ޔުނިވަރސިޓީ އޮފް ވެސްޓް ލަންޑަންގެ ޕްރޮގްރާމްތައް އެވިޑް ކޮލެޖުން ކިޔަވައިދޭން ފެށުން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު އިފްތިތާހުކޮށް ދެއްވައިފިއެވެ.

އެކަން ފާހަގަކުރުމަށް ރޭ ބޭއްވި ހަފްލާގައި ވާހަކަފުޅު ދައްކަވަމުން ޑރ. ޝަހީމް ވިދާޅުވީ ޔުނިވަރސިޓީ އޮފް ވެސްޓް ލަންޑަންގެ ޕްރޮގްރާމްތައް އެވިޑްގައި ފެށިގެން ދިއުމަކީ "ރާއްޖޭގައި މަތީ ތައުލީމު ފުރިހަމަ ކުރަން ބޭނުންވާ ފަރާތްތަކަށް ހުޅުވިގެންދިޔަ ރަނުގެ ފުރުޞަތެއް" ކަމަށެވެ. އަދި އެވިޑް ކޮލެޖުން ރާއްޖޭގެ ތަޢުލީމަށް ކުރަމުން ގެންދާ ޚިދުމަތް ފާހަގަކުރައްވައި، ފާހަގަކުރެވޭ އެތައް ދަރިންނެއް މަސައްކަތުގެ މައިދާނަށް އެ ކޮލެޖުން ނެރެދީފި ކަމަށް ވިދާޅުވެ އެވިޑު ކޮލެޖަށް ވަޒީރު ތައުރީފުކުރެއްވިއެވެ.

އެވިޑުން ބުނީ ޔުނިވަރސިޓީ އޮފް ވެސްޓް ލަންޑަންގެ ކޯސްތައް އެތަނުން ހިންގަނީ ރާއްޖޭގެ އެކި ކަންކޮޅުތަކަށް އެވިޑް ކޮލެޖުން ދެމުންގެންދާ ހިދުމަތް ފުޅާކުރުމާއި ހިދުމަތުގެ ފެންވަރު އިތުރަށް ރަނގަޅު ކުރުމަށް ކަމަށެވެ. އަދި ބޭރުގެ ފަރާތްތަކާ ގުޅިގެން މަސައްކަތް ކުރުމުން އެ ފަރާތްތަކުން ގެންގުޅޭ އުސޫލުތަކާއި އުކުޅުތައް ދަސްވުމުގެ އިތުރުން ޔުނިވަރސިޓީ އޮފް ވެސްޓް ލަންޑަންގެ ލައިބްރަރީއަށް އެވިޑް ކޮލެޖްގެ ދަރިވަރުންނަށާއި މުވައްޒަފުންނަށް އެކްސެސް ލިބިގެންދިޔުމުގެ ފުރުސަތު ފަހިވެގެންދާނެ ކަމަށް ވެސް އެ ކޮލެޖުން ބުނެއެވެ.