ފިރިހެނަކު އޭނާގެ އަނބިގޮއްޔެ ގެއްލިގެން އެކަން ރިޕޯޓުކުރަން ފުލުސް އޮފީހަށް ހާޒިރުވެއްޖެއެވެ. މައްސަލަ ރަޖިސްޓްރީ ކުރަން އިން ފުލުސްމީހާ ފިރިމީހާ ގާތުން އެ އަންހެންމީހާގެ ވަނަވަރު އޮޅުންފިލުވަން މަސައްކަތްކުރިއެވެ.

ފުލުސްމީހާ: އަނބިމީހާ ގެޔަށް ނާންނަތާ މިހާރު ކިތައް ގަޑިއިރުވެއްޖެ؟

ފިރިހެން މީހާ: އިއްޔެ މެންދުރު ނައްޓައިލި ގޮތަށް އަދި ގެއަކަށް ނާދޭ.

ފުލުސްމީހާ: އޭނާގެ އުމުރުން ކިތައް އަހަރުތޯ؟

ފިރިހެން މީހާ: ސީދާ އެހެން ބުނާކަށް ނޭނގެ. 40 އަހަރު ހެން ހީވަނީ.

ފުލުސްމީހާ: އޭނާގެ އިސްކޮޅަކީ؟

ފިރިހެން މީހާ: 5 ފޫޓަށް ވުރެން ތަންފުކެއް ދިގުކަންނޭގެ. މާ ރަނގަޅަކަށް ނޭނގެ.

ފުލުސްމީހާ: (ފިރިހެން މީހާއާ ދިމާލަށް ފާޑަކަށް ބަލައިލައިފައި) އިނދެގެން އުޅޭތާ ކިހާ ދުވަހެއް ވެއްޖެ؟

ފިރިހެން މީހާ: (އިނގިލިން ގުނައިލައިފައި) 10 އަހަރު

ފުލުސް މީހާ: އޭނާގެ އިސްތަށިގަނޑު ބުޅިތަ؟ ފަންތަ؟

ފިރިހެން މީހާ: (ބޯކަހަމުން) އިސްތަށިގަނޑު ދޯ… ހީވަނީ ބުރުގާ އަޅައިފައިހެން ހުންނަނީ.

ފުލުސްމީހާ: ހީވަނީ؟؟؟!

ފިރިހެން މީހާ: ލައްބަ. މާ ޔަގީނެއް ނޫން

ފުލުސްމީހާ: ބޭރަށް ނުކުތް އިރުގައި ލައިގެން ހުރީ ކޮންކަހަލަ ހެދުމެއް؟

ފިރިހެންމީހާ: ހަމަ އެއްގޮތަކަށް ވެސް ނޭނގެ.

ފުލުސްމީހާ: އޭނާގެ ފޮޓޮއެއް އެބައޮތްތޯ ފޯނުގައި؟

ފިރިހެން މީހާ: (ފޯނު އެތައް އިރެއް ވަންދެން ސްކްރޯލު ކޮށްފައި) ނޫނޭ. ފޮޓޮއެއް ނެތޭ.

ފުލުސްމީހާ: ޔަގީންތޯ އަނބިމީހާކަން؟

ފިރިހެންމީހާ: ޔަގީން، ޔަގީން.

ފުލުސް މީހާ: (މާނޭވާއެއް ލައިފައި) އަޅުގަނޑަށް އޭނާ ހޯދަން ފަސޭހާވާނޭ އެއްވެސް މައުލޫމާތެއް ދެވެން އެބައޮތްތޯ؟

ފިރިހެން މީހާ: (ވަރަށް ހިތްދަތި ރާގަކަށް) އާދެ. އޭނާ ފިލީ އަޅުގަނޑުގެ ސައިކަލަށް އަރައިގެން.

ފުލުސްމީހާ: ސައިކަލު ތަފުސީލު އެނގޭތޯ؟

ފިރިހެންމީހާ: (ވަގުތުން ފޯނުން ސައިކަލުގެ އެތައް ސަތޭކަ ފޮޓޯތައް ދައްކަމުން) މިއީ އެންމެ ފަހުގެ ސްކޫޕީ. ކަޅުކުލަ. ވަރަށް ޗާލުވާނެ. ވަރަށް ހަލުވިވާނެ. އިންޖީނު 4 ސްޓްރޯކު. އެންމެ ކޫރުމެއްވެސް ނުހުންނާނެ.

ފުލުސްމީހާ: އަވަހަށް ގެއަށް ދުރުވޭ. އަޅުގަނޑުމެން ތި ބޭފުޅާގެ ސައިކަލު ހޯދައިފައި އަންގައިލާނަން.