އިންޑިޔާގައި 5ޖީ ނެޓްވޯކް ނުލިބިގެން ރަށްފުށުގެ ބަޔަކު ޓެކްނީޝަނަކު ސެލް ޓަވަރުގައި ބަނދެފިއެވެ.

މި ހާދިސާ ހިނގީ އުއްތަރު ޕްރަދޭޝް ސްޓޭޓްގެ ފަތޭހްޕޫރު ސިޓީގެ ރަށްފުށު ހިސާބެއްގައި މި ދިޔަ މަހު 10 ގައެވެ.

"ވޭތުވެދިޔަ ދެ އަހަރުވެސް މި ސަރަހައްދަށް ނެޓްވޯކް ނުލިބުމުގެ މައްސަލައަށް އެއްވެސް ހައްލެއް ލިބިފައެއް ނުވޭ. ފައިސާ ދެއްކިޔަސް އަދި ކަރަންޓު ހުންނަ ވަގުތުތަކުގައިވެސް ނެޓްވޯކްގެ ސިގްނަލް ނުލިބޭ،" ބަސްތީ މީހަކު ބުންޏެވެ.

ނެޓްވޯކްގެ ހިދުމަތް ނުލިބޭ މައްސަލައިގައި ނުރުހިގެން ޖިއޯ ކުންފުނީގެ ޓެކްނީޝަން ސެލް ޓަވަރުގައި ބަނދެގެން ގެންގުޅުނު ހާދިސާއާ ގުޅިގެން، ފުލުހުން ނިކުމެ އޭނާ ސަލާމަތްކޮށް، ހަ މީހުން ހައްޔަރުކުރިއެވެ.

އަދިތުޔާ ބާނު ސިންގް ނަމަކަށް ކިޔާ ޓެކްނީޝަން ސަލާމަތްކުރަން ފުލުހުން ދިޔައީ އޭނާ ބަނދެފައި ހުރި މަންޒަރުގެ ވީޑިއޯއެއް ސޯޝަލް މީޑިއާގައި އާއްމުވުމުންނެވެ. ފުލުހުންނަށް އޭނާ ސަލާމަތްކުރެވުނުއިރު ޓަވަރުގައި އޭނާ ބަނދެފައި ހުރިތާ ދެ ގަޑިއިރުވެފައިވެއެވެ.

ފުލުހުން ހަ މީހުން ހައްޔަރުކުރީ ގައިރުގާނޫނީ ގޮތުގައި މީހަކު ހިފަހައްޓައި ބަންދުކުރި ދައުވާގައެވެ.

އެ މީހުންވަނީ ކަފާލާތުގެ ދަށުން ދޫކޮށްލައިފައެވެ. ނަމަވެސް ފުލުހުން އަދިވެސް ދަނީ އެ މައްސަލައިގެ ތަހުގީގު ކުރިއަށްގެންދަމުންނެވެ.

ދެ އަހަރުވެގެންދިޔައިރު، 5ޖީއަށް ފައިސާ ދެއްކުމަށްފަހުވެސް، އެކަށީގެންވާ ހިދުމަތެއް ނުލިބޭތީ، ކުންފުނީގެ އިސްވެރިން އެ ބަސްތީއަށް ނާންނަނީސް ޓެކްނީޝަން ދޫނުކުރަން ރައްޔިތުން ނިންމި ނަމަވެސް، ފުލުހުން ޓެކްނީޝަން މިނިވަންކުރީއެވެ.