ގްލޯބަލް ދުކާންއިން ވިޔަފާރިކުރާ ދިވެހި ކަސްޓަމަރުންނަށް ފަސޭހަކަމާއެކު ފައިސާ ދެއްކޭނެ ގޮތް، މޯލްޑިވްސް ޕޯސްޓް މެދުވެރިކޮށް ތައާރަފުކޮށްފިއެވެ.

މޯލްޑިވްސް ޕޯސްޓް އިން ބުނާގޮތުގައި ކަސްޓަމަރުން ޗެކްއައުޓްކުރާ ގަޑީގައި "ޕޭ ތުރޫ މޯލްޑިވްސް ޕޯސްޓް" އިޚްތިޔާރު ކުރުމަށްފަހު، އެތަނުގައި ދީފައިވާ އިރުޝާދުތަކާ އެއްގޮތަށް ފައިސާގެ މުއާމަލާތް ފުރިހަމަކުރެވޭނެއެވެ. މިގޮތުން ފައިސާ ދައްކާއިރު ޝަރުތު ހަމަވާ ކަސްޓަމަރުން، ބޭނުންނަމަ ރުފިޔާއިން ފައިސާ ދެއްކުމަށްޓަކައި ޕޭމަންޓް ލިންކެއް ގްލޯބަލް ދުކާން އެޕްލިކޭޝަން މެދުވެރިކޮށް ލިބޭނެއެވެ.

"މި އައު ޚިދުމަތަކީ، ގްލޯބަލް ދުކާން މެދުވެރިކޮށް ތަކެއްޗަށް އޯޑަރުކުރާއިރު ބޭރުގެ ފައިސާއިން މުއާމަލާތްކުރާ ބައިނަލްއަގުވާމީ ޕޭމަންޓް މެތަޑްތަކުގެ ބަދަލުގައި، ރުފިޔާއިންވެސް ފަސޭހަކަމާއެކު ފައިސާ ދެއްކުމަށް ހުޅުވިގެންދިޔަ ރަނގަޅު ފުރުސަތެކެވެ." މޯލްޑިވްސް ޕޯސްޓް އިން ބުންޏެވެ.

"މި އިންތިޒާމުގެ ސަބަބުން ދިވެހިރާއްޖޭގެ ކަސްޓަމަރުންނަށް ގްލޯބަލް ދުކާންގެ ޚިދުމަތްތައް ހޯދުމުގައި އިތުރު ފަސޭހަތަކެއް ލިބި، ފައިސާ ދެއްކުމުގެ މަރުހަލާ ކުރިއަށްވުރެ ލުއިވެގެންދާނެއެވެ. އަދި ކުރިއެކޭވެސް އެއްފަދައިން، މޯލްޑިވްސް ޕޯސްޓާއި އިންޑިއާ ޕޯސްޓް ގުޅިގެން އިންޑިއާގެ އީކޮމާސް މާކެޓް ޕްލޭސް ގްލޯބަލް ދުކާން މެދުވެރިކޮށް ތަކެތި ގަތުމުން ދިވެހިރާއްޖޭގެ ކޮންމެ ހިސާބަކަށްވެސް ޑެލިވަރ ކޮށްދޭނެއެވެ. ގްލޯބަލް ދުކާންއިން ވިޔަފާރި ކުރުމަށް އިންޑިޔާގެ އެޑްރެސްއެއް ބޭނުމެއްނުވާނެއެވެ."

ގްލޯބަލް ދުކާންގައި ހިމެނޭ، އީކޮމާސް ޕްލެޓްފޯމްތަކުގެ ތެރޭގައި އެމެޒަން، މިންތްރާ، ފްލިޕްކާޓް، ނައިކާ، ނައިކާ ފެޝަން، އިކިއާ ފަދަ މަޝްހޫރު ގިނަ ޕްލެޓްފޯމް ހިމެނެއެވެ.

ދިވެހިންގެ ތެރޭގައި މަޝްހޫރުކަމާއި އިތުބާރު ލިބިފައިވާ މި ޕްލެޓްފޯމްތަކުން ފެޝަން އަދި ލައިފް ސްޓައިލް ޕްރޮޑަކްޓްސް އާއި އިލެޓްރޯނިކްސް އާއި އިލެޓްރޯނިކް އެކްސެސަރީސް އަދި ބަދިގެއަށް ބޭނުންވާ ސާމާނާއި ބިއުޓީ އެންޑް ވެލްނެސް ޕްރޮޑަކްޓްތަކާއި އެހެނިހެން ހުރިހާ ސާމާނެއްވެސް ގަނެވޭނެއެވެ.

ޕޯސްޓް އޮފީހުން ފާހަގަކުރާ ގޮތުގައި، ގްލޯބަލް ދުކާންއިން ވިޔަފާރިކުރާ ދިވެހި ކަސްޓަމަރުންނަށް ފަސޭހަކަމާއެކު ފައިސާ ދެއްކޭނެ ގޮތް ހަމެޖެހިގެން ދިއުމަކީ، ދިވެހީންނަށް އޮންލައިންކޮށް ވިޔަފާރިކުރުމަށާއި ގްލޯބަލް މާކެޓްޕްލޭސްއަށް ހުޅުވިފައިވާ ފުރުޞަތުތަކަށް އިތުރުކުރެވުނު ކުރިއެރުމެކެވެ.