ސެޝަނަކުން 20 ވާޗުއަލް ލާރިފޮތި ލިބޭއިރު 1،000 ލާރިފޮއްޗަކީ އެއް ސިންގަޕޫރު ޑޮލަރު (0.78 އެމެރިކާ ޑޮލަރު ނުވަތަ 12.03ރ.)އެވެ.

ނެޝަނަލް އިންސްޓިޓިއުޓް އޮފް އެޑިއުކޭޝަންގެ ދިރާސާވެރިޔާ ލޯ ޗިން އީ ބުނީ ފޮތް ކިޔުން ކުޅިވަރެއްގެ ގޮތުގައި ބައްޓަންކޮށް އެއީ އާދައަކަށް ބަދަލުކުރުމަކީ ސިންގަޕޫރުގެ މި އިސްނެގުމުގެ މައިގަނޑު އަސާސްކަމަށެވެ.

"ގިނައިން ފޮތް ކިޔާ މީހަކަށް 15 މިނެޓަކީ ވަރަށް ކުރު ވަގުތުކޮޅަކަށް ވެދާނެ، އެކަމަކު މިއީ ފަށައިގަންނަން ވަރަށް ގަޔާވާ ރަނގަޅު ވަގުތުކޮޅެއް ކަމަށް އަހަރެން ދެކެން،" އޭނާ ބުންޏެވެ.

"ސްކްރީނުން ލިޔުން ކިޔުމުގެ ވާހަކަ ދައްކާނަމަ ގިނަ މީހުން އަދިވެސް އެ ކަންކުރޭ. ނަމަވެސް ފުންކޮށް ކިޔުމާއި، އެ ކަމުގައި ވަގުތު ހޭދަކުރުމާއި، އަދި ކިޔުންތެރިކަމުގައި ދެމިތިބުން ފެންނަނީ މަދުން،" އޭނާ އިތުރަށް ބުންޏެވެ.