ކޮންމެ އަހަރަކު ބާއްވާ ބޯޓުދެލި އުފުލާ ދުނިޔޭގެ މުބާރާތް އިނގިރޭސި ވިލާތުގެ ހުޅަނގު ޔޯކްޝަޔާގައި މި ފަހަރު ވެސް ބާއްވައިފިއެވެ.

ކައިބޮއި އަދި ކުޅިވަރު ކުޅެން އިޖުތިމާއީ ގޮތުން މީހުން އެއްވާ ޕަބެއްގެ ތެރޭގައި ދެ މީހެއްގެ ދެމެދުގައި 1963 ގައި އުފެދުނު ބާއްޖަމެރުމަކުން ފެށި މި މުބާރާތް ގުޅުވައިލައިފައިވަނީ ޔޯކްޝަޔާގެ ބޯޓުދެލި ނަގާ ތަރިކައަށެވެ.

ގާތްގަނޑަކަށް އެއް މޭލަށް ހިނގަން ޖެހޭ މި ރޭސް އިޖުތިމާއީ ކުޅިވަރެއްގެ ގޮތުގައި ހެދުމަށް ކުޑަކުދިންނަށް ވެސް ބައިވެރިވެއެވެ.

ކުޑަކުދިންނަށް އެހާ ބަރު ބޯޓުދެލި ބަސްތާ އުފުލާކަށް ނުޖެހެއެވެ. ފިރިހެނުންނަށް ޖެހެނީ 50 ކިލޯ ހުރި ބޯޓުދެލީގެ ބަސްތާއެއް އުފުލާށެވެ. އަންހެނުންނަށް ޖެހެނީ 20 ކިލޯ ހުރި ބޯޓުދެލީގެ ބަސްތާއެއް އުފުލާށެވެ.

މި ދިޔަ ހޯމަ ދުވަހު ބޭއްވި މި ފަހަރުގެ މުބާރާތުގައި ވާރޭ ވެހުނެވެ.

މުބާރާތުގައި ބީބީސީ އެކެއްގެ ޓީވީ ޝޯއެއް ކަމަށްވާ "ގްލެޑިއޭޓާ"ގެ އުމުރުން 24 އަހަރުގެ ތަރި ޖޯޑީ އައުންސްލީ ވެސް ބައިވެރިވިއެވެ. ޔޯކްޝަޔާއަށް އުފަން ޖޯޑީ މީގެ ދެ ހަފުތާ ކުރިން ވަނީ ބޯޓުދެލި ބަސްތާއެއް 50 މީޓަރަށް، 8.06 ސިކުންތުން އުފުލައި، ބޯޓުދެލި އުފުލައިގެން އެންމެ ހަލުވިކޮށް ދުވުނުކަމުގެ ދުނިޔޭގެ ރެކޯޑު މުގުރައިލައިފައެވެ. ނަމަވެސް ޔޯކްޝަޔާގެ ރޭސް އޭނާއަށް ކާމިޔާބު ނުކުރެވުނެވެ.

"ދުވާއިރު އަތުގެ ހަރަކާތް ބޭނުންވޭ. ނަމަވެސް ބޯޓުދެލި ބަސްތާއެއް އުފުލަން ޖެހުމުން މިއީ ވަރަށް އުނދަގޫ ކަމެއް. މިއީ ވަރަށް އާދަޔާ ހިލާފު ކަމެއް. އެހެން މީހުން ވެސް މި ތަޖުރިބާކޮށްލަން އަހަރެން އެދެން،" ޖޯޑީ ބުންޏެވެ.

ޖޯޑީއަކީ ކުޑައިރު ވެސް މި މުބާރާތުގައި ބައިވެރިވި އަންހެނެކެވެ. އޭނާ މި މުބާރާތް ބޭނުންކުރަނީ ދި އެލިޒަބަތު ފައުންޑޭޝަނުން ކަންފަތަށް އަޑު ނީވޭ ތުއްތުކުދިންނާއި ޕްރިސްކޫލަށް ދާ ކުދިންނަށް އެހީވުމަށެވެ. ޖޯޑީއަކީ ވެސް ކަންފަތަށް އަޑު ނީވޭ އަންހެނެކެވެ. މިހެންވެ ކޮންމެވެސް ވަރަކަށް އަޑުއިވޭނެ ގޮތް ހެދުމަށް އޭނާގެ ކަންފަތަށް އޭނާ ކުޑަ އިރު ވަނީ ކޮކްލިއާ އިމްޕްލާންޓެއް ޖަހައިފައެވެ.